លោកឧកញ៉ា ឡេង ណាវ៉ាត្រា ឧបត្ថម្ភថវិកា២ម៉ឺន៥ពាន់ដុល្លារជូនដល់គ្រួសារសព និង អ្នករងរបួស ក្នុងគ្រោះថ្នាក់លោតឆត្រយោង
ភ្នំពេញ៖ លោកឧកញ៉ា ឡេង ណាវ៉ាត្រា បានធ្វើការឧបត្ថម្ភទឹកប្រាក់សុទ្ធ២ម៉ឺន៥ពាន់ដុល្លារដល់គ្រួសារសពលោកវរសេនីយ៍ត្រី លឹម សាយ និង គ្រួសាររងរបួសដែលបានធ្វើខុសលក្ខណ:បច្ចេកទេសក្នុងការបញ្ជាឆត្រ ក្នុងពិធីបិទវគ្គហ្វឹកហ្វឺនកម្មុង់ដូរជំនាន់ទី១០ វគ្គហ្វឹក ហ្វឺនឆត្រយោងជំនាន់ទី២៩ និងបើកវគ្គហ្វឹកហ្វឺនឆត្រយោងជំនាន់ទី៣០ នៅសាលាហ្វឹកហ្វឺនទ័ពពិសេសតេជោសែនឱរ៉ាល់ ខេត្តកំពង់ស្ពឺកាលពីព្រឹកថ្ងៃទី១៤ ខែមករា ឆ្នាំ២០២១នេះ ។
នៅក្នុងទឹកប្រាក់២ម៉ឺន៥ពាន់ដុល្លារខាងលើនេះ លោកឧកញ៉ានឹងផ្ដល់ជូនគ្រួសារសពចំនួន ១ម៉ឺន៥ពាន់ដុល្លារ និង គ្រួសារអ្នករងរបួសចំនួន១ម៉ឺនដុល្លារ ។ លោកឧកញ៉ា ឡេង ណាវ៉ាត្រា បានមានប្រសាសន៍ថា ក្នុងនាមខ្ញុំបាទជាប្រជាពលរដ្ឋមួយរូប រស់ក្រោម(ដំបូលសន្តិភាព ) គុណបំណាច់របស់កងកម្លាំង ដែលតែងតែការពារប្រជាជនយ៉ាងកក់ក្ដៅ គ្រប់កាលៈ ទេសៈ ក្រុមការងារ ក៏ដូចជាគ្រួសារខ្ញុំបាទសូមចូលរួមរំលែកទុក្ខយ៉ាងក្រៀមក្រំបំផុត ចំពោះមរណភាពរបស់លោកវរ:សេនីយ៍ត្រី លឹម សាយ គឺជាការបាត់បង់គ្រូបង្វឹកដ៏ល្អ និង ធនធានដ៏កម្រ របស់កម្ពុជា ។
ខ្ញុំបាទសុំចូលរួមឧបត្ថម្ភពីរម៉ឺនប្រាំពាន់ដុល្លា ដែលជូនទៅគ្រួសារនៃសព ១ម៉ឺន៥ពាន់ដុល្លារ និងគ្រួសារដែលរងរបួសចំនួន១ម៉ឺនដុល្លារ ។ ជាមួយគ្នានេះ លោកឧកញ៉ ឡេង ណាវ៉ាត្រា ក៏សូមអោយក្រុមគ្រួសារនៃសព ទាក់ទងមកលោក ហេង ឡុង ដើម្បីទទួលប្រាក់នេះ ឬផ្ដល់ជាលេខទូរសព្ទដើម្បីក្រុមការងារទាក់ទងទៅវិញ ៕