ឯកឧត្តម  ឧត្តមសេនីយ៍ឯក   ស  ថេត  អគ្គស្នងការរងនគរបាលជាតិ និងជាស្នងការនគរ​បាលរាជធានីភ្នំពេញនៅព្រឹកថ្ងៃទី២៩  ខែតុលា  ឆ្នាំ២០២០  បន្តយកចិត្តទុកដាក់អញ្ជើញសាកសួរ​សុខទុក្ខមន្រ្តីនគរបាល០៦នាក់ ដែលបំរើការងារក្នុងអង្គភាពការិយាល័យនគរបាលចរាចរណ៍ផ្លូវគោក  អធិការដ្ឋាននគរបាលខណ្ឌប្ញស្សីកែវ  ខណ្ឌ៧មករា  ខណ្ឌទួលគោក  ខណ្ឌមានជ័យ  និងខណ្ឌច្បារអំពៅ  កំពុងសម្រាកព្យាបាលជំងឺនៅផ្ទះ និងបានឧបត្ថម្ភថវិកាសរុប១៣លាន៩០ម៉ឺនរៀល ក្នុងនោះថវិកា​ឯកឧត្តមផ្ទាល់ចំនួន១៣លានរៀល  ថវិកាលោកអធិការនគរបាលខណ្ឌច្បារអំពៅ៥០ម៉ឺនរៀល  ថវិកា​លោកអធិការនគរបាលខណ្ឌទួលគោក៤០ម៉ឺនរៀល  និងសម្ភារ: មួយចំនួន  ដើម្បីជួយ​ដោះស្រាយ​ទុក្ខលំបាកក្នុងជីវភាពនិងជាការបង្ហាញពីការគិតគូរខ្ពស់ប្រកបដោយទឹកចិត្តមនោសញ្ចេតនាអាណិតស្រលាញ់ចំពោះមន្រ្តីនគរបាលក្រោមឱវាទដែលជួបការលំបាក។

ឯកឧត្តម ឧត្តមសេនីយ៍ឯក ស ថេត បានមានប្រសាសន៍សំណេះសំណាលមន្រ្តីនគរបាល​មានជំងឺនិងក្រុមគ្រួសារ ហើយក៏បានលើកទឹកចិត្ត ត្រូវពង្រឹងស្មារតីឱ្យបាន​រឹងមាំ​ខិតខំប្រឹងប្រែងថែទាំរក្សាសុខភាពឱ្យបានល្អ។

ឯកឧត្តម ក៏បានមានប្រសាសន៍ទៀតថា ជានិច្ចជាកាលមន្រ្តីនគរបាល ក្រោមឱវាទដែលមាន​ទុក្ខលំបាក​ខ្វះខាតក្នុងជីវភាព និងមានបញ្ហាជម្ងឺរ៉ាំរ៉ៃក៏ដូចជារងគ្រោះដោយឧបទ្ទវ​ហេតុណាមួយនៅពេល​បំពេញ​ភារកិច្ចតែងតែទទួលបានការលើកទឹកចិត្ត និងចុះសាកសួរសុខទុក្ខពីថ្នាក់ដឹកនាំ​ស្នងការដ្ឋាននគរបាល​រាជធានីភ្នំពេញ និងឧបត្ថម្ភថវិកាក្នុងការចូលរួមចំណែកជួយដោះស្រាយបញ្ហាលំបាក​ក្នុងជីវភាពរបស់គ្រួសា​រនគរបាលដើម្បីជាការតបស្នងដែលបងប្អូនបានលះបង់កម្លាំងកាយចិត្តបំពេញការងារការពារសន្តិសុខ        សណ្តាប់ធ្នាប់នាំមកនូវសុវត្ថិភាពស្ថិរភាពជូនប្រជាពលរដ្ឋនៅក្នុងរាជធានីភ្នំពេញ ។ ជាមួយគ្នានោះឯកឧត្តមឧត្តមសេនីយ៍ឯក ស ថេត ក៏បានជូនពរពួកគាត់ឆាប់ជាសះស្បើយពីជំងឺ និងមានសុខភាពរឹងមាំ នៅពេល    ឆាប់ៗខាងមុខ ដើម្បីបន្តបំពេញភារកិច្ចបំរើប្រជាពលរដ្ឋ ៕វិច្ឆការ