ទិនហ្វី កំពុងមានទំនាក់ទំនងស្នេហាជាមួយនារីវ័យក្មេងម្នាក់?
តារាសម្តែងនិងផលិតករភាពយន្តដ៏ល្បី លោក stephen chow ដែលនៅខ្មែរ គេនិយមហៅ ទិនហ្វី ត្រូវបានបណ្តាញសារព័ត៌មានចុះផ្សាយថា លោកកំពុងមានទំនាក់ទំនងស្នេហាជាមួយ នារីវ័យ១៧ឆ្នាំម្នាក់ ប៉ុន្តែត្រូវបាន ទិនហ្វី បដិសេធ។
នារីរូបនេះមានឈ្មោះថា Ukei Cheung ធ្លាប់បានប្រឡងក្នុងកម្មវិធីបវរកញ្ញាហុងកុង ឆ្នាំ២០២១។ ការសង្ស័យបានកើតឡើង ខណៈដែលគេឃើញនាងមានវត្តមានជាមួយ ទិនហ្វី នៅលើនាវាកម្សាន្តមួយរបស់ទិនហ្វី កាលពីពេលថ្មីៗនេះ។ គួរកត់សម្គាល់ថា តារាពូកែខាងសម្តែងបែបកម្លែង វ័យ៥៩ឆ្នាំរូបនេះ កន្លងមក តែងតែមានទំនាក់ទំនងស្នេហាជាមួយនារី វ័យក្មេងៗ ដូចជា នាង Alice Yu Manfung ដែលបានបញ្ចប់កាលពីឆ្នាំ២០១០ ជាមួយតារាសម្តែងនិងតារាចម្រៀង Karen Mok និង Athena Chuជាដើម។ ពេលឃើញការចុះផ្សាយរបស់ Headline Daily មានការលើកឡើងមតិផ្សេងគ្នា ខ្លះថា ដូចតានិងចៅ ខ្លះថា អាចជាតួសម្តែងរឿងថ្មីរបស់ ផលិតកររូបនេះ។
យ៉ាងណាក៏ដោយ ជំនួយការរបស់ទិនហ្វីបានចេញមុខបញ្ជាក់ថា ទិនហ្វីនិងនាងគ្មានទំនាកទំងស្នេហាជាមួយគ្នាទេ តែពេលសួរពីរឿងវត្តមាននៅលើនាវា ជំនួយការថា ថ្ងៃនោះ មានមនុស្សយ៉ាងច្រើននៅលើនាវា ហើយនាងក៏ធ្លាប់បានសុំឲ្យ ទិនហ្វី ជិះទូកក្តោងលេង កាលពីប៉ុន្មានថ្ងៃមុនដែរ ប៉ុន្តែទិនហ្វីបដិសេធ ដោយសារតែមិនបានស្គាល់គ្នាស្និទ «ខ្ញុំមិនយល់មិនដឹងថា គេចុះផ្សាយយ៉ាងម៉េច ខណៈដែលគេឃើញទាំងអស់គ្នាហើយថា នៅលើនាវានោះ មានមនុស្សលេងច្រើនគ្នាណាស់»៕