បញ្ហាគ្មានផ្ទះសម្បែងរស់នៅរបស់ប្រជាជានអូស្ត្រាលី នៅតែជាបញ្ហារ៉ាំរៃមិនអាចដោះស្រាយបាន
មានមនុស្សជាង ១១៦.០០០ នាក់គ្មានផ្ទះសម្បែងសម្រាប់ស្នាក់នៅ ក្នុងប្រទេសអូស្ត្រាលី ហើយចំនួន នេះកំពុងកើនឡើងគ្រប់ពេលវេលា។ ទីក្រុង Melbourne ជារឿយៗត្រូវបានគេចាត់ទុកថា ជាទីក្រុងមួយក្នុងចំណោមទីក្រុង ដែលមានលក្ខខណ្ឌសមរម្យអាចឲ្យប្រជាពលរដ្ឋរស់នៅបានប្រកបដោយផាកសុកភាពតាមស្ដង់ដារបស់ពិភពលោក។ ហើយភាគច្រើនទីក្រុងនេះគឺ សំបូរទៅដោយ ភោជនីយដ្ឋាន និងបារ កន្លែងរៀបចំព្រឹត្តិការណ៍កីឡាអន្តរជាតិនិងជាកន្លែងសម្តែងសិល្បៈនិងតន្រ្តីយ៉ាងរីកចម្រើនមួយ។
ប៉ុន្តែទោះបីជាមានលក្ខខណ្ឌល្អដូចរៀបរាប់ខាងលើក៏ដោយ ជាក់ស្តែងការធ្វើជំរឿនចុងក្រោយនៅឆ្នាំ ២០១៦ បានឲ្យដឹងថាមានមនុស្សជិត ២៥.០០០ នាក់ដែលកំពុងជួបប្រទះភាពគ្មានផ្ទះសម្បែងសម្រាប់ស្នាក់នៅ។
នៅទូទាំង ប្រទេសអូស្រ្តាលីជនគ្មានផ្ទះសម្បែងកំពុងកើនឡើងដោយយផងតាមជំរឿនប្រជាជនឆ្នាំ ២០១៦ បង្ហាញពីការកើនឡើងជិត ១៤ ភាគរយក្នុងរយៈពេល ៥ ឆ្នាំ។
ស្ថិតិនេះកាន់តែគួរឱ្យភ្ញាក់ផ្អើល បើសិនយើងពិចារណា លើការពិតមួយដែល ប្រទេសអូស្រ្តាលី ឈរនៅលើកំពូលតារាងសម្រាប់ប្រជាជនដែលមានទ្រព្យសម្បត្តិក្នុងក្របខណ្ឌសកលឆ្នាំ ២០១៨ ។ តម្លៃផ្ទះជាមធ្យម នៅក្នុងទីក្រុងដូចជា Melbourne និង Sydney មានតម្លៃប្រហែល ៧៣៧,០០០ ដុល្លារអាមេរិក ដែលជាតម្លៃមួយដែលថ្លៃខ្ពស់។
កញ្ញាAnna Paris គឺជាអ្នកគ្រប់គ្រងប្រតិបត្តិការ នៅ Sacred Heart Mission ដែលជាអង្គការក្រៅរដ្ឋាភិបាលមួយដែលមានមូលដ្ឋាននៅទីក្រុងMelbourne ហើយអង្គការនេះផ្តល់ជូនសេវាកម្មជាច្រើនដល់អ្នកដែលជួបប្រទះបញ្ហាគ្មានផ្ទះសម្បែង រួមទាំងជួយកម្មវិធីអាហារនិងផ្ទះបណ្តោះអាសន្នដែលមានសុវត្ថិភាពសម្រាប់ស្ត្រីជាដើម។
នាងនិយាយថា ភាពគ្មានផ្ទះសម្បែង ជារឿយៗកើតឡើងដោយសារកត្តាដូចជាអំពើហឹង្សាក្នុងគ្រួសា ស្នាមរបួសផ្លូវចិត្តតាំងពីកុមារភាពនិងការប្រើប្រាស់សារធាតុថ្នាំញៀនមិនល្អជាដើម។ តាមពិតអំពើហឹង្សាក្នុងគ្រួសារ គឺជាបុព្វហេតុចម្បងនៃភាពគ្មានផ្ទះសម្បែងនៅក្នុងប្រទេស។ ដូច្នេះស្ត្រីមានចំនួនស្ទើរតែពាក់កណ្តាល នៃប្រជាជនទាំងអស់ដែលជួបប្រទះភាពគ្មានផ្ទះសម្បែង។
ការស៊ើបអង្កេតរបស់សភាអូស្ត្រាលី នាពេលថ្មីៗនេះបានរាយការណ៍ថា នៅឆ្នាំ ២០១៦-១៧ យ៉ាងហោចណាស់មានមនុស្សមួយភាគបួន ដែលគ្មានផ្ទះសម្បែង បានបង្ហាញថាពួកគេមានបញ្ហាសុខភាពផ្លូវចិត្ត។
ការស៊ើបអង្កេតបានបញ្ជាក់បន្ថែមទៀតថា ភាពឯកោនិងរបួសផ្លូវកាយដោយសារការគ្មានផ្ទះសម្បែងអាចនាំឱ្យមាន ការចាប់ផ្តើមនៃវិបត្តិផ្លូវចិត្ត។ អង្គការសុខភាពផ្លូវចិត្ត ដូចជាអង្គការ Open Minds បានបញ្ជាក់ថា ភាពគ្មានផ្ទះសម្បែងអាចបណ្តាលឱ្យមានការថប់បារម្ភ ការធ្លាក់ទឹកចិត្ត ភាពតានតឹងនិងការគេងមិនលក់ដែលជារឿយៗ នាំឱ្យមានការឈានដល់ការប្រើប្រាស់ សារធាតុញៀនផងដែរ។
រដ្ឋ Victoria ត្រូវបានគេរិះគន់ថា មិនត្រឹមតែខ្វះផ្ទះសម្បែងធំបំផុតនៅក្នុងប្រទេសអូស្ត្រាលីប៉ុណ្ណោះទេ ប៉ុន្តែក៏ជារដ្ឋមួយដែលចំណាយតិចបំផុតដើម្បីដោះស្រាយ បញ្ហានេះ។ ទោះយ៉ាងណាថ្មីៗនេះរដ្ឋាភិបាលបានចាត់វិធានការដើម្បីដោះស្រាយ បញ្ហានេះដោយធ្វើការស៊ើបអង្កេត អំពីភាពគ្មានផ្ទះសម្បែង នៅក្នុងរដ្ឋនិងប្រកាសបង្កើតមូលនិធិដើម្បីសាងសង់ផ្ទះសាធារណៈថ្មី។
