YouTube ល្អឬមិនល្អសម្រាប់កូន អាស្រ័យលើការគ្រប់គ្រងឪពុកម្តាយ
កុមារ៖ អនុញ្ញាត ឬមិនអនុញ្ញាតឱ្យកុមារប្រើប្រាស់បណ្តាញសង្គម YouTube អាយុក្រោម 14 ឆ្នាំនៅតែប្រធានបទចម្រូងចម្រាសរបស់ឪពុកម្តាយនៅបណ្តាប្រទេសនីមួយៗទាំងប្រទេសអភិវឌ្ឍន៍ និងប្រទេសកំពុងអភិវឌ្ឍ។ ម្តាយឪពុកខ្លះយល់ឃើញថា YouTube បានជួយកូនតូចរបស់ពួកគេតាមរយៈវីដេអូអប់រំ កំសាន្តផ្តល់ចំណេះដឹង ប៉ុន្តែម្តាយឪពុកមួយចំនួនបែរជាយល់ថា វីដេអូនៅលើបណ្តាញសង្គមមួយនេះមិនគួរឱ្យកុមារនោះទេ។ ប៉ុន្តែសម្រាប់អ្នកជំនាញអប់រំកុមារវិញយល់ថា ប្រសិនបើអនុញ្ញាតឱ្យកុមារមើលវីដេអូ ទាមទារឱ្យម្តាយឪពុកគ្រប់គ្រងមាតិកាឱ្យបានល្អ។
លោកស្រីវេជ្ជបណ្ឌិត Free Hess ឯកទេសអប់រំកុមារ នៅសហរដ្ឋអាម៉េរិកមានប្រសាសន៍ថា វីដេអូនៅលើបណ្តាញសង្គមយូធូបមានមាតិកាជាច្រើនដែលកុមារមិនគួរមើល ដូចជា រូបភាពស្រើបស្រាលរបស់មនុស្ស ដំណឹងនិងព័ត៌មានអត្តឃាត និងព័ត៌មានរើសអើងពូជសាសន៍ជាដើម។ ដើម្បីដោះស្រាយបញ្ហានេះ អ្នកជំនាញអប់រំកុមារ បានលើកឡើងថា ម្តាយឪពុកគួរមានវិធីសាស្ត្រគ្រប់គ្រងការប្រើប្រាស់យូធូបរបស់កូន ប្រសើរជាងផ្តល់ឱកាសឱ្យកុមារមើលវីដេអូដោយសេរី ដែលនឹងផ្តល់ផលមិនល្អសម្រាប់កុមារទាំងបច្ចុប្បន្ន និងទៅអនាគត។
1. រៀបចំនិងបែងចែកពេលវេលាសម្រាប់កុមារមើលយូធូបឱ្យបានត្រឹមត្រូវ ៖ ត្រូវកំណត់ពេលវេលាឱ្យបានច្បាស់ពេលដែលផ្តល់ទូរស័ព្ទ ឬថេប្លេតដល់កូន ពិសេសម្តាយឪពុកត្រូវរាយការណ៍ (report) ទៅលើវីដេអូណាដែលពាក់ព័ន្ធទៅនឹងសកម្មភាពអវិជ្ជមាននៅលើយូធូប។
2. ពន្យល់ពីរូបភាពមិនគួរមើលដល់កូន ៖ ព្យាយាមនៅជិតកូនដោយពន្យល់ឱ្យបានច្បាស់លាស់ ថាហេតុអ្វីបានជាវីដេអូទាំងនោះមិនគួរមើល ឬចំណាយពេលមើល។
3. បិទទាំងកម្មវិធី YouTube ចេញពីទូរស័ព្ទ ឬស្មាតហ្វូន ៖ ម្តាយឪពុកត្រូវបិទ YouTube Kids កម្មវិធី YouTube ចេញពីថេប្លេត ស្មាតហ្វូន ឬឧបករណ៍ដែលកុមារមាន។ វាដូចជាអាក្រក់បន្តិច ប៉ុន្តែដើម្បីអនាគតកូនវាមិនមែនជាកំហុសធ្ងន់ធ្ងនោះទេ ព្រោះកុមារអាចមានជម្រើសលេងអ្វីផ្សេង។
4. អនុញ្ញាតឱ្យកុមារមើលយូធូប ប៉ុន្តែនៅក្បែរម្តាយឪពុក ៖ នេះជាជម្រើសរបស់ម្តាយឪពុក គួរឱ្យកុមារមើលយូធូបនៅទីតាំងទូលាយក្នុងផ្ទះ ដូចជាបន្ទប់ទទួលភ្ញៀវ ឬផ្ទះបាយដែលកៀកនឹងឪពុកម្តាយ ឬមនុស្សពេញវ័យ។
5. ចំណាយពេលមើលយូធូបជាមួយកុមារ ៖ ធ្វើបែបនេះប្រៀបដូចជាគ្រប់គ្រងការសកម្មភាពរបស់កូន និងជួយឱ្យកូនចាប់អារម្មណ៍ទៅលើមាតិកាដែលអ្នកគិតថាមានប្រយោជន៍សម្រាប់ពួកគេ។
គួរបញ្ជាក់ដែរថា ដោយគិតទៅដល់អ្នកទស្សនាវីដេអូរបស់ខ្លួនជាកុមារ កាលពីឆ្នាំ 2015 យូធូបក៏បានបង្កើតប៉ុស្តិ៍សម្រាប់កុមារឡើង ឬ YouTube Kids ប៉ុន្តែមិនទាន់ទូលំទូលាយឡើយ។ សម្រាប់អ្នកជំនាញអប់រំកុមារ ការទស្សនាយូធូបមានពេលកំណត់ជាក់លាក់នឹងជួយដល់កុមារបានច្រើន ប៉ុន្តែវាស្ថិតនៅលើការគាំទ្រនិងគ្រប់គ្រងពីឪពុកម្តាយរបស់គេ៕