ភ្នំពេញ ៖ រថយន្តកាមរីបាឡែនមួយគ្រឿងបើកឆ្លងផ្លូវមិនប្រយ័ត្នត្រូវបុរស ២ នាក់ជិះម៉ូតូមួយគ្រឿងឌុបគ្នាយ៉ាងលឿនចាប់ហ្វ្រាំងមិនទាន់បុកចំហៀងខាងមុខពេញទំហឹងបណ្តាលឲ្យដួលបោកនិងថ្នល់រងរបួសធ្ងន់ បង្កកាលពីវេលាម៉ោង១០ និង ២០ នាទីយប់ថ្ងៃទី ១ខែវិច្ឆិកាឆ្នាំ ២០២០ ស្ថិតនៅតាមបណ្ដោយផ្លូវកម្ពុជាក្រោមកែងនិងផ្លូវ ២២៥ ក្នុងសង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ។

 យោងតាមប្រភពព័ត៌មានពីកន្លែងកើតហេតុបានឲ្យដឹងថា  មុនកើតហេតុគេឃើញរថយន្តកាមរីបាឡែនមួយគ្រឿងពណ៌ទឹកប្រាក់ពាក់ស្លាកលេខភ្នំពេញ2AZ-2537ធ្វើដំណើរតាមបណ្ដោយផ្លូវ ២២៥ទិសដៅពីជើងទៅត្បូងលុះមកដល់ចំណុចកើតខាងលើកែងនឹងផ្លូវកម្ពុជាក្រោម ក៏មានម៉ូតូមួយគ្រឿងម៉ាកស្មាក់វីពណ៌ខ្មៅពាក់ស្លាកលេខតាកែវ1L-4739ជិះដោយបុរសពីរនាក់ធ្វើដំណើរតាមបណ្តោយផ្លូវកម្ពុជាក្រោមទិសដៅពីលិចទៅកើតចាប់ហ្វ្រាំងមិនទាន់ជ្រុលទៅបុកចំហៀងខាងមុខខាងស្ដាំរថយន្តពេញទំហឹងបណ្ដាលឲ្យដួលបោកនិងថ្នល់រងរបួសធ្ងន់ទាំង២នាក់  បន្ទាប់មករថយន្តសង្គ្រោះបន្ទាន់បានដឹកជនរងគ្រោះទៅសង្គ្រោះនៅឯមន្ទីរពេទ្យភ្លាមៗ។

 ក្រោយកើតហេតុសមត្ថកិច្ចមូលដ្ឋានបានចុះមកដល់បានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយកម៉ូតូនិងរថយន្តទៅរក្សាទុកនៅអធិការដ្ឋាននគរបាលខណ្ឌទួលគោករងចាំធ្វើការដោះស្រាយគ្នានៅពេលក្រោយ៕ដោយ៖  ជីម  ភារ៉ា