បុគ្គលិកដោះមីនជិត ២០០នាក់ ដែលកំពុងជាប់ធ្វើចត្តាឡីស័កនៅស្រុកសំឡូត បានទទួលអំណោយពីសម្ដេចតេជោ និងសម្ដេចកិត្តិព្រឹទ្ធបណ្ឌិត
អនុប្រធានទី១អាជ្ញាធរមីនកម្ពុជាលោក ទេសរដ្ឋមន្ត្រីលី ធុជ នៅព្រឹកថ្ងៃទី២២កក្កដាឆ្នាំ២០២១ បានប្រគល់នូវគ្រឿងឧបភោគបរិភោគ និងថវិកាដែលជាអំណោយរបស់សម្តេចតេជោនាយករដ្ឋមន្ត្រី ជូនដល់បុគ្គលិកដោះមីនបម្រើការងារនៅអង្គការ MAG ចំនួន១៨៤នាក់ ដែលកំពុងជាប់ធ្វើចត្តាឡីស័កនៅស្រុកសំឡូត ខេត្តបាត់ដំបង ។
រដ្ឋបាលខេត្តបាត់ដំបងបានឲ្យដឹងថា បុគ្គលិកដែលត្រូវធ្វើចត្តាឡីស័ក មានចំនួន១៨៤នាក់ ដែលជាអ្នកប៉ះពាល់ ដោយប្រយោល ជាមួយអ្នកកើតជម្ងឺកូវីដ-១៩ ជាបុក្គលិកអង្គការMAGដូចគ្នា ហើយគ្រោងនឹងបញ្ចប់ ចត្តាឡីស័កនៅថ្ងៃទី២៦ខែកក្កដាឆ្នាំ២០២១ខាងមុខ។ ក្រោយពីរកឃើញបុគ្គលិកវិជ្ជាមានកូវីដ-១៩ចំនួន៣នាក់ខាងលើកនោះភ្លាម រដ្ឋបាលស្រុក បានរៀបចំវិធានការទប់ស្កាត់ដោយឲ្យបុគ្គលិកវិជ្ជាមានចំនួន៣នាក់ទៅព្យាបាលកម្រិតស្រាលនៅវិទ្យាល័យសម្តេចឪក្រុងបាត់ដំបង។
ដោយឡែក អ្នកប៉ះពាល់ផ្ទាល់ និងប្រយោល ត្រូវបិទខ្ទប់ នៅតាមការិល័យរបស់អង្គការម៉ែកចំនួន៤ទីតាំងស្ថិតនៅឃុំមានជ័យ១ទីតាំងនិងឃុំស៊ុងចំនួន៣ទីតាំងដោយមិនអនុញ្ញាត ឲ្យដើរហើរដោយសេរីនោះទេ ពោលគឺ រង់ចាំ រយៈពេល ១៤ថ្ងៃ ទើបអនុញ្ញាតឲ្យចេញធ្វើការងារធម្មតាឡើងវិញ។
លោកទេសរដ្ឋមន្ត្រី លី ធុជ មានប្រសាសន៍ថា ការធ្វើចត្តាឡីស័កនោះ គឺស្របតាមគោលការណ៍របស់ក្រសួងសុខាភិបាល និងសេចក្ដីណែនាំ របស់រាជរដ្ឋាភិបាល ដើម្បីទប់ស្កាត់ការឆ្លងរីករាលដាល នៃជម្ងឺកូវីដ-១៩ ។ អំណោយជាគ្រឿងឧបភោគបរិភោគទាំងនោះ មានការចូលរួមចំណែកឧបត្ថម្ភពីអាជ្ញាធរមីន សាខាកាកបាទក្រហមកម្ពុជាខេត្តបាត់ដំបង និងមូលនិធិ Sir Bobby Charlton ប្រចាំកម្ពុជា រួមមាន អង្ករ, ទឹកបរិសុទ្ធ, ទឹកស៊ីអ៊ីវ, មី, ត្រីខកំប៉ុង, សាច់ក្រក, ត្រីងៀត, ម៉ាស់ និងអាកុល ។
ក្រៅពីគ្រឿងឧបភោគបរិភោគ លោកទេសរដ្ឋមន្ត្រី លី ធុជ ក៏បាននាំយកនូវថវិកាឧបត្ថម្ភដល់អ្នកវិជ្ជមានកូវីដជាបុគ្គលិកអង្គការ MAG ចំនួន ៣នាក់ ដោយក្នុងម្នាក់ ៥០ម៉ឺនរៀល និងថវិកា៤លានរៀលទៀត សម្រាប់ការងារធ្វើចត្តាឡីស័កនោះផងដែរ។ សូមបញ្ជាក់ថា អង្គការ MAG បានបម្រើការងារសកម្មភាពមីនមនុស្សធម៌នៅកម្ពុជាចាប់តាំងពីឆ្នាំ ១៩៩២ ហើយបច្ចុប្បន្ននេះ មានបុគ្គលិកចំនួន ៦១០ នាក់ ក្នុងនោះបុគ្គលិកបរទេសចំនួន ៧នាក់ ប្រតិបត្តការការងារនៅខេត្តចំនួន៣ រួមមាន ខេត្តបាត់ដំបង ខេត្តប៉ៃលិន និងខេត្តរតនគីរី ។
គិតត្រឹមខែធ្នូ ឆ្នាំ២០២០ អង្គការ MAG បានរំដោះផ្ទៃដីមានមីន និងសំណល់ជាតិផ្ទុះពីសង្គ្រាម ប្រមាណ ៩៥ គីឡូម៉ែត្រក្រឡា រកឃើញនិងកម្ទេចមីនប្រឆាំងមនុស្សបានចំនួន ៨ម៉ឺន១ពាន់៤៧ គ្រាប់ មីនប្រឆាំងរថក្រោះ ១ពាន់២៤០ គ្រាប់ និងគ្រាប់មិនទាន់ផ្ទុះ ២៦ម៉ឺន៩ពាន់៦៧៤គ្រាប់។