បន្ទាប់ពីសហព័ន្ធកីឡាបាល់ទាត់កម្ពុជា (FFC) បានបញ្ចេញបញ្ជីឈ្មោះជាផ្លូវការនៃក្រុមបាល់ទាត់ជម្រើសជាតិកម្ពុជា កាលពីថ្ងៃទី២៤ ខែឧសភា ឆ្នាំ២០២១ ដែលមានសមាសភាព២៤នាក់ ក្រុមជម្រើសជាតិកម្ពុជា នឹងត្រូវចេញដំណើរឆ្ពោះទៅកាន់ប្រទេសបារ៉ែន ដែលជាកន្លែងហ្វឹកហាត់ សម្រាប់៣ប្រកួតចុងក្រោយ វគ្គជម្រុះជុំទី២ ពូលC នៃព្រឹត្តិការណ៍បាល់ទាត់ពិភពលោក (FIFA World Cup Qatar 2022) ពីថ្ងៃទី៣ រហូតដល់ថ្ងៃទី១១ ខែមិថុនា ឆ្នាំ២០២១។

លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជាមានប្រសាសន៍ថា ដោយសារពេលវេលាខ្លី ក្រុមជម្រើសជាតិកម្ពុជា មិនបានប្រមូលផ្តុំហ្វឹកហាត់នៅក្នុងស្រុកពោលគឺនឹងត្រូវចេញដំណើរនាវេលាម៉ោង១១និង៥៥នាទីយប់ ដោយប្រកួតដំបូងត្រូវប៉ះជាមួយម្ចាស់ផ្ទះ បារ៉ែន នាថ្ងៃទី៣ ខែមិថុនា ឆ្នាំ២០២១, ជួបជាមួយក្រុមអ៊ីរ៉ាក់ នាថ្ងៃទី៧ ខែមិថុនា ឆ្នាំ២០២១ និងជួប១ប្រកួតចុងក្រោយជាមួយក្រុមអ៊ីរ៉ង់ នាថ្ងៃទី១១ ខែមិថុនា ឆ្នាំ២០២១។ ហើយវិលត្រឡប់មកកាន់កម្ពុជាវិញ នាថ្ងៃទី១២ ខែមិថុនា ឆ្នាំ២០២១។

លោកអគ្គលេខាធិការបន្ថែមទៀតថា ក្រុមកម្ពុជានឹងត្រូវស្នាក់នៅរយៈពេល១៥ថ្ងៃ ដោយចាប់ផ្តើមហ្វឹកហាត់បច្ចេកទេសនៅទឹកដីប្រទេសបារ៉ែនតែម្តង ហើយមុនពេលជួបម្ចាស់ផ្ទះបារ៉ែន គឺក្រុមកម្ពុជានៅសល់ពេល១សប្តាហ៍ ដើម្បីប្រមូលផ្តុំហ្វឹកហាត់ត្រៀម។

នេះជាការប្រកួតបង្គ្រប់កិច្ចចុងក្រោយរបស់កម្ពុជា ដោយត្រូវធ្លាក់ចេញពីការប្រកួតត្រឹមជុំទី២នៃពូល C នេះហើយ ដោយសារឆ្លងកាត់៥ប្រកួតកន្លងទៅ ក្នុងពូល C នេះ គឺក្រុមកម្ពុជាស្មើ១ប្រកួតជាមួយក្រុមហុងកុង ១-១ និងចាញ់៤ប្រកួត ដោយក្រុមកម្ពុជាស្ថិតនៅចំណាត់ថ្នាក់លេខ៥ ខណៈក្រុមអ៊ីរ៉ាក់ឈរលេខ១បណ្តោះអាសន្ន, បារ៉ែន លេខ២, អ៊ីរ៉ង់ លេខ៣, ហុងកុង លេខ៤។ ក្រុមជម្រើសជាតិកម្ពុជា មានសមាសភាព២៤នាក់ ក្រោមការដឹកនាំពីគ្រូបង្គោលជនជាតិជប៉ុន គឺលោក Ryu Hirose, អ្នកចាត់ការទូទៅ លោក Keisuke Honda, គ្រូជំនួយ លោក ភា សុភ័ក្ត្រា និងលោក អ៊ុក សុធី។

សូមរំឭកថា កាលពីប្រកួតជើងទី១ វគ្គជម្រុះជុំទី២ ពូល C (FIFA World Cup Qatar 2022) កាលពីថ្ងៃទី១០ ខែកញ្ញា ឆ្នាំ២០១៩ ម្ចាស់ផ្ទះ កម្ពុជា បានប្រកួតចាញ់ក្រុមបារ៉ែន ០ទល់១, កាលពីថ្ងៃទី១០ ខែតុលា ឆ្នាំ២០១៩ ក្រុមភ្ញៀវកម្ពុជាបានប្រកួតចាញ់ក្រុមម្ចាស់ផ្ទះ អ៊ីរ៉ង់ ដោយលទ្ធផល ០ទល់១៤ ហើយកាលពីថ្ងៃទី១៥ ខែតុលា ឆ្នាំ២០១៩ ក្រុមម្ចាស់ផ្ទះ កម្ពុជា ប្រកួតចាញ់ក្រុមភ្ញៀវ អ៊ីរ៉ាក់ ០ទល់៤៕ រូបភាព FFC