រដ្ឋបាលខេត្តព្រៃវែងបានបង្ហាញអត្តសញ្ញាណករណីអ្នកវិជ្ជមានកូវីដ-១៩ ចំនួន៤២នាក់បន្ថែមទៀតតាមរយៈការធ្វើតេស្តរហ័ស (Rapid Test) នៅថ្ងៃទី១០មិថុនាឆ្នាំ២០២១។ ក្នុងចំណោមអ្នកឆ្លងថ្មីទាំងនោះ នៅក្រុងព្រៃវែងចំនួន៨នាក់, ស្រុកព្រះសេ្តចចំនួន៩នាក់, ស្រុកពារាំងចំនួន ៧នាក់, ស្រុកស្វាយអន្ទរចំនួន៤នាក់, ស្រុកកំចាយមារចំនួន៤នាក់, ស្រុកស៊ីធរកណ្ដាល ចំនួន ៤នាក់, ស្រុកពាមជរចំនួន៣នាក់, ស្រុកពោធិ៍រៀង ចំនួន ២នាក់, និងស្រុកកញ្ចៀចម្នាក់។

បច្ចុប្បន្ន អ្នកវិជ្ជមានជំងឺកូវីដ-១៩ ទាំង៤២នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តនិងតាមមន្ទីរពេទ្យបង្អែកស្រុករបស់ពួកគេនីមួយៗ។ ក្នុងនោះដែរ រដ្ឋបាលខេត្តព្រៃវែង បានអំពាវនាវដល់អ្នកដែលបានប្រាស្រ័យទាក់ទង ប៉ះពាល់ដោយផ្ទាល់ឬប្រយោល ជាមួយបុគ្គលវិជ្ជមានកូវីដ-១៩ ខាងលើ និងដាក់ខ្លួនដាច់ដោយឡែកតាមដានសុខភាពរយៈពេល១៤ថ្ងៃ និងរាយការណ៍មកអាជ្ញាធរដើម្បីយកសំណាកនិងធ្វើចត្តាឡីស័ក (៣ការពារ ៣កុំ)។ គិតមកដល់ថ្ងៃទី១០មិថុនាឆ្នាំ២០២១ ខេត្តព្រៃវែងមានអ្នកឆ្លងជំងឺកូវីដ-១៩ចំនួន៨២៤នាក់ ក្នុងនោះបានព្យាបាលជាសះស្បើយចំនួន៣៥៦នាក់ មានអ្នកស្លាប់ចំនួន៨នាក់ និងនៅសល់៤៦០នាក់កំពុងទទួលការព្យាបាល។