អាមេរិកឲ្យវៀតណាមបង់ពន្ធប្រឆាំងនឹងការលក់បង្ខូចថ្លៃលើការនាំចូលបង្គារ តែក្រុមហ៊ុនវៀតណាមជំទាស់
ក្រុមហ៊ុននាំចេញអាហារសមុទ្រដ៏ធំនៅវៀតណាម ឈ្មោះថា JSC បានប្រឆាំងជំទាស់នឹងនីតិវិធីរបស់ភាគីអាមេរិកដែលស្ទះដល់ការនាំចេញបង្គាររបស់ខ្លួន ចូលទៅក្នុងសហរដ្ឋអាមេរិក ពាក់ព័ន្ធនឹងពន្ធប្រឆាំងនឹងការលក់បង្ខូចថ្លៃ នេះបើតាមការចេញផ្សាយរបស់សារព័ត៌មាន Vietnamnews កាលពីថ្ងៃទី២៥ តុលាម្សិលមិញ។
ការតវ៉ានេះធ្វើឡើង កាលពីពេលថ្មីៗនេះ ពោលគឺបន្ទាប់ពីស្ថាប័នពន្ធដារព្រំដែនរបស់សហរដ្ឋអាមេរិកហៅកាត់ថា CBP បានសម្រេចថា ការនាំចូលបង្គារក្លាសេរបស់ក្រុមហ៊ុន Minh Phú Seafood JSC ទៅក្នុងទីផ្សារអាមេរិកគួរតែបង់ពន្ធឲ្យស្របតាមបទបញ្ញត្តិ ពន្ធប្រឆាំងនឹងការលក់បង្ខូចថ្លៃ ដែលធ្លាប់បានប្រើប្រាស់សម្រាប់ការនាំចូលបង្គារពីប្រទេសឥណ្ឌាដែរ។
ស្ថាប័នអាមេរិក US Customs and Border Protection (CBP) អះអាងថា ក្រុមហ៊ុនវៀតណាមួយនេះមិនបានបង្ហាញភស្តុតាងគ្រប់គ្រាន់ តាមតម្រូវការ ដើម្បីឲ្យច្បាស់ថា ក្រុមហ៊ុនមិនបានយកបង្គារពីឥណ្ឌា សម្រាប់នាំចេញទៅសហរដ្ឋអាមេរិក។ តំណាងក្រុមហ៊ុន Minh Phú Seafood JSC បាននិយាយថា ការសម្រេចរបស់ភាគីអាមេរិកនេះមិនត្រឹមត្រូវទេ ហើយខ្លួននឹងប្តឹងប្រឆាំងនឹងការសម្រេចនេះ៕
