ឯកឧត្តម ប្រាជ្ញ ចន្ទ និង ឯកឧត្តម កា លាន បានក្លាយជាបេក្ខជនសម្រាប់តំណែងប្រធាន គ.ជ.ប.
ភ្នំពេញ : ឯកឧត្តម ប្រាជ្ញ ចន្ទ និង ឯកឧត្តម កា លាន បានក្លាយជាបេក្ខជនសម្រាប់តំណែងជាប្រធានគញណៈកម្មាធិការ ជាតិរៀបចំការបោះឆ្នោត(គ.ជ.ប.)បន្ទាប់ពីគណៈកម្មាធិការអចិន្ត្រៃយ៍រដ្ឋសភាបានអនុម័តយល់ព្រមលើបេក្ខជន ទាំងពីរ២រូបនៅព្រឹកថ្ងៃទី១៥ខែមិថុនានេះនៅក្នុងកិច្ចប្រជុំគណៈកម្មាធិការអចិន្ត្រៃយ៍រដ្ឋសភាដឹកនាំដោយសម្ដេចអគ្គមហា ពញាចក្រីហេងសំរិនប្រធានរដ្ឋសភាតាមប្រព័ន្ធវីដេអូ។តាមនីតិវិធីបេក្ខជនឈរឈ្មោះនេះនឹងត្រូវបញ្ជូនទៅគណបក្សនយោបាយពាក់ព័ន្ធជ្រើសរើសបេក្ខជនមួយរូប រួចផ្ញើមកគណៈកម្មាធិការអចិន្ត្រៃយ៍រដ្ឋសភាវិញ។
ឯកឧត្តម ឡេង ប៉េងឡុង អគ្គលេខាធិការ និង ជាអ្នកនាំពាក្យដ្ឋសភាជាតិបានប្រាប់AMS នៅមុននេះបន្តិចថា ឯកឧត្តម ប្រាជ្ញ ចន្ទ និង ឯកឧត្តម កា លាន គឺជាបេក្ខជនដែលបានពាក្យឈរឈ្មោះធ្វើជាបេក្ខជនប្រធានគ.ជ.ប. ក្នុងចំណោមឥស្សរជន៤ រូបដែលបានមកយកពាក្យឈរឈ្មោះពីរដ្ឋសភា។
លោកបន្តថាការទទួលពាក្យបេក្ខជនឈរឈ្មោះជាបេក្ខភាពប្រធាន គ.ជ.ប. រយៈពេល ៥ថ្ងៃ គឺចាប់ពីថ្ងៃទី៧ ដល់ថ្ងៃទី១១ ខែមិថុនា ដោយមានបេក្ខជនចំនួន៤រូបតែប៉ុណ្ណោះ ហើយក្នុងចំណោមបេក្ខជនទាំង ៤រូប គឺមានបេក្ខជន២រូបទេដែលបានបំពេញបែបបទយកមកដាក់នៅអគ្គលេខាធិការដ្ឋានរដ្ឋសភា។បេក្ខជនចំនួន ២រូបនេះមានសំណុំបែបបទគ្រប់គ្រាន់ហើយបេក្ខជនចំនួន ២រូបទៀត គឺមិនបានដាក់ពាក្យទេ។
លោកបានបន្តថា គណៈកម្មាធិការអចិន្ត្រៃយ៍នៃរដ្ឋសភា បើកកិច្ចប្រជុំនៅថ្ងៃទី១៥ ខែមិថុនា នេះដើម្បីពិនិត្យជ្រើសរើស បេក្ខភាពប្រធានគ.ជ.ប.ថាតើត្រឹមត្រូវតាមច្បាប់ឬក៏អត់?។នៅពេលពិនិត្យមើលថាត្រឹមត្រូវតាមច្បាប់ហើយគណៈកម្មាធិការ អចិន្ត្រៃយ៍នៃរដ្ឋសភាទៅសម្របសម្រួលសុំឲ្យគណបក្សដែលបានស្នើសុំតែងតាំងឯកឧត្តម ស៊ិក ប៊ុនហុក ជាប្រធានគ.ជ.ប. ពីមុនមក ដើម្បីឲ្យធ្វើការជ្រើសរើសបេក្ខជនទាំងពីររូប ប៉ុន្តែជ្រើសរើសយកតែបេក្ខជនមួយរូបទេ។
