អឺរ៉ុប៖ ខណៈ AstraZeneca ជួបបញ្ហាកំណកឈាម ប្រទេសខ្លះគិតគូចាក់វ៉ាក់សាំងលាយគ្នា រវាងដូសទី១និងទី២
បណ្តាប្រទេសក្នុងទ្វីបអឺរ៉ុបកំពុងពិចារណាចាក់វ៉ាក់សាំងកូវីដ១៩ ២ប្រភេទផ្សេងគ្នា សម្រាប់ដូសទី១និងដូសទី២ ចំពោះអ្នកដែលបានចាក់វ៉ាក់សាំង AstraZeneca បានម្តងរួចរាល់នោះ ព្រោះថា កំពុងមានចម្រូងចម្រាស់រឿងវ៉ាក់សាំង AstraZeneca របស់អង់គ្លេសនេះធ្វើឲ្យមានកំណកឈាមកម្រទៅលើអ្នកដែលបានចាក់រួច នេះបើតាមការចេញផ្សាយរបស់ទីភ្នាក់ងារសារព័ត៌មាន CNA។
កម្មវិធីចាក់វ៉ាក់សាំង AstraZeneca ត្រូវបានរំខានបន្ទាប់ពីមានរបាយការណ៍ខ្លះៗដេលថា អ្នកចាក់វ៉ាក់សាំងអង់គ្លេសនេះមានបញ្ហាកំណកឈាមជាបន្តបន្ទាប់ នាំឲ្យបណ្តាប្រទេសមួយចំនួនលើពិភពលោកបានផ្អាការប្រើប្រាស់វ៉ាក់សាំងនេះសិន។
មន្ត្រីជាន់ខ្ពស់របស់ទីភ្នាក់ងារវេជ្ជសាស្ត្រអឺរ៉ុបហៅកាត់ថា EMA បាននិយាយក្នុងបទសម្ភាសន៍មួយ កាលពីថ្ងៃអង្គារ៍ថា ពិតជាមានទំនាក់ទំនងគ្នារវាងវ៉ាក់សាំងនិងកំណកឈាមកម្រក្នុងខួរក្បាល ប៉ុន្តែមូលហេតុពិតប្រាកដមិនទាន់ត្រូវបានដឹងទេ។ ក្រោយមក ស្ថាប័ន EMA នេះបាននិយាយថា ការត្រួតពិនិត្យវ៉ាក់សាំងនៅតែបន្តធ្វើ ហើយខ្លួននឹងផ្តល់ព័ត៌មានផ្លូវការចំពោះការស៊ើបអង្កេតនេះ នាថ្ងៃព្រហស្បត៍នេះ៕
