៦ ខែបន្ទាប់ពីការវាយលុកចូលវិមានកាពីតូល ការសន្យានិងបេ្តជ្ញាចិត្តរបស់ក្រុមហ៊ុនធំៗនៅអាមេរិកចាប់ផ្ដើមធ្លាក់ចុះ
មឹង ច័ន្ទសុម៉ានីតា
នៅពេលដែលភាពភ្ញាក់ផ្អើល និង ច្រួលច្របល់បានរាលដាលពាសពេញសហរដ្ឋអាមេរិកបន្ទាប់ពីព្រឹត្តិការណ៍កូដកម្មវាយលុកវិមានកាពីតូល (អគារសភាអាមេរិក)នៅថ្ងៃទី ៦ ខែមករា ក្រុមហ៊ុនសាជីវកម្មធំៗជាច្រើននៅអាមេរិកបានប្រកាន់ជំហរប្រឆាំងនឹងការភូតភរដែលបានជំរុញហ្វូងមនុស្សឱ្យធ្វើសកម្មភាពបែបនេះ ប៉ុន្តែការសន្យាហាក់ដូចជាមិនបានគោរព។
ក្រុមហ៊ុនធំៗ រាប់សិបបានលើកឡើងពីការប្ដេជ្ញាចិត្ត របស់ពួកគេចំពោះការថែរក្សាលទ្ធិប្រជាធិបតេយ្យ ហើយបានសន្យាផ្អាកបរិច្ចាគប្រាក់ដល់សមាជិកសភាចំនួន ១៤៧ នាក់ ដែលបានជំទាស់នឹងការបញ្ជាក់លទ្ធផលជ័យជម្នះរបស់លោកចូ បៃដិនក្នុងការបោះឆ្នោតឆ្នាំ២០២០ ក្រោយពីមានការសំណើដោយសម្ព័ន្ធរបស់លោកដូណាល់ ត្រាំឱ្យសើររើលទ្ធផលបោះឆ្នោតនេះដោយផ្អែកលើការចោទប្រកាន់គ្មានភស្តុតាងថាមានការលួចបន្លំ សន្លឹកឆ្នោត ។
ក្រុមហ៊ុនធំៗបំផុតរបស់អាមេរិកដូចជាWalmart, Pfizer, Intel, General Electric និង AT&T ស្ថិតក្នុងចំណោមក្រុមហ៊ុនដែល បានប្រកាសការសន្យានិងប្ដេជ្ញារបស់ពួកគេ ក្នុងនាមការពារលទ្ធិប្រជាធិបតេយ្យក្នុងរយៈពេលប៉ុន្មានថ្ងៃបន្ទាប់ ពីអ្នកគាំទ្រលោកត្រាំបានសម្រុកចូលអាគារកាពីតូលក្នុងគោលបំណងបង្អាក់ការផ្ទេរអំណាចប្រធានាធិបតីដោយប្រើ ហិង្សា។
ប្រាំមួយខែក្រោយមក ក្រុមហ៊ុនទាំងនេះ នៅតែបន្តផ្ញើប្រាក់ទៅទ្រទ្រង់គណៈធម្មាធិការសកម្មភាពនយោបាយដែលគាំទ្រសមាជិកសភាទាំងនេះដូចកាលពីមុនដដែល ហើយបានផ្ទុយពីការសន្យារបស់ពួកគេ។
លោក Daniel Weiner អតីតអ្នកប្រឹក្សាជាន់ខ្ពស់នៃគណៈកម្មការរៀបចំការបោះឆ្នោតជាតិ ដែលឥឡូវនេះកំពុងធ្វើការនៅកម្មវិធីកែទម្រង់ការបោះឆ្នោតនៅមជ្ឈមណ្ឌលយុត្តិធម៌ Brennan បាន មាននិយាយថា៖ «កាប្ដេជ្ញាចិត្តមិនផ្ដល់ប្រាក់ឧបត្ថម្ភទៅឱ្យបុគ្គលជាក់លាក់មួយចំនួន មិនមានន័យ បានការច្រើនទេ នៅពេលដែលក្រុមហ៊ុនធំៗទាំងនោះនៅតែមានមធ្យោបាយជាច្រើន ដើម្បីបន្តផ្គត់ផ្គង់ប្រាក់ទៅដល់មន្ត្រីជាប់ឆ្នោតទាំងនោះ»។
ជិតប្រាំមួយខែបន្ទាប់ពីមានកុបកម្ម នៅសហរដ្ឋអាមេរិក ក្រសួងយុត្តិធម៌របស់អាមេរិកបានចាប់ផ្ដើមចាប់ខ្លួនឧក្រិដ្ឋជន ដែលត្រូវបានគេចោទប្រកាន់ថាមានការពាក់ព័ន្ធនឹង – ការវាយប្រហារលើអ្នកយកព័ត៌មានឬបំផ្លាញសម្ភារៈរបស់ក្រុមអ្នកយកព័ត៌មាននៅពេលអ្នកសារព័ត៌មានទាំងនោះ បានបង្ហាញពីអំពើហិង្សា ដែលបានប្រព្រឹត្តដោយអ្នកគាំទ្រអតីតប្រធានាធិបតី លោកដូណាល់ ត្រាំ។
ប្រធានសភាមកពីបក្សប្រជាធិបតេយ្យ លោកស្រីNancy Pelosi បានប្រកាសបង្កើតគណៈកម្មាធិការមួយដើម្បីស៊ើបអង្កេតកុប្បកម្ម។ លោកស្រី Pelosi បាននិយាយ ថាគណៈកម្មាធិការដឹកនាំដោយបក្សប្រជាធិបតេយ្យនឹងមានគោលបំណង «ស្វែងរកការពិតនៅថ្ងៃនោះហើយធានាថា ការវាយប្រហារប្រភេទនោះ មិនអាចកើតឡើងទៀតបានទេ» ។ គួរបញ្ជាក់ផងដែរថា កុប្បកម្មនេះបានបណ្ដាលឱ្យមនុស្ស ៥ នាក់ស្លាប់ ដែលរួមមានមន្ត្រីប៉ូលិសកាពីតូលម្នាក់ផងដែរ។
ប្រភព៖
Some accused in Capitol riot reportedly tried to scrub info from their phones and social media
