ណាណា បង្ហាញពីបំណងចង់ចាក់វ៉ាក់សាំង ឃ្លីបវីដេអូណាណា ត្រូវបានសម្តេចតេជោ ហ៊ុន សែន បង្ហោះលើគេហទំព័រ Facebook
ភ្នំពេញ៖ ក្មេងស្រីតូចម្នាក់ដែលមានគណនីហ្វេសប៊ុកឈ្មោះ អូន ណាណា ទាំងស្អាត ទាំងឆ្លាត ថែមទាំងពូកែសម្តីក្បោះក្បាយចាក់ទឹកមិនលិចទៀតនោះ បានបង្ហោះវីដេអូឃ្លីបខ្លីមួយ បង្ហាញអំពីបំណងចង់ចាក់វ៉ាក់សាំងការពារជំងឺកូវីដ-១៩ ទទួលបានការចាប់អារម្មណ៍ខ្លាំង នៅលើបណ្ដាញសង្គមក្នុងប្រទេសកម្ពុជា ជាពិសេសត្រូវបានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា យកវីដេអូ មកចែករំលែកបន្ត លើគេហទំព័រ Facebook ។
នៅលើហ្វេសប៊ុកផេកផ្លូវការរបស់សម្តេចតេជោ ហ៊ុន សែន កាលពីថ្ងៃទី២៥ កក្កដា ២០២១ បានបង្ហោះវីដេអូក្មេងស្រីឈ្មោះ ណាណា អមដោយសារថា «សូមស្ដាប់ចៅ ណាណា និយាយ អំពីបំណងចង់ចាក់វ៉ាក់សាំងការពារកូវីដ-១៩» ។ សម្តេចតេជោ ហ៊ុន សែន ក៏សូមអភ័យទោសពីឪពុកម្តាយចៅស្រី (ណាណា) ដែលសម្តេចតេជោ យករូបចៅណាណា មកបង្ហោះដោយគ្មានការអនុញ្ញាតិ ។
សម្ដេចតេជោ ហ៊ុន សែន នាយករដ្ឋមន្ត្រីកម្ពុជា ក៏បានសរសេរនៅក្នុង(ខមិន)ទៀតថា «អរគុណក្មួយស្រី (ឈ្មោះលើហ្វេសប៊ុក La Lune) ដែលបានផ្តលដំណឹង ក្នុងនាមជាម្តាយរបស់ ណាណា ។ ចៅ ណាណា ជាក្មេងវៃ ឆ្លាតពីកំណើត គួបផ្សំជាមួយការអប់រំល្អពីឪពុកម្តាយ និងក្រុមគ្រួសារទៀត ណាណា ពិតជាមានអនាគតល្អ ។ ចង់ជួយដល់ ណាណា តែមិនដឹងថា នៅឯណា ? ប្រសិនក្មួយផ្តល់លេខទូរស័ព្វឲ្យបាន សម្ដេចតេជោ ហ៊ុន សែន នឹងឲ្យជំនួយការទាក់ទងទៅ ឬក្មួយទាក់ទងមកលោក សេង ទៀង ក៏បាន » ៕
