យោងតាមសេចក្ដីជូនដំណឹង របស់ក្រសួងធនធានទឹក នៅថ្ងៃទី៥កក្កដានេះ បានឲ្យដឹងថា នៅព្រឹកថ្ងៃទី៥កក្កដានេះ មានសម្ពាធទាបសកម្មមួយបានស្ថិតក្នុងសមុទ្រចិន ខាងលិចប្រទេសហ្វីលីពីន និងបង្កើនឥទ្ធិពលទៅជាវិសម្ពាធ TD និងធ្វើដំណើរឆ្ពោះ ទៅទិសពាយ័ព្យ។ នៅល្ងាចថ្ងៃទី៥កក្កដា វិសម្ពាធនោះ បានបង្កើនឥទ្ធិពលជាកូនព្យុះទី៦ ឈ្មោះ អ៊ីន ហ្វា TS IN-FA 2016 នៅលើសមុទ្រចិនខាងត្បូង ចំណុចខ្សែវណ្ឌទី១៤ អង្សា៤នៃរយៈទទឹងខាងជើង និងខ្សែស្របទី១១៤អង្សា១ នៃរយៈបណ្ដោយខាងកើត។

ក្រសួងធនធានទឹកបានព្យាករណ៍ថា នៅថ្ងៃទី៧កក្កដាឆ្នាំ២០២១ កូនព្យុះនោះ នឹងធ្វើដំណើរ ចូលទៅកោះហៃណាំ ប្រទេសចិន។ នៅថ្ងៃទី៨កក្កដាឆ្នាំ២០២១ កូនព្យុះ នឹងថមថយឥទ្ធិពល របស់ខ្លួនទៅជាវិសម្ពាធ TD រួចចូលទៅប្រទេសវៀតណាមភាគខាងជើង។ ដោយឡែកជ្រលង នៃកូនព្យុះ លើកទី៦ អ៊ីន ហ្វា និងខ្យល់មូសុងនិរតី នឹងមានឥទ្ធិពលមកលើប្រទេសកម្ពុជា ចាប់ពីថ្ងៃទី៥ដល់ថ្ងៃទី៨កក្កដាឆ្នាំ២០២១។ លក្ខណៈបែបនោះ ធ្វើឲ្យអាកាសធាតុនៅ ប្រទេសកម្ពុជា បណ្ដាខេត្តនៅតំបន់វាលទំនាបជាប់ ទន្លេសាង និងបឹងទន្លេសាប មានភ្លៀងធ្លាក់ ពីបង្គួរទៅច្រើន និងមានខ្យល់កន្ត្រាក់កម្រិតបង្គួរ។

បណ្ដាខេត្តនៅ តំបន់ជួរភ្នំដងរែក និងតាមដងទន្លេមេគង្គ មានភ្លៀងធ្លាក់ ពីបង្គួរទៅច្រើន និងមានខ្យល់ កន្ត្រាក់ក្នុងកម្រិតបង្គួរ។ នៅតំបន់មាត់សមុទ្រ មានភ្លៀងធ្លាក់ពីបង្គួរទៅច្រើន និងមានខ្យល់កន្ត្រាក់ក្នុងកម្រិតបង្គួរ ជាមួយរលកសមុទ្រខ្ពស់ជាមធ្យម។ រីឯស្ថានភាព ទន្លេមគង្គ ចាប់ផ្ដើមឡើងបន្តិចជាបន្តបន្ទាប់។ ក្រសួងធនធានទឹក បានអំពាវនាវដល់ប្រជាពលរដ្ឋ ជាពិសេសប្រជានេសាទ និងអ្នកដំណើរតាមសមុទ្រទាំងអស់ បង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីជៀសវាងរាល់គ្រោះថ្នាក់ផ្សេងៗ ដែលអាចកើតមានឡើងជាយថាហេតុ។