បន្ទាប់ពីគណៈកម្មាធិការអចិន្ត្រៃយ៍រដ្ឋសភាប្រជុំពិនិត្យរួចហើយ គឺរយៈពេល ៣ថ្ងៃ ពីថ្ងៃទី១៥ ដល់ថ្ងៃទី១៧ ខែមិថុនា គណៈកម្មាធិការអចិន្ត្រៃយ៍ រដ្ឋសភាប្រជុំជាមួយខាងគណបក្សប្រជាជនកម្ពុជា ដើម្បីសម្រេចជ្រើសរើសយកបេក្ខជន មួយរូបក្នុងចំណោមពីររូប ដែលបានដាក់ពាក្យឈរឈ្មោះជាបេក្ខភាពប្រធានគ.ជ.ប.។
ឯកឧត្តម ប្រាជ្ញ ច័ន្ទ ត្រូវបានគេស្គាល់ថា ជាអតីតអភិបាលខេត្តបាត់ដំបង ខេត្តត្បូងឃ្មុំ ជារដ្ឋលេខាធិការក្រសួងមហាផ្ទៃ និង ចុងក្រោយជាតំណាងរាស្ត្រ និងជាប្រធានគណៈកម្មការទី១នៃរដ្ឋសភា ។ ចំណែកឯកឧត្តម កា លាន មិនសូវមានអ្នក
ស្គាល់ពីលោកច្បាស់ទេ។
សូមជម្រាបថា គណៈកម្មាធិការអចិន្ត្រៃយ៍រដ្ឋសភា កាលពីថ្ងៃទី៤ ខែមិថុនាបានអនុម័តយល់ព្រមលើសំណើលាឈប់ពី តួនាទី និងតំណែងប្រធានគណៈកម្មាធិការជាតិរៀបចំការបោះឆ្នោតរបស់ឯកឧត្តម ស៊ិក ប៊ុនហុក និងបានអនុម័តយល់ព្រមនូវសេចក្តីព្រាងសេចក្តីសម្រេចស្តីពីការកំណត់បែបបទនិងនីតិវិធីនៃការជ្រើសរើសបេក្ខជនប្រធានគ.ជ.ប និងប្រគល់ ភារកិច្ចជូនអគ្គលេខាធិការដ្ឋានរដ្ឋសភា ធ្វើសេចក្តីជូនដំណឹងជ្រើសរើសបេក្ខជនជាប្រធានគ.ជ.ប ជំនួសឯកឧត្តម ស៊ិក ប៊ុនហុក។ ការអនុម័តរបស់គណៈកម្មាធិការអចិន្ត្រៃយ៍រដ្ឋសភាបានធ្វើឡើងបន្ទាប់ពីឯកឧត្តម ស៊ិក ប៊ុនហុក បានដាក់ពាក្យសុំលាលែងទៅរដ្ឋសភាកាលពីថ្ងៃទី១ ខែមិថុនាឆ្នាំ២០២១។
ក្រៅពីនេះ អង្គប្រជុំគណៈកម្មាធិការអចិន្ត្រៃយ៍រដ្ឋសភា ក៏បានអនុម័តប្រគល់សេចក្តីព្រាងច្បាប់ស្តីពី ការអនុម័តយល់ព្រមលើកិច្ចព្រមព្រៀង ពាណិជ្ជកម្មសេរី រវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋប្រជាមានិតចិន ជូនដល់គណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា ដោយសហការជាមួយគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា ពិនិត្យ សិក្សា ហើយធ្វើរបាយការណ៍ ជូនគណៈកម្មាធិការអចិន្ត្រៃយ៍រដ្ឋសភា វិញ។
ជាមួយគ្នានេះគណៈកម្មាធិការអចិន្ត្រៃយ៍រដ្ឋសភា ក៏បានអនុម័តប្រគល់សេចក្តីព្រាងច្បាប់ស្តីពី ការប្រកួតប្រជែង ជូនដល់គណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ នៃរដ្ឋសភា ពិនិត្យ សិក្សា ហើយធ្វើរបាយការណ៍ ជូនគណៈកម្មាធិការអចិន្ត្រៃយ៍រដ្ឋសភា វិញ ផងដែរ៕ ដោយ: ពលជ័យ
