អ្នកនាំពាក្យក្រសួងយុត្តិធម៌បញ្ជាក់ថា បុគ្គលដែលបំផុសគេមិនឱ្យទៅចាក់វ៉ាក់សាំងការពារCovid19 ប្រឈមជាប់ពន្ធនាគារពី ៦ខែ ទៅ៣ឆ្នាំ និងពិន័យជាប្រាក់ពី ២លានរៀល ទៅ ១០លានរៀល
ឯកឧត្តម គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានលើកឡើងថា បុគ្គលដែលបំផុសកម្មករមិនឱ្យទៅចាក់វ៉ាក់សាំងកូវីដ១៩ ជាទង្វើរារាំងដល់ការអនុវត្តវិធានការរបស់អាជ្ញាធរ ដែលជាអំពើល្មើសច្បាប់។ បទល្មើសនេះ នឹងត្រូវផ្តន្ទាទោសដាក់ពន្ធនាគារពី ៦ខែ ទៅ៣ឆ្នាំ និងពិន័យជាប្រាក់ពី ២លានរៀល ទៅ ១០លានរៀល។
ឯកឧត្តម គឹម សន្តិភាព បានចេញមករំលឹកបែបនេះ បន្ទាប់ពីមានបុរសម្នាក់បានចេញសារញុះញង់មិនឱ្យកម្មករទៅចាក់វ៉ាក់សាំង ការពារCovid19 តាមបណ្តាញ Tik Tok។
ឯកឧត្តម បានបញ្ជាក់នៅលើ Facebook នៅថ្ងៃទី២៤ ខែមីនា ថា៖ «ដោយមិនទាន់គិតអំពីបទល្មើសព្រហ្មទណ្ឌផ្សេងទៀត បុគ្គលណាដែលបានរារាំងតាមគ្រប់មធ្យោបាយក្នុងចេតនាមិនឱ្យបុគ្គលដទៃ ទៅទទួលការចាក់វ៉ាក់សាំង គឺជាអំពើល្មើសច្បាប់ដែលកំណត់បានជាបទល្មើស (រារាំងដល់ការអនុវត្តវិធានការ) តាមប្បញ្ញត្តិក្នុងមាត្រា១១ នៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ដែលត្រូវ ផ្តន្ទាទោស ដាក់ពន្ធនាគារពី៦ខែ ទៅ ៣ឆ្នាំ និងពិន័យជាប្រាក់ពី ២,០០០,០០០រៀល ទៅ ១០,០០០,០០០លានរៀល»។
ឯកឧត្តម បន្ថែមថា ការរារាំងដល់ការអនុវត្តវិធានការនេះ បើមានការចម្លងកូវីដ១៩ ទៅអ្នកដទៃទៀតនោះ បុគ្គលនេះ នឹងត្រូវផ្តន្ទាទោសដាក់ពន្ធនាគារពី ២ឆ្នាំ ទៅ ៥ឆ្នាំ និងពិន័យជាប្រាក់ពី ៥លានរៀល ទៅ ២០លានរៀល ។
ឯកឧត្តម គឹម សន្តិភាព បានបញ្ជាក់ដែរថា ការផ្តល់វ៉ាក់សាំង ជូនប្រជាពលរដ្ឋ គឺជាវិធានការមួយនៃវិធានការសុខាភិបាល ដែលបានដាក់ចេញដោយអាជ្ញាធរ មានសមត្ថកិច្ច។
សូមជម្រាបថា នៅព្រឹកថ្ងៃទី២៤ ខែមីនា ឆ្នាំ២០២១នេះ មន្រ្តីជាន់ខ្ពស់នៃអគ្គស្នងការដ្ឋាននគរបាលជាតិ បានថ្លែងថា បុគ្គលដែលប្រឌិតព័ត៌មានរឿងចាក់វ៉ាក់សាំង ប្រឆាំងជំងឺកូវីដ-១៩របស់ចិន ហើយបង្ហោះចែកចាយនៅលើបណ្ដាញសង្គម TikTok ដើម្បីបំភ័យកម្មករកុំឱ្យចាក់នោះ ត្រូវកម្លាំងនគរបាលស្រាវជ្រាវចាប់ខ្លួនបានហើយ។
ការចាប់ខ្លួននេះបានធ្វើឡើងនៅស្រុកកំពង់ត្រឡាច ខេត្តកំពង់ឆ្នាំង ខណៈជននេះកំពុងបើកឡានចូលមករាជធានីភ្នំពេញ។ ក្រោយចាប់ខ្លួនជនសង្ស័យ ត្រូវបានបញ្ជូនទៅកាន់អគ្គស្នងការដ្ឋាននគរបាលជាតិ ដើម្បីធ្វើការសួរនាំ និងចាត់វិធានការតាមផ្លូវច្បាប់៕
