ក្រុមហ៊ុនមីជាតិប្រគល់ម៉ាស៊ីន QMS និង ទូរទស្សន៍ជូនទៅដល់មជ្ឈមណ្ឌលជាតិផ្តល់ឈាម ដើម្បីផ្តល់ភាពងាយស្រួលដល់ប្រតិបត្តិការប្រចាំថ្ងៃ
ភ្នំពេញ៖ ក្នុងនាមជាក្រុមហ៊ុនក្នុងស្រុកឈានមុខគេមួយ ក្រុមហ៊ុនមីជាតិបានចូលរួមយ៉ាងសកម្មភាពជាមួយមជ្ឈមណ្ឌលជាតិផ្តល់ឈាម តាំងពីការចាប់ផ្តើមដំបូង ដែលសកម្មភាពទាំងអស់នេះ កើតឡើងបានដោយសារការគាំទ្រពីសំណាក់អតិថិជន និងអ្នកប្រើប្រាស់ផលិតផលមីជាតិ ដែលជាមីកញ្ចប់ឆ្អិនស្រាប់ មានរសជាតិខ្មែរដំបូងគេផលិតដោយស្នាដៃកូនខ្មែរជាមួយម៉ាស៊ីនជប៉ុន និងបច្ចេកវិទ្យាជប៉ុន ។
តួយ៉ាងក្រុមហ៊ុនមីជាតិរៀបចំពិធីប្រគល់ម៉ាស៊ីន QMS និង ទូរទស្សន៍ចំនួន២គ្រឿងជូនទៅដល់មជ្ឈមណ្ឌលជាតិផ្តល់ឈាមនាព្រឹកថ្ងៃទី២៧ ខែមករា ឆ្នាំ២០២១ ក្នុងគោលបំណងចូលរួមចំណែកដល់ការទ្រទ្រង់លើប្រតិបត្តិការប្រចាំថ្ងៃរបស់មជ្ឈមណ្ឌល ។ លោកជំទាវ ជឹង សុគន្ធាវី អគ្គនាយិកាក្រុមហ៊ុនមីជាតិបានមានប្រសាសន៍ថា សម្ភារៈដ៏ថ្មីស្រឡាងចំនួន២មុខ ដែលមីជាតិបានប្រគល់ជូនមជ្ឈមណ្ឌលជាតិផ្តល់ឈាម រួមមានទូរទស្សន៍ Flat screen ទំហំ 40 អ៊ីងចំនួន២គ្រឿង និងម៉ាស៊ីន QMS ដែលជាបច្ចេកវិទ្យាទំនើប និងមានសមត្ថភាពខ្ពស់ ក្នុងការគ្រប់គ្រងទិន្នន័យចំនួនអ្នកមកទទួលសេវានៅមជ្ឈមណ្ឌលជាតិផ្តល់ឈាមយ៉ាងសុក្រឹត និងមានភាពងាយស្រួល ។ លោកជំទាវអគ្គនាយិកាបន្ថែមថា ការផ្តល់ជូនសម្ភារៈទាំងពីរមុខនេះ បានកើតមានឡើងគឺដោយសារតែមើលឃើញពីតម្រូវការចាំបាច់ប្រចាំថ្ងៃរបស់មជ្ឈមណ្ឌលជាតិផ្តល់ឈាម ក្នុងការបម្រើសេវាកម្មជូនប្រជាពលរដ្ឋអោយកាន់តែប្រសិទ្ធភាព និងមានភាពឆាប់រហ័ស ។
ជាមួយគ្នានេះ លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាមបញ្ជាក់ថា ការផ្តល់ជូននូវម៉ាស៊ីនចាប់លេខ QMS និងទូរទស្សន៍នេះ ពិតជាបានសម្រួលដល់ភាពប្រតិបត្តិការប្រចាំថ្ងៃរបស់មជ្ឈ មណ្ឌលជាតិផ្តល់ឈាមពិតមែន ។ ម៉ាស៊ីន QMS នេះ ជាម៉ាស៊ីនចាប់លេខរង់ចាំទទួលសេវា ដែលជាបច្ចេកវិទ្យាទំនើបចុងក្រោយ និងមានសមត្ថភាពខ្ពស់ ក្នុងការគ្រប់គ្រងទិន្នន័យចំនួនអ្នកមកទទួលសេវានៅមជ្ឈមណ្ឌលជាតិផ្តល់ឈាមយ៉ាងសុក្រឹត និងមានភាពងាយស្រួល ។ ប្រព័ន្ធគ្រប់គ្រងទិន្នន័យនេះ ត្រូវបានបញ្ចូលដោយស្វ័យប្រវត្តិជាមួយប្រព័ន្ធ Data Based នៃមជ្ឈមណ្ឌល និងត្រូវបានបំពាក់ដោយបច្ចេកវិទ្យាទំនើប អេក្រង់ Touch screen ដែលរចនាឡើងយ៉ាងសាកសម និងមានលក្ខណៈសន្សំសំចៃ ព្រមទាំងមិនប៉ះពាល់ដល់បរិស្ថាន ក្នុងកញ្ចប់ថវិកាសរុបជាង២៧លានរៀល ៕