ម៉ាស៊ីនរាវមីនចំនួន ៥០គ្រឿងត្រូវបានស៊ីម៉ាក់ផ្ទេរ ជូនកងយោធពលខេមរភូមិន្ទ
រាជធានីភ្នំពេញៈម៉ាស៊ីនរាវមីនចំនួន៥០គ្រឿងត្រូវបានស៊ីម៉ាក់ ផ្ទេរ និងប្រគល់ ជូនកងយោធពលខេមរភូមិន្ទ ក្នុងការគាំទ្រដល់យោធ ភូមិភាគទី៣ យោធភូមិភាគទី៥ និងកងពលធំអន្តរាគមន៍លេខ២នៅថ្ងៃទី ១៤ ខែ មិថុនា ឆ្នាំ ២០២១នេះ។
គួរបញ្ជាក់ថាការប្រគល់នូវម៉ាស៊ីនរាវម៉ីននេះបន្ទាប់ពីពេល កងយោធពលខេមរភូមិន្ទភូមិភាគទាំងពីរបានទទួលការហ្វឹកហ្វឺនកំលាំងជំនាញបោសសំអាតមីននៅវិទ្យាស្ថានបច្ចេកទេសសកម្មភាពកំចាត់មីនស៊ីម៉ាក់កំពង់ឆ្នាំងចំនួន១០០នាក់កន្លងមក។
បញ្ជាក់ក្នុងពិធីនេះលោក ហេង រតនា អគ្គនាយកស៊ីម៉ាក បានថ្លែងអំណរអរគុណ លោក ឧត្តមសេនីយ៍ ហ៊ុន ម៉ាណែត អគ្គមេបញ្ជាការរង និងជាមេបញ្ជាការកងទ័ព ជើងគោក ដែលតែងតែជំរុញលើកទឹកចិត្តឱ្យមានការសហការគ្នាល្អិតរមួតក្នុងការ បោសសំអាតគ្រាប់មីននិងសំណល់យុទ្ធភណ្ឌ័ពីសង្គ្រាម ឱ្យបានឆាប់បំផុត ប្រយោជន៍ដើម្បីធានាសុខសុវត្ថិភាពការប្រើប្រាស់ដីធ្លីអភិវឌ្ឍន៍សេដ្ឋកិច្ចសង្គមជាតិ និងពង្រឹងសុខសន្តិភាពទាំងផ្លូវកាយនិងផ្លូវចិត្តជូនប្រជាពលរដ្ឋដែលកំពុងរងការគំរាមកំហែងដោយសារគ្រាប់មីននិងសំណល់ពីសង្គ្រាម៕