សេតវិមានចាប់ផ្ដើមការប៉ះប៉ូវ បន្ទាប់ពីមានការរាយការណ៍ថាខុទ្ទកាល័យអនុប្រធានាធិបតីមានជម្លោះផ្ទៃក្នុង
សុខ វេងឈាង
នៅសប្ដាហ៍នេះសេតវិមានបានចាប់ផ្ដើមប៉ះប៉ូវការបែកបាក់ បន្ទាប់ពីមានការរាយការណ៍ថា បុគ្គលិកខុទ្ទកាល័យរបស់អនុប្រធានាធិបតី Kamala Harris មិនមានដំណើរការត្រឹមត្រូវ ហើយពោរពេញទៅដោយជម្លោះផ្ទៃក្នុងជាច្រើន នេះបើតាមការរាយការណ៍របស់ទូរទស្សន៍ CNN ដោយផ្អែកលើប្រភពចំនួនប្រាំដែលដឹងអំពីកិច្ចការផ្ទៃក្នុងនៃខុទ្ទកាល័យលោកស្រី Harris។
ប្រភពចំនួនពីរបាននិយាយថាបុគ្គលមួយចំនួននៅខាងក្នុងខុទ្ទកាល័យអនុប្រធានាធិបតីមានការមិនសប្បាយចិត្តនឹងអ្វីដែលពួកគេមើលឃើញថាជាប្រតិបត្តិការមិនដំណើរការត្រឹមត្រូវ ដែលជួនកាលត្រូវបានបង្កឡើងដោយជម្លោះផ្ទៃក្នុង។ កំហឹងភាគច្រើននៅទីនោះ គឺតម្រង់ទៅកាន់នាយខុទ្ទកាល័យរបស់លោកស្រី Harris គឺលោកស្រី Tina Flournoy។ ប្រភពមួយទៀតដែលមានភាពជិតស្និតជាមួយបុគ្គលិកនៃខុទ្ទកាល័យរៀបរាប់ថាបុគ្គលិកបានប្រឈមនឹង «បញ្ហា និងការលំបាក» និងបានឮត្អូញត្អែរអំពីលោកស្រី Flournoy ពីបុគ្គលិកផងដែរ ប៉ុន្តែបដិសេធថាជម្លោះបែបនេះមិនមានថាខុទ្ទកាល័យនេះមានភាពមិនដំណើរការត្រឹមត្រូវ ហើយភាពតានតឹងនៅទីនោះគឺមិនមែនបង្កដោយសារលោកស្រី Flournoy ទាំងស្រុងទេ។
សារព័ត៌មាន Politico បានសម្ភាសន៍បុគ្គលិកនៃខុទ្ទកាល័យរបស់លោកស្រី Harrisទាំងបច្ចុប្បន្ន និងអតីត រាយការណ៍ថានាយខុទ្ទកាល័យ Flourny បានបង្កើតបរិស្ថានធ្វើការដោយលែកមួយក្នុងគោលបំណងការពារលោកស្រី Harris ប៉ុន្តែធ្វើឱ្យការទំនាក់ទំនងដោយផ្ទាល់ និងការទុកចិត្តធ្លាក់ចុះរវាងលោកស្រី Harris ជាមួយនឹងមន្ត្រីជាន់ខ្ពស់ ទីប្រឹក្សា ជំនួយការ បុគ្គលិកសំខាន់ៗ និងសម្ព័ន្ធមិត្តនយោបាយ។ ពួកគេបានលើកឧទាហរណ៍អំពីការរៀបចំទស្សនកិច្ចរបស់លោកស្រី Harris ទៅព្រំដែនអាមេរិក-មិកស៊ិកកាលពីចុងខែមិថុនា ដោយកាលនោះការសម្រេចចិត្តធ្វើទស្សនកិច្ចនេះត្រូវបានប្រកាសទៅកាន់បុគ្គលិកត្រឹមតែប៉ុន្មានថ្ងៃមុនកាលបរិច្ឆេទត្រូវធ្វើ នាំឱ្យមានភាពភ្ញាក់ផ្អើលយ៉ាងខ្លាំង ធ្វើឱ្យបុគ្គលិកជាច្រើនមានភាពច្របូកច្របល់ ជាពិសេសមន្ត្រីទទួលបន្ទុករៀបចំការធ្វើដំណើរ។
ប្រភពផ្សេងទៀតបានចោទប្រកាន់លោកស្រី Harris ថាជាអ្នកបង្កភាពមិនដំណើរការត្រឹមត្រូវនេះ។ មន្ត្រីរដ្ឋបាលមួយរូបបាននិយាយដោយមិនបញ្ចេញឈ្មោះថា៖ «វា(បញ្ហា)គឺចាប់ផ្ដើមពីថ្នាក់លើ»។ ប្រភពមួយទៀតបាននិយាយថាខុទ្ទកាល័យលោកស្រី Harris គឺ «មិនមែនជាបរិស្ថានល្អទេ ហើយជារឿយៗ មនុស្សមានអារម្មណ៍ថាត្រូវគេធ្វើបាប។ វាមិនមែនជាកន្លែងដែលមនុស្សមានអារម្មណ៍ថាបានទទួលការគាំទ្រនោះទេ ប៉ុន្តែជាកន្លែងដែលមនុស្សមានអារម្មណ៍ថាត្រូវបានគេចាត់ទុកដូចជាលាមក»។
