ភ្នំពេញ៖ បុរសម្នាក់បើករថយន្តមួយគ្រឿងងោកមួយភាំងជ្រុលទៅបុកទ្រូងផ្លូវពេញទំហឹងបណ្ដាលឲ្យរថយន្តខូចខាតមួយកំណាត់មុខយ៉ាងដំណំតែមិនមានអ្នករបួសនោះទេ ហេតុការណ៍នេះបង្កឡើងកាលវេលាម៉ោង២និង១០នាទីយប់ថ្ងៃទី១៩ខែមករាឆ្នាំ២០២១ ស្ថិតតាមបណ្ដោយផ្លូវសហព័ន្ធរុស្សូីចំណុចស្ដុបក្ដាន់ពីរ ក្នុងសង្កាត់ស្រះចក ខណ្ឌដូនពេញ។

យោងតាមប្រភពពីកន្លែងកើតបានឲ្យដឹងថាមុនពេលកើតហេតុគេឃើញបុរសម្នាក់បើករថយន្តម៉ាកឡិចស៊ីសNX200tពណ៌សពាក់ស្លាកលេខភ្នំពេញ2BJ 9372 ធ្វើដំណើរទិសដៅពីកើតទៅលិចបោះពួយយ៉ាងលឿនខណៈមកដល់ចំណុចកើតហេតុខាងលើងោកមួយភាំងជ្រុលទៅបុកទ្រូងផ្លូវបាក់១កង់រថយន្តបន្តដំណើរបានប្រមាណ១០០ម៉ែត្រទៅមុខលែងរួចរថយន្តខូចខាតផ្នែកខាងមុខស្ទើរទាំងស្រុង។

ក្រោយកើតហេតុសមត្ថកិច្ចមូលដ្ឋានទាក់ទងជំនាញមកស្ទូចរថយន្តបង្កទៅការិយាល័យចរាចរណ៍ផ្លូវគោកក្រុងរងចាំឲ្យម្ចាស់ចូលខ្លួនមកដោះស្រាយគ្នាតាមផ្លូវច្បាប់៕ ដោយ ៖ ជីម ភារ៉ា