ក្រសួងសេដ្ឋកិច្ច និង ហិរញ្ញវត្ថុ៖ វិស័យឧស្សាហកម្មត្រូវបានរំពឹងថា នឹងមានកំណើនក្នុងអត្រា៥,៩ភាគរយក្នុងឆ្នាំនេះ និង៨,២ភាគរយនៅឆ្នាំក្រោយ (មានវីដេអូ)
Video: https://fb.watch/6iLqBFAqfc/
ភ្នំពេញ៖ យោងតាមសារាចរណែនាំស្តីពីការរៀបចំសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២២ ដែលចេញផ្សាយដោយក្រសួងសេដ្ឋកិច្ច និង ហិរញ្ញវត្ថុនាពេលថ្មីៗនេះបានអោយដឹងថា វិស័យឧស្សាហកម្មត្រូវបានរំពឹងថា នឹងមានកំណើនក្នុងអត្រា៥,៩% ក្នុងឆ្នាំ២០២១ និង៨,២% ក្នុងឆ្នាំ២០២២ ដោយសារការព្យាករណ៍ទុកនូវការងើបឡើងវិញជាបណ្តើរៗនៃសកម្មភាពផលិតកម្ម តម្រូវការសកល និងលំហូរទុនវិនិយោគ ។
វិស័យឧស្សាហកម្មត្រូវបានព្យាករណ៍ថា នឹងមានកំណើនក្នុងអត្រា៥,៩%ក្នុងឆ្នាំ២០២១ និង៨,២%ក្នុងឆ្នាំ២០២២ គឺដោយផ្អែកទៅលើអនុវិស័យកាត់ដេរដែលត្រូវបានរំពឹងថា នឹងកើនឡើងវិញក្នុងអត្រាកំណើនទាប៤,៦%ក្នុងឆ្នាំ ២០២១ និង ៦,០%ក្នុងឆ្នាំ ២០២២ ដោយសារការងើបឡើងវិញនូវតម្រូវការសកល បន្ទាប់ពីវិបត្តិកូវីដ១៩ ពិសេសមកលើប្រទេសដៃគូនាំចេញសំខាន់ៗរបស់កម្ពុជារួមមាន៖ សហភាពអឺរ៉ុប និង សហរដ្ឋអាមេរិក ។ ចំណែកអនុវិស័យសំណង់ត្រូវបានព្យាករណ៍ថា នឹងងើបឡើងវិញក្នុងអត្រាកំណើនទាបក្នុងរង្វង់២,៩%ក្នុងឆ្នាំ ២០២១ និង ៧,៨% ក្នុងឆ្នាំ ២០២២ ដោយសារការរំពឹងទុកនូវការត្រឡប់មកវិញនៃលំហូរទុនវិនិយោគពីបរទេស និងការងើបឡើងវិញនូវតម្រូវការក្នុងស្រុក ។
ដោយឡែកអនុវិស័យកម្មន្តសាលមិនមែនកាត់ដេរដែលកំពុងបង្ហាញនូវសញ្ញានៃការធ្វើពិពិធកម្មទំនិញនាំចេញត្រូវបានព្យាករណ៍ថា នឹងបន្តមានកំណើនខ្ពស់ក្នុងអត្រា ១២,៥% ក្នុងឆ្នាំ២០២១ និង ១២,៧% ក្នុងឆ្នាំ ២០២២ ដោយសារការរំពឹងទុកនូវការបន្តកើនឡើងសកម្មភាពផលិតកម្ម ដើម្បីបម្រើការប្រើប្រាស់ក្នុងស្រុក និងការនាំចេញផលិតផលកម្មន្តសាលមិនមែនកាត់ដេរ ។ ជារួមវិស័យឧស្សាហកម្មកម្ពុជានៅមានសក្តានុពលក្នុងការរួមចំណែកលើកកម្ពស់កំណើនសេដ្ឋកិច្ចជាតិ ដូចនេះទាមទារនូវការបន្តជំរុញធ្វើឱ្យប្រសើរឡើងនូវបរិយាកាសវិនិយោគ ការជំរុញការធ្វើពិពិធកម្មទីផ្សារសម្រាប់ការនាំចេញ ការពង្រឹងការតភ្ជាប់ និងការបណ្តុះបណ្តាលធនធានមនុស្សជាដើម សំដៅពង្រឹងកាពប្រកួតប្រជែង និងពន្លឺពិពិធកម្មសេដ្ឋកិច្ច ។
សូមរំលឹកថា ក្នុងឆ្នាំ២០២០ កំណើនសេដ្ឋកិច្ចកម្ពុជាសម្រេចបានក្នុងអត្រា -៣,១% ដែលកំណើននេះ ដោយសារការធ្លាក់ចុះយ៉ាងគំហុកនៃវិស័យសេវាកម្ម និងវិស័យឧស្សាហកម្ម ខណៈវិស័យកសិកម្មនៅរក្សាបានកំណើនវិជ្ជមាន ។ ការធ្លាក់ចុះនេះបានធ្វើឱ្យផលិតក្នុងស្រុកសរុប (GDP) សម្រាប់មនុស្សម្នាក់ក៏បានត្រឹម១,៦៥៣ដុល្លារ ។ ទន្ទឹមនេះ អត្រាអតិផរណាមធ្យមប្រចាំឆ្នាំស្ថិតក្នុងរង្វង់ ២,៩% និងអត្រាប្តូរប្រាក់មធ្យមគឺប្រមាណ៤,១៨០រៀលក្នុងមួយដុល្លារ ៕ ប្រភព៖ រស្មីកម្ពុជា