សែលកាតផ្គត់ផ្គង់សេវាទូរស័ព្ទឥតគិតថ្លៃដល់ក្រសួងពាណិជ្ជកម្ម ដើម្បីជួយដឹកជញ្ជូនទំនិញនៅក្នុង ”តំបន់ក្រហម”
រាជធានីភ្នំពេញ៖ ក្រុមហ៊ុន សែលកាតនៅថ្ងៃ ទី៦ ខែ ឧសភា នេះ បានសហការជាមួយក្រសួងពាណិជ្ជកម្ម ក្នុងការផ្តល់ជូននូវ ប្រព័ន្ធសេវាអតិថិជនទាន់ហេតុការណ៍ (Customer Service Hotline) ដើម្បីជួយសម្របសម្រួលដល់ការដឹកជញ្ជូនស្បៀងអាហារជាបន្ទាន់ ជូនដល់ក្រុមគ្រួសារដែលកំពុងរស់នៅក្នុងតំបន់ក្រហម។
សម្រាប់សេវាអតិថិជនទាន់ហេតុការណ៍នេះ នឹងដើរតួយ៉ាងសំខាន់ក្នុងការជួយសម្រួលដល់ប្រជាពលរដ្ឋដែលត្រូវការបញ្ជាទិញស្បៀងអាហារ ដែលមានផ្តល់ជូននៅលើហាងអនឡាញរបស់ក្រសួងពាណិជ្ជកម្ម៖ shop.moc.gov.kh។ប្រព័ន្ធ Cloud PBX និងឧបករណ៍ទូរស័ព្ទ គឺត្រូវបានផ្តល់ជូនទៅកាន់ក្រសួងពាណិជ្ជកម្ម ដោយក្រុមហ៊ុនសែលកាតដោយឥតគិតថ្លៃ។
លោក អៀន វ៉ាតសុន (Ian Watson) នាយកប្រតិបត្តិក្រុមហ៊ុនសែលកាត បានឱ្យដឹងថា សេវាអតិថិជនទាន់ហេតុការណ៍ គឺជាជម្រើសដ៏ចាំបាច់បំផុតមួយ សម្រាប់ពលរដ្ឋដែលត្រូវការបញ្ជាទិញទំនិញតាមរយៈទូរស័ព្ទ ហើយទូទាត់ជាសាច់ប្រាក់។
លោកថា“មិនមែនមនុស្សគ្រប់គ្នា ជាពិសេសមនុស្សចាស់ សុទ្ធតែចេះទិញទំនិញតាមអនឡាញ និងបង់ប្រាក់តាមប្រព័ន្ធឌីជីថលនោះឡើយ ដូច្នេះយើងត្រូវតែធានាឱ្យបានថា ពលរដ្ឋគ្រប់រូប គឺទទួលបាននូវឱកាសក្នុងការទិញទំនិញដូចៗគ្នា”។
លោក វ៉ាតសុន បានប្រាប់ដែរថា៖ “ប្រព័ន្ធសែលកាត បានភ្ជាប់មកជាមួយនូវខ្សែទំនាក់ទំនងចំនួន១០ ដែលមានសមត្ថភាពអាចទទួលការហៅចូលដើម្បីបញ្ជាទិញទំនិញ ក្នុងចំនួនច្រើនក្នុងពេលតែមួយ ពោលគឺផ្តល់ជូននូវការសម្របសម្រួលបានឆាប់រហ័ស និងមានប្រសិទ្ធភាពបំផុត”។
លោកបានបន្ថែមថា ខណៈដែលករណីឆ្លងនៅមានច្រើននៅក្នុងរាជធានីភ្នំពេញ ក្រុមហ៊ុនដែលកំពុងប្រកបអាជីវកម្ម និងអាជ្ញាធរ ចាំបាច់ត្រូវធ្វើការរួមគ្នា ដើម្បីជួយប្រយុទ្ធប្រឆាំងនឹងការរីករាលដាលនេះ ប៉ុន្តែទន្ទឹមនឹងនោះ ក៏ត្រូវជួយទៅដល់ក្រុមគ្រួសារដែលកំពុងរស់នៅក្នុងតំបន់ដែលមានការរឹតត្បិតខ្លាំង តាមរយៈការផ្តល់ជូននូវអាហារ និងសម្ភារៈប្រើប្រាស់ផ្សេងៗឱ្យបានគ្រប់គ្រាន់ផងដែរ។
ពាក់ព័ន្ធក្នុងរឿងនេះឯកឧត្តម ប៉ាវ ហេងតារា រដ្ឋលេខាធិការក្រសួងពាណិជ្ជកម្ម និងជាតំណាង ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានថ្លែងអំណរគុណដល់ក្រុមហ៊ុនសែលកាត ចំពោះការផ្តល់ជូននូវវិភាគទានសប្បុរសធម៌ ចំពោះបុព្វហេតុនេះ។
លោកបានមានប្រសាសន៍ថា“យើងសូមថ្លែងអំណរគុណយ៉ាងជ្រាលជ្រៅចំពោះការបរិច្ចាគរបស់ក្រុមហ៊ុនរ៉ូយ៉ាល់គ្រុប និងក្រុមហ៊ុនសែលកាត ជាពិសេសអ្នកឧកញ៉ា គិត ម៉េង និងលោកជំទាវ ម៉ៅ ចំណាន ដែលបានជួយដល់ប្រជាពលរដ្ឋរស់នៅក្នុងតំបន់ក្រហម ឱ្យទទួលបាននូវស្បៀងអាហារ និងរបស់របរប្រើប្រាស់ផ្សេងៗទៀតបានឆាប់រហ័ស និងកាន់តែងាយស្រួលជាងមុន”។
គួរបញ្ជាក់ថាការឧបត្ថម្ភ នេះ ត្រូវបានធ្វើឡើង បន្ទាប់ពីក្រុមហ៊ុនសែលកាត បានបញ្ចប់ការពង្រីកបណ្តាញរបស់ខ្លួននាពេលថ្មីៗនេះ ចំនួន១៦៩ទីតាំងទៀត ដើម្បីកែលម្អបណ្តាញគ្របដណ្តប់ និងគុណភាពសេវានៅតាមតំបន់ក្រហម និងពណ៌លឿងទុំក្នុងរាជធានីភ្នំពេញ៕