ភាពមិនដំណើរការត្រឹមត្រូវនៃជួរបុគ្គលិករបស់អនុប្រធានាធិបតីអាចធ្វើឱ្យស្មុគស្មាញដល់រូបភាពដែលរៀបចំឡើងដើម្បីបង្ហាញថារដ្ឋបាលចូ បៃដិនគឺគ្រប់គ្រងដោយអ្នកជំនាញដែលមានទំនាក់ទំនងជិតស្និត ហើយព្យាយាមធ្វើការស្របគ្នាដើម្បីបំពេញគោលបំណងរបស់លោកប្រធានាធិបតី។
ការសន្ទនាកំពុងតែដំណើរការនៅក្នុងសេតវិមានអំពីវិធីដើម្បីគាំទ្រដល់ក្រុមរបស់អនុប្រធានាធិបតី Harris។ ជំនួយពីសេតវិមាន គឺជាសញ្ញាមួយដែលបង្ហាញថារឿងអាស្រូវនេះ អាចនឹងចាប់ផ្តើមប៉ះពាល់ដល់លោកស្រី Harris ដែលត្រូវបានគេចាត់ទុកថាស្នងតំណែងជាមេដឹកនាំគណបក្សប្រជាធិបតេយ្យ ដោយមានសក្ដានុពលឈរឈ្មោះបោះឆ្នោតប្រធានាធិបតីនៅឆ្នាំ ២០២៤ បើសិនលោកបៃដិនជ្រើសរើសថានឹងមិនឈរឈ្មោះម្ដងទៀត។
ដូច្នេះមន្ត្រីជាន់ខ្ពស់សេតវិមាន និងជំនួយការរបស់អនុប្រធានាធិបតីជាច្រើនបានចេញមុខមកការពារលោកស្រី Harris និង Flourny។
នាយខុទ្ទកាល័យរបស់លោកប្រធានាធិបតីបៃដិន លោក Ron Klain ដែលជាមិនជិតស្និតរបស់ Floumy បានចេញសេចក្ដីថ្លែងការណ៍មួយថា៖ «អនុប្រធានាធិបតីHarris និងក្រុមរបស់លោកស្រីបានចាប់ផ្តើមដំណើរការលឿនបំផុតនិងខ្លាំងបំផុតក្នុងចំណោមអនុប្រធានណាមួយដែលខ្ញុំបានឃើញ។ លោកស្រីបានផ្តល់ជូនប្រជាជនអាមេរិកលើបញ្ហាអន្តោប្រវេសន៍ អាជីវកម្មខ្នាតតូច សិទ្ធិបោះឆ្នោត និងកំណើនសេដ្ឋកិច្ច។ ការជឿជាក់និងទំនុកចិត្តរបស់លោកប្រធានាធិបតី ចំពោះលោកស្រីគឺច្បាស់នៅពេលដែលអ្នកឃើញពួកគេនៅក្នុងការិយាល័យសេតវិមានជាមួយគ្នា»។
លោកស្រី Symone Sanders ទីប្រឹក្សាជាន់ខ្ពស់ និងជាអ្នកនាំពាក្យរបស់លោកស្រីHarris បានច្រានចោលការចោទប្រកាន់ទាំងនេះ ហើយបានការពារលោកស្រី Flournoy ដោយនិយាយថាលោកស្រីមាន«គោលនយោបាយទ្វារបើកចំហ» ហើយបន្តថា៖ «ស្ត្រីស្បែកខ្មៅដូចខ្ញុំនឹងមិនមានឱកាសធ្វើការនៅក្នុងឆាកនយោបាយដោយគ្មាន Tinaទេ។ ចំពោះក្រុមអ្នករិះគន់លោកស្រី Flournoy ដោយអនាមិកលោកស្រីបាននិយាយថា «មនុស្សបែបនេះគឺជាមនុស្សកំសាក បើធ្វើតាមវិធីនេះ»។
ប៉ុន្តែការខិតខំការពារខ្លះបានជួយពង្រឹងរបាយការណ៍ថាបុគ្គលិកមិនពេញចិត្តនឹងធ្វើការនៅទីនោះ។ លោកស្រី Anita Dunn ដែលជាទីប្រឹក្សាជាន់ខ្ពស់នៅសេតវិមាន មិនបានច្រានចោលការចោទប្រកាន់ទាំងនេះទេ ប៉ុន្តែបាននិយាយថាការចោទប្រកាន់ទាំងនេះគឺមិនដល់កម្រិតដែលបានរៀបរាប់ដោយប្រភពទាំងនោះទេ ហើយទទួលស្គាល់ថាបុគ្គលិកខ្លះមានការអាក់អន់ចិត្តមិនត្រូវបានគេប្រាប់ថានឹងមានទស្សនៈកិច្ចទៅព្រំដែនខាងត្បូង។
បន្ថែមពីលើការចោទប្រកាន់ទាំងនេះ មន្ត្រីជាន់ខ្ពស់ចំនួនពីររូបនៃខុទ្ទកាល័យអនុប្រធានាធិបតី បានលាលែងពីតំណែង ប៉ុន្តែរដ្ឋបាលបាននិយាយថាការចាកចេញទាំងពីរនេះគឺបានគ្រោងទុកមិន។
Source:
https://www.politico.com/news/2021/06/30/kamala-harris-office-dissent-497290
https://edition.cnn.com/2021/07/02/politics/kamala-harris-office-dynamics/index.html
