និស្សិតពេទ្យកម្ពុជាចំនួន៧២នាក់គ្រោងនឹងចេញទៅបន្តការសិក្សានៅប្រទេសបារាំង នាចុងខែតុលា​នេះ​។ ពិធីសំណេះសំណាលជាមួយនិស្សិតជ័យលាភី អាហារូបករណ៍ថ្នាក់វេជ្ជបណ្ឌិតឯកទេស​ដែលគ្រោងនឹង​ទៅ​សិក្សានៅប្រទេសបារាំងនេះបានធ្វើឡើង នៅថ្ងៃទី២៦ ខែតុលា ឆ្នាំ២០២០នេះ ក្រោមអធិបតីភាព រដ្ឋលេខា​ធិការក្រសួង​សុខាភិបាល លោកសា​ស្ត្រាចារ្យ អេង ហួត និងឯកអគ្គរដ្ឋទូត​នៃសាធារណរដ្ឋបារាំង ប្រចាំ​កម្ពុ​ជា​លោកស្រី Eva Nguyen Binh ។

លោកសាស្ត្រាចារ្យ អេង ហួត បានថ្លែងថា អាហារូបករណ៍នេះ នឹងចូលរួមចំណែកក្នុងការអភិវឌ្ឍន៍ធន​ធាន​មនុស្ស និងបង្កើតនូវគុណភាពនៃការអប់រំ ក្នុងវិស័យសុខាភិបាលនៅកម្ពុជា។ ពិសេសពង្រឹង​នូវសមត្ថភាព និងជំនាញឯកទេសវេជ្ជសាស្ត្រ ក្នុងវិស័យវិទ្យាសាស្រ្តសុខាភិបាលនៅកម្ពុជា ឲ្យកាន់តែមានកម្រិតខ្ពស់ថែម​ទៀត ឈានទៅរកស្តង់ដារអន្តរជាតិ ដែលជាការចូលរួមចំណែកយ៉ាងសំខាន់ ក្នុងការអនុវត្តគោលនយោ​បាយ និងយុទ្ធសាស្ត្រកែទម្រង់របស់រាជរដ្ឋាភិបាលកម្ពុជា។លោករដ្ឋលេខាធិការ បានណែនាំ​និស្សិតទាំង​អស់ បន្តខិតខំប្រឹងប្រែងរៀនសូត្រ ឲ្យបានជាប់ជាស្ថាពរ ទទួលយកនូវចំណេះដឹង និងបទពិសោធន៍ថ្មីៗ ទាក់ទិននឹងឯកទេសរបស់ខ្លួន ហើយនាំយកនូវចំណេះដឹង និងចំណេះធ្វើទាំងនោះត្រឡប់មកកម្ពុជាវិញ ដើម្បីចូលរួមចំណែកក្នុងការអភិវឌ្ឍវិស័យសុខាភិបាល នៅមាតុប្រទេសយើងវិញ។

សាកលវិទ្យាល័យវិទ្យាសាស្ត្រសុខាភិបាល បានឲ្យដឹងថា ឆ្នាំ២០២០នេះ និស្សិតជយលាភីអាហារូបករណ៍ ថ្នាក់វេជ្ជបណ្ឌិតឯកទេស ដែលនឹងត្រូវសិក្សាបន្ត នៅប្រទេសបារាំងមានចំនួន៧២នាក់ ក្នុងនោះមាន​ស្រ្តី​ចំនួន២៤នាក់ និងបុរសចំនួន៤៨នាក់ សិក្សារយៈពេលមួយឆ្នាំ ចាប់ពីថ្ងៃទី០២ ខែវិច្ឆិកា ឆ្នាំ២០២០ រហូត​ដល់ថ្ងៃទី០១ ខែវិច្ឆិកាឆ្នាំ២០២១ នៅតាមគ្រឹះស្ថានបណ្តុះបណ្តាលចំនួន១៩ ដោយបែងចែកឯកទេស​ចំនួន២៣។ការគាំទ្រ ពីស្ថានទូតបារាំងប្រចាំកម្ពុជា សាកលវិទ្យាល័យបានបញ្ជួននិស្សិត ចុះកម្មសិក្សា​តាមមន្ទីរពេទ្យ នៅប្រទេសបារាំង ចំនួនពី៣០ទៅ៤០នាក់ក្នុងមួយឆ្នាំៗ ដោយចាប់តាំងពី ឆ្នាំ១៩៩៦ មកដល់​ឆ្នាំ២០១៩ មាននិស្សិតវេជ្ជសាស្ត្ររបស់សាកលវិទ្យាល័យផ្នែកវេជ្ជសាស្រ្តទូទៅ និងឯកទេសសរុបចំនួន​៨៣២នាក់ បានបន្តការសិក្សា ឬធ្វើកម្មសិក្សានៅប្រទេសបារាំង។