អាជ្ញាធរជាតិអប្សរាបានប្រទះឃើញចម្លាក់បុរាណជាច្រើនក្នុងពេលធ្វើកំណាយបុរាណវិទ្យាជួសជុលខ្លោងទ្វារ តាកាវ។ ខ្លោងទ្វារតាកាវ ដែលស្ថិតនៅទិសខាងលិចនៃប្រាសាទបាយ័ន្ត ត្រូវបានបើកការដ្ឋានជួសជុល ចាប់តាំង ពីថ្ងៃទី២១កុម្ភៈ ឆ្នាំ២០២១ កន្លងមក។ អាជ្ញាធរជាតិអប្សរានៅថ្ងៃទី២២កក្កដានេះ បានឲ្យដឹងថា  ក្នុងរយៈពេល៣ សប្តាហ៍នៃការធ្វើកំណាយ បុរាណវិទ្យាស្រាវជ្រាវដើម្បីធ្វើការជួសជុលខ្លោងទ្វារតាកាវ និងចម្លាក់យក្ស និងទេវតា លើស្ពានហាលនៃខ្លោង ទ្វារតាកាវ បានរកឃើញរូបចម្លាក់និងបំណែកវត្ថុបុរាណមួយចំនួន។ មន្ត្រីផ្នែកបុរាណ វិទ្យានៃអាជ្ញាធរជាតិ អប្សរាលោកស្រី គឹម សេងភក្តី បានថ្លែងថាគេបានរកឃើញក្បាលយក្សចំនួន៣នៅពេញល្អ ឯក្បាល៣ទៀត មានត្រឹមតែពាក់កណ្តាល។ ចំពោះដងខ្លួនអាសុរៈបានរកឃើញចំនួន៤។ រីឯព្រះសិរទេវតាបាន រកឃើញចំនួន៣ ក្នុងនោះចំនួន២នៅពេញល្អ និង១ទៀតមានត្រឹមពាក់កណ្តាលស្មាដល់បបូរមាត់។