តាកែវ៖ នៅព្រឹកថ្ងៃអាទិត្យ ទី០៩ ខែឧសភា ឆ្នាំ២០២១នេះ ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ បានអញ្ជើញ ទទួលអំណោយជាទឹកបរិសុទ្ធ ពី លោក កេត ព្រុង ប្រធាន និងថ្នាក់ដឹកនាំនៃមន្ទីរឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ខេត្តតាកែវ នូវទឹកបរិសុទ្ធចំនួន ១០០០យួរ ដើម្បីចូលរួមជាមួយរដ្ឋបាលខេត្ត សម្រាប់ការប្រើប្រាស់យុទ្ធនាការប្រយុទ្ធប្រឆាំង ទប់ស្កាត់ និងបង្ការការឆ្លងរីករាលដាលនៃជំងឺកូវីដ-១៩។

មានប្រសាសន៍នាឱកាសនោះដែរ ឯកឧត្តម អ៊ូច ភា អភិបាលខេត្ត ក៏បានថ្លែងអំណរគុណ ចំពោះ លោកប្រធាន ក៏ដូចជាមន្រ្តីរាជការ នៃមន្ទីរឧស្សាហកម្មទាំងអស់ និងសប្បុរសជន នានា ដែលបានចូលរួម បរិចាកនូវមានគ្រឿងឧបភោគបរិភោគផ្សេងៗ សម្រាប់ចូលរួមជា មួយរដ្ឋបាលខេត្ត សម្រាប់គាំទ្រ ដល់យុទ្ធនាការប្រយុទ្ធប្រឆាំង ទប់ស្កាត់ បង្ការ ការឆ្លងរីក រាលដាលនៃជំងឺកូវីដ-១៩ ដែលកំពុងរាត្បាតជាសកល។

បន្ទាប់ពីទទួលបាននូវទឹកបរិសុទ្ធ ចំនួន ១០០០យួរ ពីមន្ទីរឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ខេត្តតាកែវ រួចមក ឯកឧត្តម អ៊ូច ភា អភិបាលខេត្ត ក៏បានបែងចែក ទៅតាមបណ្ដាស្រុកដូចជា៖ ស្រុកព្រៃកប្បាស ៤០០យួរ ស្រុកសំរោង ២៥០យួរ ស្រុកត្រាំកក់ ២៥០យួរ និងស្រុកទ្រាំង ១០០ សម្រាប់ចាត់ចែងដំណើរការនៅតាមមណ្ឌលចត្តាឡីស័ក ឬមូលដ្ឋានភូមិឃុំ៕ដោយ -រ៉ាវុធ