ភ្នំពេញ៖ រថយន្តបែនដឹកដីមួយគ្រឿងបុករះកង់បីឥណ្ឌានិងរថយ្តពីរគ្រឿងទៀត បណ្ដាលឲ្យមនុស្ស៣នាក់រងរបួសធ្ងន់ស្រាល ត្រូវបានរថយន្តសាមុយដឹកយកទៅមន្ទីរពេទ្យភ្លាមៗ។ ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៧ និង១០នាទីយប់ ថ្ងៃទី១៥ ខែកុម្ភៈ ឆ្នាំ២០២១ ស្ថិតនៅតាមបណ្ដោយផ្លូវ៥០ម៉ែត្រ ក្នុងសង្កាត់ដង្កោ ខណ្ឌដង្កោ រាជធានីភ្នំពេញ។

បើតាមប្រភពព័ត៌មាននៅកន្លែងកើតហេតុ បានឲ្យដឹងថា នៅមុនពេលកើតហេតុគេឃើញរថយន្តបែនដឹកដីមួយគ្រឿង ពណ៌ស ពាក់ស្លាក់លេខ ចង្កូតស្ដាំ PP-2760 ធ្វើដំណើរតាមបណ្ដោយផ្លូវ៥០ម៉ែត្រ ទិសដៅពីកើតទៅលិច ក្នុងល្បឿនលឿន ខណៈមកដល់ចំណុចកើតហេតុខាងលើត្រង់ចំណុចស្តុបបាគូ ស្រាប់តែជ្រុលទៅបុករះចំគូទកង់បីឥណ្ឌាមួយគ្រឿង ពណ៌ក្រហម ពាក់ស្លាកលេខ ភ្នំពេញ 1GS-6894 ចំពេញទំហឹងរួចរុញកង់បីឥណ្ឌាបន្តទៅបុករថយន្តម៉ាកព្រូសមួយគ្រឿង ពណ៌ទឹកប្រាក់ ពាក់ស្លាក់លេខ ភ្នំពេញ 2BA-4719 ដោយរថយន្តបង្កមិនទាន់អស់ល្បឿនក៏រួចរុញរថយន្តម៉ាកព្រូសបន្តកន្ទុយគ្នាទៅបុកផ្ទប់នឹងរថយន្តកុងតឺន័រមួយគ្រឿងទៀត ពណ៌លឿង ពាក់ស្លាក់លេខ ភ្នំពេញ 4A-0282 ចំពេញទំហឹងបណ្ដាលឲ្យកង់បីឥណ្ឌានិងរថយន្តម៉ាកព្រូសរងការខូចខាតយ៉ាងដំណំ និងបណ្ដាលឲ្យមនុស្ស៣នាក់រងរបួសធ្ងន់ស្រាល ត្រូវបានរថយន្តសាមុយដឹកយកទៅមន្ទីរពេទ្យភ្លាមៗ។ ចំណែកឯម្ចាស់តៃកុងរថយន្តបែនដឹកដី ជាអ្នកបង្ករបានរត់គេចខ្លួនបាត់ស្រមោលពីកន្លែងកើតហេតុភ្លាមៗតែម្តង។

ក្រោយពេលកើតហេតុ សមត្ថកិច្ចមូលដ្ឋានបានចុះមកដល់កន្លែងកើតហេតុ រួចបានទំនាក់ទំនងទៅសមត្ថកិច្ចជំនាញចរាចរណ៍ផ្លូវគោកឲ្យចុះមកធ្វើការវាស់វែងយករថយន្តបង្ក កង់បីឥណ្ឌានិងរថយន្តព្រូសរងគ្រោះយកទៅរក្សាទុកនៅស្នងការដ្ឋាននគរបាលរាជធានីភ្នំពេញរងចាំធ្វើការដោះស្រាយគ្នានៅពេលក្រោយ៕ ដោយ/ ឆៃហួត