ក្នុងខែមីនានេះសែលកាតបានឈ្នះពានរង្វាន់អន្តរជាតិចំនួនបួនបន្ថែមទៀត
ដោយ៖ម៉ាដេប៉ូ
រាជធានីភ្នំពេញ៖សែលកាត ទទួលបានពានរង្វាន់អន្តរជាតិប្រចាំខែមីនានេះចំនួនបួនបន្ថែមទៀតសម្រាប់ឆ្នាំនេះ
។ ក្រុមហ៊ុនមួយនេះបានទទួលស្គាល់ និងការគាំទ្រពីបណ្តាញទូរគមនាគមន៍ និងបច្ចេកវិទ្យាព័ត៌មាននិងគមនាគមន៍ សកល ជាមួយនឹងពានរង្វាន់ដ៏មានកិត្យានុភាពថ្មីចំនួនបួន។
ចំពោះពានរង្វាន់ទាំងនេះរួមមាន៖១)“ស្ថាប័នផ្តល់សេវាបណ្តាញទូរស័ព្ទចល័តឆ្នើមជាងគេបំផុត” ពីទស្សនាវដ្តីហិរញ្ញវត្ថុអន្តរជាតិ (International Finance Magazine) ដែលមានមូលដ្ឋាននៅឌូបៃ។២)“ឧត្តមភាពក្នុងវិស័យទូរគមនាគមន៍” ដែលជាពានរង្វាន់ផ្តល់ជូនទៅកាន់លោក ចន ចន ណេវ៉ល (Jon Jon Naval) ប្រធានផ្នែកបច្ចេកវិទ្យារបស់សែលកាត ដោយ Global Brands Magazine របស់ចក្រភពអង់គ្លេស។៣)“ប្រតិបត្តិករទូរគមនាគមន៍ផ្តល់នូវទំនុកចិត្តខ្ពស់បំផុត” ដែលពានរង្វាន់នេះគឺជាការទទួលបានលើកទីបី និងត្រូវបានផ្តល់ជូនដោយ Global Brands Magazine។៤)“ស្ថាប័នផ្តល់សេវាបណ្តាញទូរស័ព្ទចល័តឆ្នើមជាងគេបំផុត” ដោយ Global Economics Magazine របស់ចក្រភពអង់គ្លេស។
នាយកប្រតិបត្តិក្រុមហ៊ុនសែលកាត លោក អៀន វ៉ាតសុន (Ian Watson) បានឱ្យដឹង ថា ពានរង្វាន់ទាំងនេះគឺជាសក្ខីភាពនៃកិច្ចខិតខំប្រឹងប្រែងជាបន្តបន្ទាប់របស់ក្រុមហ៊ុនសែលកាត ក្នុងការផ្តល់ជូនអតិថិជននូវសេវាកម្មកម្រិតពិភពលោក និងប្រតិបត្តិការប្រកបដោយប្រសិទ្ធភាពខ្ពស់បំផុត។
លោកថា“យើងសូមថ្លែងអំណរគុណដល់សហគមន៍អន្ដរជាតិ ចំពោះការទទួលស្គាល់នូវរាល់កិច្ចខិតខំប្រឹងប្រែងទាំងអស់របស់យើង។ នៅក្នុងគ្រាដ៏លំបាកនេះ ពួកយើងបានខិតខំរក្សាប្រតិបត្ដិការ និងសេវាកម្មរបស់យើងឱ្យដំណើរការដូចប្រក្រតី ហើយទន្ទឹមនឹងនោះក៏អនុវត្តបានយ៉ាងខ្ជាប់ខ្ជួននូវគោលការណ៍សុវត្ថិភាព ដើម្បីរក្សាសុខសុវត្ថិភាពជូនដល់អតិថិជន និងនិយោជិករបស់យើងផងដែរ”។
គួរបញ្ជាក់ថា ការប្រកាសនូវការទទួលពានរង្វាន់ទាំងនេះ ត្រូវបានធ្វើឡើង បន្ទាប់ពីសែលកាតបានធ្វើបទបង្ហាញដ៏អស្ចារ្យបំផុតមួយ នៅក្នុងព្រឹត្តិការណ៍ Mobile World Congress Shanghai កាលពីសប្តាហ៍កន្លងទៅនេះ ដើម្បីចែករំលែកនូវចក្ខុវិស័យរបស់ក្រុមហ៊ុនរ៉ូយ៉ាល់គ្រុប និងក្រុមហ៊ុនសែលកាត ក្រោមប្រធានបទ “ទីក្រុងឆ្លាតវៃនៅកម្ពុជា”។
បទបង្ហាញនេះ ទទួលបាននូវការកោតសរសើរជាខ្លាំងពីសហគមន៍ទូរគមនាគមន៍ពិភពលោក និង MWC ដោយក្នុងនោះ គេក៏ឃើញមាននូវវត្តមានចូលរួមពីសំណាក់ថ្នាក់ដឹកនាំ និងអ្នកជំនាញបច្ចេកវិទ្យាគមនាគមន៍និងព័ត៌មាន រាប់ពាន់នាក់ផងដែរ៕
