ប្រជាពលរដ្ឋ រងគ្រោះដោយខ្យល់កន្ត្រាក់បណ្តាលឲ្យខូចខាតផ្ទះសំបែង ចំនួន ១៨០គ្រួសារ នៅខេត្តកំពង់ចាម ទទួលអំណោយពីកាកបាទក្រហមកម្ពុជា
ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងជាប្រធានគណៈកម្មាធិការសាខាកាកបាទក្រហមខេត្ត ឯកឧត្តម ខ្លូត ផន ប្រធានក្រុមប្រឹក្សាខេត្ត អាជ្ញាធរមូលដ្ឋាន នៅថ្ងៃទី០៧ ខែ ឧសភា ឆ្នាំ២០២១ បានអញ្ជើញសួរសុខទុក្ខ និងនាំយកអំណោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ចែកជូនប្រជាពលរដ្ឋ ដែលរងគ្រោះដោយខ្យល់កន្ត្រាក់បណ្តាលឲ្យខូចខាតផ្ទះសំបែង ចំនួន ៩០គ្រួសារ នៅស្រុកព្រៃឈរ ១០គ្រួសារ និងស្រុកកងមាស ៨០គ្រួសារ។
ឯកឧត្តម អ៊ុន ចាន់ដា អភិបាលខេត្ត បានផ្តាំផ្ញេីដល់បងប្អូនប្រជាពលរដ្ឋ ឲ្យយកអំណោយ ដែលទទួលបានក្នុងឱកាសនេះ ទៅជួសជុលកសាងផ្ទះឡើងវិញនឹងត្រូវបន្តប្រកបមុខរបរទទួលទាន និងធ្វើការបង្កបង្កើនផល ឲ្យទាន់រដូវវស្សានេះផងដែរ។ ឯកឧត្តម ក៏បានណែនាំដល់ពលរដ្ឋ ឲ្យបង្កេីនការប្រុងប្រយ័ត្នខ្ពស់ នៅដើមរដូវវស្សានេះ ចំពោះ បាតុភូតភ្លៀង ខ្យល់ ផ្គររន្ទះ ដែលអាចបង្កគ្រោះថ្នាក់ គ្រប់ពេលវេលា ចំពោះអាយុជីវិតមនុស្ស និងសត្វ ឬបំផ្លាញទ្រព្យសម្បត្តិរបស់បងប្អូន ជាពិសេសសូមបងប្អូន អប់រំណែនាំដល់កូនចៅតូចៗ កុំឲ្យចេញនៅក្រៅផ្ទះ ឬនៅទីវាល ពេលមានភ្លៀងផ្គរ។
គួរបញ្ជាក់ថា អំណោយដែលត្រូវផ្តល់ជូនប្រជាពលរដ្ឋ ចំនួន ៩០គ្រួសារ អង្ករ ២៥គក្រ មី ៥០កញ្ចប់ទឹកត្រី ១យួរ ទឹកស៊ីអ៊ីវ ១យួរ ត្រីខ ១០កំប៉ុង , ឃីត ១ ( មុង១ ភួយ១ សារុង១ ក្រមា១ ) ។
ដោយឡែក ចំពោះថវិកា បានផ្តល់ជូនតាមកម្រិតខូចខាត គឺ គ្រួសារដែលខូចខាតកម្រិតធ្ងន់ ចំនួន ១៩គ្រួសារ ១គ្រួសារ ផ្តល់ជូន ៣០០,០០០ រៀល – គ្រួសារខូចខាតកម្រិតមធ្យម ចំនួន ១៥គ្រួសារ ១គ្រួសារ ផ្តល់ជូន ២០០,០០០ រៀល និងគ្រួសារដែលខូចខាតកម្រិតស្រាល ចំនួន ៥៦ គ្រួសារ ១គ្រួសារ ទទួលបាន ថវិកាចំនួន ១០០, ០០០ រៀល ផងដែរ ។
ចំពោះស្រុកព្រៃឈរ អនុសាខាស្រុក បានផ្តល់សង្កសី ១៣៧សន្លឹកជូន ៨គ្រួសារងគ្រោះតាមទំហំខូចខាត និងផ្តល់ថវិកា ជូន ២គ្រួសារដែលរបើកក្បឿង ក្នុង ១គ្រួសារ ២០០,០០០ រៀល ។ ជាមួយនោះ ព្រះអនុគណស្រុក ក៏បានឧបត្ថម្ភ ក្នុង ១គ្រួសារ នូវ ២កេស និង ថវិកា ១០០,០០០ រៀល៕
ប្រភព៖ រដ្ឋបាលខេត្តកំពង់ចាម
