តាមដងផ្លូវក្នុងរាជធានីភ្នំពេញ កាលយប់មិញភាពស្ងប់ស្ងាត់ ក្រោយអាជ្ញាធរ ដាក់ បម្រាមគោចរ
នៅយប់ថ្ងៃទី១ និងឈានចូលថ្ងៃទី២ ខែមេសា ឆ្នាំ ២០២១ ទិដ្ឋភាពតាមដងផ្លូវនានា ក្នុងរាជធានីភ្នំពេញ មានការស្ងប់ស្ងាត់ ក្រោយពេលអាជ្ញាធរដាក់បម្រាមគោចរ និងហាមជួបជុំ ក៏ដូចជាទទួលទានអាហារ និងភេសជ្ជៈ នៅហាងនានា ចាប់ពីម៉ោង៨យប់ ដល់ម៉ោង៥ភ្លឺរយៈពេល ២សប្តាហ៍ ដែលក្នុងនោះមានការសហការ ដោយប្រជាពលរដ្ឋមានយល់ដឹង និង ការពារខ្ពស់បំផុត ដើម្បីចូលរួមអនុវត្តបម្រាមគោចរ របស់រដ្ឋបាលរាជធានីភ្នំពេញ ដើម្បីទប់ស្កាត់ការឆ្លងរីករាលដាលនៃជំងឺកូវីដ-19។
ដោយស្ថានភាពនេះធ្វេីទៅបានគឺកម្លាំងសមត្ថកិច្ចគ្រប់ជាន់ថ្នាក់បានអនុវត្តតាមបទបញ្ជារបស់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ សេចក្តីសម្រេចរបស់ឯកឧត្តម ឃួង ស្រេង គណ:អភិបាលរាធានីភ្នំពេញ និងបទបញ្ជាដោយផ្ទាល់របស់ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ហេីយនៅវេលាម៉ោង ០៨:០០នាទីយប់ ថ្ងៃទី១ ខែមេសា ឆ្នាំ២០២១ លោកឧត្តមសេនីយ៍ត្រី តឹង សុធី ស្នងការរង បានត្រួតពិនិត្យកម្លាំងអន្តរាគមន៍ពិសេស ដើម្បីចូលរួមប្រជុំជួរ និងចេញល្បាតក្នុងភូមិសាស្ត្ររាជធានីភ្នំពេញ ជាពិសេសដើម្បីចុះផ្សព្វផ្សាយណែនាំអប់រំប្រជាពលរដ្ឋអំពីសេចក្តីសម្រេចរបស់សាលារាជធានីភ្នំពេញ ផងដែរ ។
ឧត្តមសេនីយ៍ឯក ស ថេត បានថ្លែងថា ចំពោះបុគ្គលដែលមិនមានបញ្ជាក់ក្នុងសេចក្តីសម្រេចរបស់សាលារាជធានីភ្នំពេញ ចុះថ្ងៃទី០១ ខែមេសា ឆ្នាំ២០២១ គឺមិនអនុញ្ញាតឲ្យធ្វេីដំណេីរចេញពីផ្ទះ ចាប់ពីម៉ោង ៨:០០នាទីយប់ ដល់ម៉ោង ០៥:០០នាទីភ្លឺបានឡេីយ ។
គួរកត់សម្គាល់ តាមដងផ្លូវដែលធ្លាប់មានមនុស្សច្រើនកុះករ បានប្រែជាស្ងប់ស្ងាត់ ដោយសារតែប្រជាពលរដ្ឋចូលរួមអនុវត្តវិធានការ ដែលដាក់ចេញដោយអាជ្ញាធរមូលដ្ឋាន ដើម្បីប្រយុទ្ធប្រឆាំងនឹងជំងឺកូវីដ១៩ ជាពិសេសព្រឹត្តិការណ៍សហគមន៍២០កុម្ភៈតែម្តង។ បន្ថែមពីនេះក្រៅពីនៅតាមដងផ្លូវ នៅតាមទីប្រជុំជនភាគច្រើន ពុំមានមនុស្សកកកុញដូចមុនដែរ នាពេលរាត្រីនេះ។
ចំណែកបងប្អូនប្រជាពលរដ្ឋដែលប្រកបមុខរបរអាជីវកម្ម បើកហាងភោនីយដ្ឋាន និង ទំនិញនានា ក៏ចូលរួមជាមួយអាជ្ញាធរ ដើម្បីប្រយុទ្ធប្រឆាំងនឹងជំងឺកូវីដ១៩ ជាពិសេសព្រឹត្តិការណ៍សហគមន៍២០កុម្ភៈតែម្តង ដោយបិទហាងនៅវេលាម៉ោង៨យប់ រហូតដល់ម៉ោង ៥ទាប់ភ្លឺ តែបើលក់គឺលក់បែបវេចខ្ចប់ដែរ។
ដោយឡែកក្រុមហ៊ុនដឹកជញ្ជូនម្ហូបអាហា គឺមិនស្ថិតក្នុងបម្រាមគោចររបស់រដ្ឋបាលរាជធានីភ្នំពេញនោះទេ គឺពួកគាត់អាចធ្វើដំណើតាមដងផ្លូវនានាក្នុងរាជធានីភ្នំពេញ ក្នុងការដឹកជញ្ជូនម្ហូបអាហារជូនប្រជាពលរដ្ឋបានដោយធម្មតា ដោយប្រកាន់ភ្ជាប់នូវ កាតសម្គាល់ រួមទាំងឯកសណ្ឋានរបស់ក្រុមហ៊ុនដឹកជញ្ជូន ៕ ដោយ ៖ ជីម ភារ៉ា