ខេត្តកំពង់ចាម ក្នុងរយៈពេល២៤ម៉ោងចុងក្រោយនេះ បានរកឃើញអ្នកឆ្លងកូវីដ១៩ថ្មីចំនួន ៤៨នាក់ បន្ថែមទៀត ដែលកើនលើសពីម្សិលមិញ។ ខេត្តកំពង់ចាមក្នុងរយៈពេល៣ថ្ងៃជាប់មកនេះ តួលេខនៃការឆ្លងមានត្រឹមរង្វង់ ៣០នាក់ ប៉ុន្តែការឆ្លងនៅថ្ងៃនេះ ឈានចូលដល់ខ្ទង់សែហើយ។

កាលពីថ្ងៃទី១មិថុនា រដ្ឋបាលខេត្តបានរកឃើញ អ្នកឆ្លងថ្មី៣១នាក់, ក្រោយមកនៅថ្ងៃទី២មិថុនាការឆ្លងថ្មីមានចំនួន៣៣នាក់, នៅថ្ងៃទី៣មិថុនាចំនួន៣២នាក់ និង ការឆ្លងនៅថ្ងៃនេះ បានកើនលើសចំនួន១៦នាក់ថែមទៀត។ ក្នុងចំណោមអ្នកឆ្លងថ្មីទាំង៤៨នាក់នៅថ្ងៃនេះ រួម មានអ្នកឆ្លងក្នុងស្រុកព្រៃឈរ២២នាក់, ស្រុកចំការលើ២នាក់, ស្រុកជើងព្រៃចំនួន២៣និងស្រុកបាធាយម្នាក់។

ខេត្តកំពង់ចាម គិតត្រឹមថ្ងៃទី៤មិថុនាឆ្នាំ២០២១ មានអ្នកឆ្លងជំកូវីដ-១៩ចំនួន៩៩៤នាក់ ក្នុងនោះបានព្យាបាល ជាសះស្បើយ ចំនួន៤២៨នាក់រួមទាំងការទើបព្យាបាលជាសះស្បើយ៨១នាក់ក្នុងរយៈពល២៤ម៉ោងចុងក្រោយ នេះ និងនៅសល់៥៦៦នាក់កំ ពុងទទួលការព្យាបាល។