ក្រសួងអប់រំនៅយប់ថ្ងៃទី២ មិថុនា ឆ្នាំ២០២១ បានសរសេរសារអបអរសាទរដល់សិស្ស២រូប គឺយុវសិស្ស ដែន ដាមុនិន្ទ រៀនថ្នាក់ទី៧ និងយុវសិស្ស ដែន ដាមុនី ជាសិស្សរៀនថ្នាក់ទី២ នៃសាលាអន្តរជាតិវេសវីយូកម្ពុជា។ យុវសិស្សទាំង២រូបនោះ ត្រូវក្រសួងអប់រំបញ្ជាក់ថា នាពេលកន្លងមកធ្លាប់ទទួលនូវចំណាត់ថ្នាក់លេខ១ទូទាំងប្រទេសកម្ពុជា។

ជាមួយគ្នានោះ យុវសិស្សទាំង២រូប ទើបតែទទួលបានមេដាយមាសថ្នាក់អន្តរជាតិ ក្នុងការប្រកួតប្រជែងសិស្សឆ្នើមផ្នែកគណិតវិទ្យាអូឡាំព្យារបស់ប្រទេស សិង្ហបុរី និងក្នុងទ្វីបអាស៊ីឆ្នាំ២០២១ ហៅកាត់ថា (SASMO)នៅថ្ងៃទី១មិថុនាឆ្នាំ២០២១។ ក្នុងការប្រកួតនោះ មានការចូលរួមពីសិស្សឆ្នើមផ្នែកគណិតវិទ្យាចំនួន ២ម៉ឺន៨ពាន់៧៦០មកពីបណ្តាលប្រទេសចំនួន២៦។