ដោយយកគម្រូតាមគំនូររបស់លោក Leonardo da Vinci ឈ្មោះ The Last Supper និទានពីការសោយអាហារចុងក្រោយរបស់ព្រះយេស៊ូ បណ្តាញផ្សព្វផ្សាយសង្គមចិន Sina Weibo បានកែតួអង្គទាំងប៉ុន្មានទៅជាសត្វតំណាងឱ្យក្រុមប្រទេស G7 ថែមទាំងអូស្ត្រាលី និងឥណ្ឌា
ពួកគេបានកែជា The Last G7 ហើយដូរតួព្រះយេស៊ូជា ឥន្ទ្រី ដែលកំពុងយកក្រដាសកិតលាមកបោះចេញជាដុល្លារ បង្ហាញពីបំណុលកាន់តែធំទៅៗរបស់អាមេរិក។ នៅលើតុ មានផែនទីចិន ដោយការប្រជុំក្រុម G7 កន្លងទៅបានយកការទប់ទល់ឥទ្ធិពលចិនជាប្រធានបទសំខាន់។ ជប៉ុន ជាកញ្ជ្រោង កំពុងចាក់ទឹកពីប៉ាន់ដែលមានសញ្ញា នុយក្លេអ៊ែ បង្ហាញថាជប៉ុនបានបង្ហូរទឹកមានសារធាតុនុយក្លេអ៊ែរពីរោងចក្រ Fukushima ទៅក្នុងសមុទ្ទ។ សត្វកកេរឈើ Beaver ជាកាណាដា កាន់រូបតុក្កតាតំណាងឱ្យការឃាត់ខ្លួនប្រធានហិរញ្ញវត្ថុក្រុមហ៊ុន Huawei អ្នកស្រី Meng Wanzhou។ ដំរីលុតជង្គង់ព្យួរសេរ៉ូម ជាឥណ្ឌា ដែលកំពុងត្រូវកូវីដ១៩វាយលុក។ សត្វ Kangaroo ជាអូស្ត្រាលីលូកដៃយកដុល្លារពេលអង្គុយជិតសេរ៉ូមបិទទង់ជាតិចិន ស្តែងពីការប្រឹងចង់ដើរតាមអាមេរិក ខណៈសេដ្ឋកិច្ចខ្លួនពឹងផ្អែកខ្លាំងលើចិន។ នៅមុខតុ គេឃើញមានកង្កែបមួយដែលមានលុយពេញដៃ ហើយចង់ឡើងតុនឹងគេនោះជាតៃវ៉ាន់។
ប្រភព៖ Khieu Kanharith
