អង្គការសហប្រជាជាតិបារម្មណ៍ពី ស្ថានភាពដុនដាបនៅមីយ៉ាន់ម៉ា អាចបង្កអសន្តិសុខក្នុងតំបន់
មឹង ច័ន្ទសុម៉ានីតា
កាលពីថ្ងៃអង្គារ ទី ៦ កក្កដា ប្រធានភ្នាក់ងារសិទ្ធមនុស្សនៃអង្គការសហប្រជាជាតិបាននិយាយថាស្ថានភាពដ៏អាក្រក់នៅក្នុងប្រទេសមីយ៉ាន់ម៉ាតាំងពីរដ្ឋប្រហារខែកុម្ភៈ គឺកំពុងជំរុញប្រទេសនេះឆ្ពោះទៅរកសង្គ្រាមស៊ីវិល ហើយអាចបង្កអសន្តិសុខក្នុងតំបន់។
ថ្លែងនៅចំពោះមុខ ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ ឧត្ដមស្នងការសិទ្ធមនុស្សអង្គការសហប្រជាជាតិលោកស្រី Micehelle Bachelet បានសម្ដែងការសោកស្ដាយថាប្រទេសមីយ៉ាន់ម៉ាក្នុងរយៈពេលប៉ុន្មានខែចុងក្រោយនេះ«បានវិវត្តពីវិបត្តិនយោបាយទៅជាមហន្តរាយសិទ្ធិមនុស្សពហុវិមាត្រ»។
លោកស្រីបានបន្តទៀតថា៖ «ការរងទុក្ខ និងអំពើហិង្សានៅទូទាំងប្រទេស គឺកំពុងបំផ្លាញការរំពឹងទុកសម្រាប់ការអភិវឌ្ឍប្រកបដោយចិរភាព ហើយបង្កើនលទ្ធភាពនៃការបរាជ័យរបស់រដ្ឋ ឬការផ្ទុះសង្គ្រាមស៊ីវិល»។
លោកស្រីបាននិយាយថាចាប់តាំងពីមានរដ្ឋប្រហារមក មានមនុស្សជិត ៩០០ នាក់ត្រូវបានសម្លាប់ ខណៈពេលដែលមនុស្សប្រមាណ ២០០.០០០ នាក់ត្រូវបានបង្ខំឲ្យភៀសខ្លួនចេញពីគេហដ្ឋានរបស់ពួកគេ។ ជាមួយគ្នានេះដែរ យ៉ាងហោចណាស់មនុស្ស ជាង៥.២០០ នាក់ត្រូវបានគេចាប់ខ្លួនតាមអំពើចិត្ត ដែលរួមមានអ្នកកាសែត ជាង ៩០ នាក់ផងដែរ ខណៈពេលដែលប្រព័ន្ធផ្សព្វផ្សាយធំៗ ចំនួន ៨ ត្រូវបានបង្ខំឱ្យបិទទ្វារ។
លោកស្រី Bachelet ក៏បានបង្ហាញ របាយការណ៍ជាច្រើនអំពី «ការបំបាត់ខ្លួនដោយបង្ខំ ការធ្វើទារុណកម្មយ៉ាងសាហាវ និងការស្លាប់នៅក្នុងជាប់ឃុំ» រួមជាមួយការចាប់ខ្លួនសាច់ញាតិនិងសូម្បីតែកូនៗ របស់មនុស្សដែលអាជ្ញាធរកំពុងស្វែងរក។
មីយ៉ាន់ម៉ាបានឆ្លងកាត់ ការតវ៉ាទ្រង់ទ្រាយធំ និងការវាយប្រហារពីកងយោធាដ៏ឃោរឃៅចាប់តាំងពីរដ្ឋប្រហារថ្ងៃទី ១ កុម្ភៈដែលបានទម្លាក់មេដឹកនាំស៊ីវិលលោកស្រី អ៊ុងសានស៊ូជី ។ លោកស្រី Bacheletបានមាននិយាយថា៖ «អ្វីដែលបានចាប់ផ្ដើមជាការធ្វើរដ្ឋប្រហាររបស់យោធាមីយ៉ាន់ម៉ា បានឈានដល់ការវាយប្រហារមួយប្រឆាំងនឹងជនស៊ីវិល ដែលបានរីករាលដាលនិងមានលក្ខណៈជាប្រព័ន្ធ»។
ប្រភព៖
‘Catastrophic’ Myanmar situation imperils wider region: UN