រដ្ឋបាលខេត្តព្រៃវែង បានបង្ហាញអត្តសញ្ញាណករណីអ្នកវិជ្ជមានកូវីដ-១៩ ចំនួន ៤០នាក់បន្ថែមទៀតតាមរយៈការធ្វើតេស្តរហ័ស (Rapid Test) នៅថ្ងៃទី៩ មិថុនា ឆ្នាំ២០២១។ ក្នុងចំណោមអ្នកឆ្លងថ្មីទាំងនោះ នៅស្រុកព្រះសេ្តច ចំនួន ១៨នាក់, ស្រុកពាមរក៍ចំនួន៦នាក់, ស្រុកកំពង់ត្របែកចំនួន៤នាក់, ស្រុកពារាំង ចំនួន៤នាក់, ស្រុកកំចាយមារចំនួន៣នាក់, ស្រុកពាមជរ ចំនួន ២នាក់, ស្រុកពោធិ៍រៀងចំនួន២នាក់ និងស្រុកមេសាងម្នាក់។

បច្ចុប្បន្ន អ្នកវិជ្ជមានជំងឺកូវីដ-១៩ ទាំង ៤០នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តនិងតាមមន្ទីរពេទ្យបង្អែកស្រុករបស់ពួកគេនីមួយៗ។ ក្នុងនោះដែរ រដ្ឋបាលខេត្តព្រៃវែង បានអំពាវនាវដល់អ្នកដែលបានប្រាស្រ័យទាក់ទង ប៉ះពាល់ដោយផ្ទាល់ឬប្រយោល ជាមួយបុគ្គលវិជ្ជមានកូវីដ-១៩ ខាងលើ និងដាក់ខ្លួនដាច់ដោយឡែកតាមដានសុខភាពរយៈពេល១៤ថ្ងៃ និងរាយការណ៍មកអាជ្ញាធរដើម្បីយកសំណាកនិងធ្វើចត្តាឡីស័ក (៣ការពារ ៣កុំ)។

គិតមកដល់ថ្ងៃទី៩មិថុនាឆ្នាំ២០២១ ខេត្តព្រៃវែងមានអ្នកឆ្លងជំងឺកូវីដ-១៩ចំនួន ៧៨២នាក់ ក្នុងនោះបានព្យាបាលជាសះស្បើយចំនួន៣១៣នាក់ មានអ្នកស្លាប់ចំនួន ៨នាក់ និងនៅសល់៤៦១នាក់កំពុងទទួលការព្យាបាល។