ដោយ៖ម៉ាដេប៉ូ

ខេត្តព្រះវិហារ៖តំបន់គ្រប់គ្រងដែនជម្រកសត្វព្រៃស្រែកពក មានទីតាំងភូមិសាស្ត្រ ក្នុងខេត្តមណ្ឌលគិរី ដែលមានផ្ទៃដីសរុបជាង៣សែន៧ម៉ឺនហិកតាគឺជាតំបន់មួយដែលសម្បូរសក្តានុពលធម្មជាតិនិងទេសភាពដ៏ស្រស់ត្រកាលគួរជាទីទាក់ទាញផ្នែកទេសចរណ៍។

         នៅទីកន្លែងនេះអ្វីដែលជាចំណុចលេចធ្លោមួយទៀតនោះគឺទន្លេស្រែពកដែលសម្បូរទៅដោយត្រីច្រើនប្រភេទនិងពិសេសជាងនេះនៅមានសត្វក្រពើភ្នំដែលជាសត្វកម្រលើលោកទៀតផង។នៅតាមដងទន្លេកន្លែងនេះមានធនធានធម្មជាតិដ៏ស្រស់ត្រកាលបង្ហាញនូវគ្មានអ្នកបៀតបៀនឬចូលទៅបំផ្លាញនោះឡើយ។

          ទោះបីយ៉ាងណាតំបន់មួយនេះត្រូវបានគេចាត់បញ្ចូលជាតំបន់ស្នូលនៃតំបន់អភិរក្សធនធានធម្មជាតិមិនអនុញ្ញាតឱ្យពលរដ្ឋចូលបានឡើយ។ទីកន្លែងនេះមានតែមន្រ្តីឧទ្យានុរក្សនិងមន្រ្តីពាក់ព័ន្ធរួមគ្នាការពារព្រៃឈើនិងសត្វព្រៃ មិនឱ្យជនខិលខូចចូលបំផ្លិចបំផ្លាញប៉ុណ្ណោះ។

          ក្រុមមន្ត្រីឧទ្យានុរក្សនិងមន្រ្តីសត្វនុរក្សប្រចាំការនៅតំបន់ស្រែពកបានឱ្យដឹងថាក្នុងទន្លេស្រែពកសម្បូរទៅ ដោយត្រីគ្រប់ប្រភេទ ពិសេសត្រីក្អែកមានច្រើនបំផុត។នៅតាមទន្លេនេះគេគ្រាន់តែដាក់សន្ទូចឬបង់សំណាញ់តែបន្តិចនោះនឹងបានត្រីមកទុកបរិភោគមិនខ្វះឡើយ។

ក្រៅពីនេះទន្លេស្រែពកក៏ជាទីជម្រករបស់សត្វកម្រច្រើនប្រភេទក្នុងនេះរួមមានដូចជា៖ក្រពើភ្នំ ភេ អន្លង់ត្រីត្រសក់ សត្វស្វា ជាពិសេសតាមដងទន្លេនេះមានអមទៅដោយដើមឬស្សី ដើមឈើទាលយ៉ាងច្រើនដុះត្រៀបត្រាហាក់លម្អរតាមដងមាត់ទន្លេឱ្យរឹងរឹតតែស្រស់ស្អាតដើម្បីឱ្យអ្នកទេសចរទស្សនាមិនចេះនឿយហត់។

    ជាមួយគ្នានេះឯកឧត្តម នេត្រ ភក្រ្តា ជាមន្រ្តីនាំពាក្យនិងជារដ្ឋលេខាធិការក្រសួងបរិស្ថាន

និងថ្នាក់ដឹកនាំនៃអង្គការមូលនិធិសាកលសម្រាប់ធម្មជាតិ(WWF)ដែលបានដឹកនាំគណៈប្រតិភូចុះទស្សនកិច្ចតំបន់ជម្រកសត្វព្រៃស្រែពកកាលពីថ្មីៗមកនេះបានដឹងថាតាមការសិក្សាស្រាវជ្រាវបានបង្ហាញថានៅតាមដងទន្លេកន្លែងស្ងាត់ស្ងៀមមួយនេះមានវត្តមានដានក្រពើភ្នំនៅចន្លោះប្រមាណ២០ទៅ២៥ក្បាល។

ក្រៅពីនេះនៅតាមព្រៃដងមាត់ទន្លេគេឃើញវត្តមានសត្វពានរមួយចំនួនដូចជាស្វាព្រាម ស្វាស្រូវ សត្វកេងកង ស្មោញ និងវត្តមានក្អែកទឹកជាដើម។

       គួរបញ្ជាក់រាជរដ្ឋាភិបាលកម្ពុជា បានសម្រេចបែងចែកតំបន់គ្រប់គ្រង ដែនជម្រកសត្វព្រៃស្រែពក ជា៤តំបន់ គឺតំបន់ស្នូល តំបន់អភិរក្ស តំបន់ប្រើប្រាស់ដោយចីរភាព និងតំបន់សហគមន៍សម្រាប់ បម្រើដល់ការងារគ្រប់គ្រង ថែរក្សា អភិរក្ស និងអភិវឌ្ឍន៍សេដ្ឋកិច្ចសង្គម ប្រកបដោយនិរន្តរភាព៕