ព្រះមហាក្សត្រ ប្រទានព្រះរាជសារដល់សម្ដេចតេជោ ហ៊ុន សែន ដែលបានថ្វាយព្រះពរព្រះអង្គ ក្នុងឱកាសខួប១៦ឆ្នាំ នៃការឡើងគ្រងសិរីរាជសម្បត្តិ
ព្រះករុណា ព្រះបាទសម្ដេចព្រះ បរមនាថ នរោត្តម សីហមុនី ព្រះមហាក្សត្រនៃកម្ពុជា នៅថ្ងៃទី២៧ខែតុលាឆ្នាំ២០២០ បានប្រទានព្រះរាជសារមួយដល់ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានថ្វាយព្រះពរព្រះអង្គ នៅក្នុងឱកាសខួប១៦ឆ្នាំ នៃការឡើងគ្រងសិរីរាជសម្បត្តិ។
ក្នុងព្រះរាជសាររបស់ព្រះមហាក្សត្រជាអម្ចាស់ជីវិតតម្កល់លើត្បូង ព្រះអង្គមានសេចក្តីរីករាយ ដោយសម្ដែងនូវអំណរគុណដ៏ជ្រាលជ្រៅបំផុតចំពោះ សម្ដេចតេជោ ហ៊ុន សែន។
ព្រះអង្គបានមានព្រះរាជបន្ទូលថា ព្រះអង្គសូមកោតសរសើរដ៏កក់ក្តៅបំផុត ចំពោះទឹកចិត្តស្នេហាជាតិមាតុភូមិ និងប្រជារាស្រ្តរបស់ សម្ដេចអគ្គមហាសេនាបតីតេជោ ប្រធានគណបក្សប្រជាជនកម្ពុជាដ៏ឆ្នើម ឈ្លៀសវៃ ប៉ិនប្រសព្វដែលបានខិតខំ ដឹកនាំកសាងជាតិគ្រប់វិស័យទាំងអស់ និងជួយប្រជារាស្រ្តគ្រប់ពីកន្លែងទាំងអស់ នៅទូទាំងព្រះរាជាណាចក្រកម្ពុជា ធ្វើឲ្យប្រទេសជាតិយើង មានភាពរីកចម្រើនរុងរឿងគ្រប់វិស័យ និងប្រជារាស្រ្ត បានទទួលសេចក្តីសុខសន្តិភាព។
ព្រះអង្គក៏បានប្រសិទ្ធិពរ បវរសួស្តី សិរីមង្គល វិបុលសុខមហាប្រសើរ ជូនចំពោះ សម្ដេចតេជោ ហ៊ុន សែន ឱ្យប្រកបតែពុទ្ធពរ ៤ ប្រការ គឺអាយុ វណ្ណៈ សុខៈ និងពលៈកុំបីឃ្លៀងឃ្លាតឡើយផងដែរ។ សូមជម្រាប សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា បានផ្ញើសារលិខិតមួយកាលពីថ្ងៃទី២៦ខែតុលា ថ្វាយព្រះពរ ព្រះករុណា ព្រះបាទសម្ដេចព្រះ បរមនាថ នរោត្តម សីហមុនី ព្រះមហាក្សត្រកម្ពុជា ក្នុងឱកាសខួបលើកទី១៦ឆ្នាំ នៃការឡើងគ្រងរាជសម្បត្ដិរបស់ព្រះអង្គ។
ក្នុងសារលិខិតរបស់ សម្ដេចតេជោ ហ៊ុន សែន បានថ្វាយព្រះពរថា ក្នុងឱកាសដ៏មហានក្ខត្តប្ញក្សដ៏ឧត្តុងឧត្តមនៃព្រះរាជពិធីខួប១៦ឆ្នាំ ការឡើងគ្រងព្រះបរមសេរីរាជសម្បត្តិរបស់ ព្រះករុណាថ្លៃវិសេស ខណៈនេះទូលព្រះបង្គំខ្ញុំ និងភរិយា សូមព្រះរាជានុញ្ញាតចូលរួមអបអរសាទរ ដោយមនោសញ្ចេតនាសោមនស្សរីករាយជាអនេកប្បការ និងលំឱនកាយថ្វាយព្រះសព្វសាធុកាពរ បវរសួស្ដីជ័យមង្គល វិបុលសុខមហាប្រសើរ សូមព្រះករុណាជាអម្ចាស់ ទ្រង់ស្ដេចមានព្រះរាជសុខភាពល្អបរិបូណ៍ ព្រះពលានុភាពមាំមួនខ្លាំងក្លា ព្រះបញ្ញាភ្លឺថ្លាវាងវៃ ព្រះជន្មាទីឃាយឺនយូរជាងរយព្រះវស្សា ដើម្បីព្រះអង្គគង់ប្រថាប់គ្រោងព្រះបរមសិរីសម្បត្តិជាម្លប់ដល់ប្រជាពលរដ្ឋ ជាមីងមា បងប្អូនកូនចៅ របស់ព្រះអង្គជ្រកកោនត្រជាក់ត្រជុំសុខសាន្តមនោរម្យជានិច្ចនិរន្តរ៍អស់កាលដ៏យូរអង្វែងតរៀងទៅ៕
សូមអានខ្លឹមសារទាំងស្រុងខាងក្រោមនេះ៖
