ខេត្តស្ទឹងត្រែង៖ឯកឧត្តម ឡូយ សុផាត បានថ្លែងទៅកាន់ប្រជាពលរដ្ឋជនជាតិព្រៅ នៅក្នុងភូមិកាតូតថា៖ប្រជាពលរដ្ឋទាំងអស់នៅភូមិកាតូតនេះ គឺជាម្ចាស់ព្រៃ ជាម្ចាស់ទឹកដីកំណើតរបស់ខ្លួន ។ ឯកឧត្តមក៏បានមានប្រសាសន៍ជឿជាក់ដែរថា៖បងប្អូនប្រជាពលរដ្ឋជនជាតិព្រៅ ពិតជាស្រលាញ់ទឹកដីព្រៃប្រឹក្សា និងដីភ្នំក្នុងស្រុករបស់ខ្លួន ពីព្រោះបងប្អូនជនជាតិព្រៅបានរស់នៅតកូនចៅជាច្រើនជំនាន់មកហើយ ។ឯកឧត្តមអ្នកតំណាងរាស្រ្ត ចង់ឲ្យភូមិសាស្រ្តកាតូតនេះ ក្លាយទៅតំបន់ទេសចរណ៍ ព្រោះទាំងនេះសុទ្ធតែជាធម្មជាតិពិតៗដែលមានស្រាប់ ។ ហើយសូមឲ្យរក្សាឲ្យបាននូវប្រពៃណីទំនៀមទំលាប់ដូនតារបស់បងប្អូនជនជាតិព្រៅកុំឲ្យបាត់បង់ ។

ប្រសាសន៍សំណូមពរ និងជម្រុញបន្ថែមទៅកាន់ប្រជាពលរដ្ឋជនជាតិព្រៅបែបនេះ ត្រូវបានឯកឧត្តមថ្លែងនៅក្នុងពិធីសម្ភោធដាក់ឲ្យប្រើប្រាស់ផ្លូវបេតុងអាមេ១ខ្សែ បកាលពីថ្ងៃទី៣១មករាឆ្នាំ២០២១ នៅភូមិកាតូត ឃុំកំភុន ស្រុកសេសាន ខេត្តស្ទឹងត្រែង ។

លោក សុវណ្ណ ពិសេដ្ឋ អភិបាលស្រុកសេសានបានឲ្យដឹងថា៖ផ្លូវ១ខ្សែនេះជាប្រភេទផ្លូវបេតុងអាមេ មានប្រវែង៥៦៧ម៉ែត្រ និងមានទទឹង៦ម៉ែត្រ ស្ថាបនាដោយមូលនិធិស្រុក និងមូលនិធិឃុំឆ្នាំ២០២០ ។ លោកថា៖ដោយមើលឃើញពីការលំបាករបស់ប្រជាពលរដ្ឋ ក៏ដូចជាសាធារណៈជន ជាពិសេសបងប្អូនជនជាតិព្រៅ ក្នុងការប្រើប្រាស់ផ្លូវ១ខ្សែនេះ ដោយត្រូវឆ្លងកាត់ការលំបាកឡើងជំរាលភ្នំរអិលស្ទើរឡើងពុំរួច ពិបាកដឹកកសិផល សិស្សានុសិស្សពិបាកធ្វើដំណើរ ដូចនេះហើយទើបបានជាក្រុមប្រឹក្សាស្រុកសេសាន បានផ្តល់ទំនុកចិត្តអនុម័តរៀបចំគម្រោងសាងសង់ផ្លូវបេតុងនេះឡើង ជូនបងប្អូនប្រជាពលរដ្ឋទាំងអស់នៅក្នុងភូមិកាតូតនេះទាំងមូលបង្កលក្ខណៈងាយស្រួលក្នុងការធ្វើដំណើរ ។

ក្នុងឳកាសទទួលបានផ្លូវបេតុង១ខ្សែនេះ ប្រជាពលរដ្ឋជនជាតិដើមភាគតិចព្រៅ នៅភូមិកាតូតបាន សម្តែងនូវការសប្បាយរីករាយយ៉ាងខ្លាំង និងបានថ្លែងអំណរគុណដល់ថ្នាក់ដឹកនាំ ដែលបានផ្តល់ជូននូវសមិទ្ធិផលថ្មី១នេះ ។ ពួកគាត់បានថ្លែងថា ផ្លូវនេះពីមុនពិបាកធ្វើដំណើរទាំងប្រាំង និងវស្សា ពេលភ្លៀងរអិល ហើយខែប្រាំងដីហុយ ដើរក៏រអិល ជិះម៉ូតូក៏ពិបាក ក្រោយពីទទួលបានផ្លូវបេតុងនេះហើយ ពួកគាត់ស្រួលធ្វើដំណើរ ទាំងទៅទាំងមក ទាំងដឹកកសិផល ជាពិសេសសិស្សានុសិស្ស លែងមានឧបសគ្គក្នុងការធ្វើដំណើរទៅសិក្សានៅសាលា រៀនទៀតហើយ ៕ដេង ម៉ាវិន