សមត្ថកិច្ចចាប់ឃាត់ខ្លួនមនុស្ស៦នាក់ពាក់ព័ន្ធករណីដឹកជញ្ជូនជនជាតិចិន គេចចេញពីកន្លែងចត្តាឡីស័កនៅខេត្តព្រះសីហនុ មកភ្នំពេញ
ការចាប់ឃាត់ខ្លួននោះគឺបានធ្វើឡើងកាលពីរសៀលថ្ងៃទី៣១ ខែមីនា ឆ្នាំ២០២១ ស្ថិតក្នុងភូមិ ស្ទឹងឆាយ ឃុំកំពង់សីលា ក្រោយពួកគេបានលួចគេចចេញពីការធ្វើចត្តាឡីស័កនៅខេត្តព្រះសីហនុ ឆ្ពោះទៅភ្នំពេញ។របាយការណ៍របស់ស្នងការដ្ឋាននគរបាលខេត្តព្រះសីហនុ បានឲ្យដឹងថាជនសង្ស័យទាំង៦នាក់ រួមមានឈ្មោះអ៊ឹង សេងល័ង អាយុ៣៨ឆ្នាំ មុខរបរ អ្នកបកប្រែភាសាចិន និងអ្នកម៉ៅការដឹកគ្រោះក្រហមការដ្ឋានផ្លូវល្បឿនលឿន, ឈ្មោះ រ៉ា វណ្ណះ អាយុ៣១ឆ្នាំ មុខរបរ មិនពិតប្រាកដ ឈ្មោះ Deng YuXin (តឹង អ៊ីស៊ីវ ) អាយុ២៣ឆ្នាំ ជនជាតិចិន , ឈ្មោះ WANG RUI (វ៉ាង រួយ) អាយុ២៨ឆ្នាំ ជនជាតិចិន ,ឈ្មោះ Fang Chao (ហ្វាង ឆាវ) អាយុ៣៥ឆ្នាំ ជនជាតិចិន ,និងឈ្មោះ Zhang JinJun (ចាង ជិនជុន) អាយុ៣៧ឆ្នាំ ។ របាយការណ៍របស់ស្នងការដ្ឋាននគរបាលខេត្តព្រះសីហនុ អោយដឹងថា កម្លាំងសមត្ថកិច្ចបានឃាត់បានរថយន្ត១គ្រឿង ម៉ាកកូរូឡា ពណ៌ទឹកប៊ិច ផ្លូវបត់ចូលផ្លូវល្បឿនលឿនស្ថិតក្នុងភូមិ ស្ទឹងឆាយ ឃុំកំពង់សីលា ក្រោយពួកគេបានលួចគេចចេញពីការធ្វើចត្តាឡីស័កនៅខេត្តព្រះសីហនុ មកភ្នំពេញ។ ក្នុងរថយន្តមានគ្នា៥នាក់ ក្នុងនោះមានបុរសជនជាតិខ្មែរ១នាក់ និងបុរសជនជាតិចិន៤នាក់ មានពាក់ឯកសណ្ឋានបន្លំធ្វើជាក្រុមការងារផ្លូវល្បឿនលឿន ។
សមត្ថកិច្ចបានធ្វើការសាកសួរបុរសជនជាតិខ្មែរម្នាក់ដែលជាអ្នកបើកបររថយន្ត និងបានសារភាពថា ខ្លួនធ្វើតាមបញ្ជារបស់មេក្លោងបុរសជនជាតិខ្មែរម្នាក់ទៀត។ បន្ទាប់ពីសាកសួររួច សមត្ថកិច្ចបានធ្វើការស្រាវ រហូតឈានដល់ការឃាត់ខ្លួនបានបុរសជនជាតិខ្មែរ ដែលជាមេក្លោងយកមកកាន់ស្នងការដ្ឋាននគរបាលខេត្តព្រះសីហនុ ដើម្បីបន្តនិតិវិធី។
សមត្ថកិច្ចបានអោយដឹងថា បុរសជនសង្ស័យជាតិខ្មែរដែលមេក្លោង បានសារភាពថា ខ្លួនធ្លាប់ដឹកជនជាតិចិន ពីភ្នំពេញមកខេត្តព្រះសីហនុ ចំនួន៣លើករួចមកហើយ។
ចំពោះជនសង្ស័យជនជាតិចិនទាំង៤នាក់ បានសារភាពថា ពួកខ្លួនបានធ្វើចត្តាឡីស័ករួចហើយ ប៉ុន្តែពុំមានឯកសារភ្ជាប់មកជាមួយឡើយ ហើយពួកគេមានបំណងទៅភ្នំពេញ រួចបន្តដើម្បីត្រលប់ទៅប្រទេសចិនវិញ។ បច្ចុប្បន្នជនសង្ស័យជាតិខ្មែរទាំង២នាក់ត្រូវបានសមត្ថកិច្ច កសាងសំណុំរឿងបញ្ជូនទៅកាន់តុលាការ, ហើយសម្រាប់ជនជាតិចិនទាំង៤នាក់នោះត្រូវបានរៀបចំការបណ្តេញចេញពីប្រទេសកម្ពុជា។
យោងតាមច្បាប់ថ្មីរបស់រាជរដ្ឋាភិបាល អ្នកធ្វើដំណើរគេចវេសពីចត្តាឡីស័ក នឹងត្រូវ ប្រឈមការផាកពិន័យពីមួយ លាន ទៅ៥លានរៀល, ចំណែកមេខ្យល់, អ្នកផ្តួចផ្តើមគំនិត, ដឹកនាំ, ណែនាំ ឬបញ្ចុះ បញ្ចូលជួយសម្រួលដោយចេតនា នាំគេចវេស ពីចត្តាឡីស័ក នឹងត្រូវប្រឈមការផាកពិន័យពី១០លានដល់ ៥០ លានរៀល៕