លោក ចូ បៃដិន និយាយថា វានឹងជារឿងលំបាកសម្រាប់លោក ក្នុងការបំពេញតាមកាលកំណត់នៅថ្ងៃទី១ ខែឧសភា ដើម្បីដកកងទ័ពចេញពីអាហ្វហ្គានីស្ថាន
អាមេរិក៖ ប្រធានាធិបតីអាមេរិកលោក ចូ បៃដិន បាននិយាយនៅក្នុងបទសម្ភាសន៍មួយ ដែលត្រូវបានចាក់ផ្សាយនៅថ្ងៃពុធនេះថា វានឹងជាការលំបាកសម្រាប់រូបលោក ក្នុងការបំពេញតាមកាលបរិច្ឆេតកំណត់ គឺនៅថ្ងៃទី១ ខែឧសភាខាងមុខ ក្នុងការដកកងទ័ពចុងក្រោយចេញពីប្រទេសអាហ្វហ្គានីស្ថាន ដើម្បីបិទបញ្ចប់សង្គ្រាមដ៏វែងបំផុតរបស់សហរដ្ឋអាមេរិក ។
ការអត្ថាធិប្បាយរបស់លោក បៃដិន ប្រាប់ដល់សារព័ត៌មាន ABC News ត្រូវបានធ្វើឡើងដោយគិតដល់កាលបរិច្ឆេតកំណត់ ដែលបានព្រមព្រៀងជាមួយក្រុមឧទ្ទាមតាលីបង់នាពេលកន្លងមក ស្ថិតក្រោមរដ្ឋបាលអតីតប្រធានាធិបតីអាមេរិកលោក ដូណាល់ ត្រាំ កាលពីខែកុម្ភៈ ឆ្នាំ២០២០ ។ ហើយកិច្ចសម្ភាសន៍របស់លោកដែលត្រូវបានចាក់ផ្សាយខាងលើនេះបានកើតមានឡើងមួយថ្ងៃ មុនពេលដែលប្រទេសរុស្ស៊ី, ចិន, សហរដ្ឋអាមេរិក និង ប៉ាគីស្ថាន ព្រមទាំងក្រុមប្រតិភូនៃមន្រ្តីកំពូលៗមកពីអាហ្វហ្គានីស្ថាន, មេដឹកនាំបក្សប្រឆាំង និងក្រុមអ្នកចរចារបស់ពួកឧទ្ទាមតាលីបង់គ្រោងបើកកិច្ចប្រជុំរួមគ្នាមួយនៅក្នុងរដ្ឋធានីម៉ូស្គូ ក្នុងគោលបំណងដើម្បីចាប់ផ្តើមកិច្ចចរចាសន្តិភាពដែលបានជាប់គាំងកន្លងមក ។
យ៉ាងណាមិញ មន្រ្តីអាមេរិកមួយចំនួន និងអ្នកជំនាញជាច្រើនបានបង្ហាញការព្រួយបារម្ភថា ប្រសិនបើកងកម្លាំងអន្តរជាតិដែលដឹកនាំដោយអាមេរិកដកកងកម្លាំង មុនពេលដែលកិច្ចព្រមព្រៀងមួយឈានដល់ការប្រកាសជាផ្លូវការនោះ ប្រទេសអាហ្វហ្គានីស្ថានអាចនឹងធ្លាក់ទៅក្នុងភ្លើងសង្គ្រាមស៊ីវិលសាជាថ្មី និងអាចផ្តល់អោយក្រុមភេវរករអាល់កៃដា នូវទីជម្រកថ្មីមួយ ៕ ប្រភព៖ AP
