អ្នកស្រីហារីស ចូលរួមក្នុងយុទ្ធនាការការទូតនៅអាស៊ីអាគ្នេយ៍ ខណៈពេលដែលអាមេរិកចាកចេញពីអាហ្វហ្គានីស្ថាន
កាលពីយប់ថ្ងៃអង្គារនេះ អនុប្រធានាធិបតីសហរដ្ឋអាមេរិកអ្នកស្រីកាម៉ាឡា ហារីសបានធ្វើដំណើរមកដល់ប្រទេសវៀតណាម ក្នុងផ្នែកទីពីរនៃដំណើរទស្សនកិច្ចរបស់អ្នកស្រីនៅតំបន់អាស៊ីអាគ្នេយ៍ ជាតំបន់មួយដែលរដ្ឋបាលលោកប្រធានាធិបតីចូ បៃដិនបានលើកឡើងថាសំខាន់បំផុតសម្រាប់វិបុលភាព និងសន្តិសុខរបស់សហរដ្ឋអាមេរិក។
ដំណើរទស្សនកិច្ចនេះត្រូវបានគេយល់ឃើញថាការព្យាយាមរបស់សហរដ្ឋអាមេរិកដើម្បីពង្រឹងមុខមាត់របស់ខ្លួនជាសម្ព័ន្ធមិត្តដ៏គួរឱ្យជឿទុកចិត្តបានក្នុងការប្រឈមមុខជាមួយប្រទេសចិន ស្របពេលជាមួយការកើនឡើងភាពមិនទុកចិត្តអាមេរិកជាដៃគូរអន្តរជាតិ បន្ទាប់ការដួលរលំរដ្ឋាភិបាលអាហ្វហ្គានីស្ថាន។
ក្នុងរយៈពេលប៉ុន្មានឆ្នាំចុងក្រោយនេះ សេតវិមានមានបំណងផ្លាស់ប្ដូរយុទ្ធសាស្ត្រគោលនយោបាយការបរទេសរបស់សហរដ្ឋអាមេរិក មកផ្ដោតលើការប្រកួតប្រជែងជាមួយឥទ្ធិពលសេដ្ឋកិច្ចដែលកំពុងកើនឡើងរបស់ចិនជាជាងការបន្តធ្វើ «សង្គ្រាមមិនដែលចប់» ដូចជាជម្លោះរយៈពេលពីរទសវត្សនៅអាហ្វហ្គានីស្ថាន។
លោកប្រធានាធិបតីបារ៉ាក់ អូបាម៉ា មានយុទ្ធសាស្ត្រ «បង្វែរមកអាស៊ី» មានគោលបំណងបង្វែរទិសដៅការទូតរបស់អាមេរិកឱ្យឆ្ងាយពីមជ្ឈិមបូព៌ា ឆ្ពោះទៅរកអាស៊ី-ប៉ាស៊ីហ្វិកវិញ ហើយក្រោយមកលោកប្រធានាធិបតីដូណាល់ ត្រាំមានយុទ្ធសាស្ត្រ «ឥណ្ឌូ-ប៉ាស៊ីហ្វិកសេរី និងបើកចំហ» មានគោលបំណងប្រឆាំងនឹងឥទ្ធិពលរបស់ចិនដោយផ្ទាល់។ ប៉ុន្តែយុទ្ធសាស្ត្រទាំងពីរនេះគឺគ្រាន់តែគំនិតអរូបីប៉ុណ្ណោះ ហើយមិនបានដោះស្រាយបញ្ហាការយល់ឃើញអំពីការធ្លាក់ចុះកិត្យានុភាពរបស់អាមេរិកនៅតំបន់នេះ។
ដូច្នេះបន្ទាប់ពីភាពអាម៉ាស់នៅអាហ្វហ្គានីស្ថានតើអ្នកស្រីអនុប្រធានាធិបតីអាចបញ្ចុះបញ្ចូលម្ចាស់ផ្ទះសិង្ហបុរី និងវៀតណាមថាលោកប្រធានាធិបតីបៃដិននឹងធ្វើបានល្អជាងនេះដែរ ឬទេ?
នេះមានន័យថាអ្នកស្រីហារីសត្រូវផ្ដល់ទំនុកចិត្តដល់បណ្ដាប្រជាជាតិឥណ្ឌូ-ប៉ាស៊ីហ្វិកអំពីភាពជឿជាក់ទៅលើរដ្ឋបាលលោកបៃដិន ហើយនៅពេលតែមួយត្រូវប្រឈមនឹងសំណួរថាតើសហរដ្ឋអាមេរិកបានបោះបង់ចោលសម្ព័ន្ធមិត្តរបស់ខ្លួននៅអាហ្វហ្គានីស្ថានឬយ៉ាងណា។
ក្នុងសន្និសីទសារព័ត៌មានជាមួយនាយករដ្ឋមន្ត្រីសិង្ហបុរីកាលពីថ្ងៃចន្ទ ដែលពោរពេញទៅដោយសំណួរពាក់ព័ន្ធទៅនឹងប្រទេសអាហ្វហ្គានីស្ថាន អ្នកស្រីហារីស និយាយថា៖ «ខ្ញុំឈរនៅទីនេះដោយសារតែការប្តេជ្ញាចិត្តរបស់យើងចំពោះទំនាក់ទំនងដ៏យូរអង្វែងជាមួយតំបន់ឥណ្ឌូ-ប៉ាស៊ីហ្វិក ជាមួយបណ្តាប្រទេសអាស៊ីអាគ្នេយ៍ និងជាពិសេសជាមួយសិង្ហបុរី»។ អ្នកស្រីនិយាយថារដ្ឋបាលលោកបៃដិនគឺកំពុងយោងចិត្តទុកដាក់លើការជម្លៀសពលរដ្ឋអាមេរិក និងសម្ព័ន្ធមិត្តអាហ្វហ្គានីស្ថាន។
សម្ពាធនោះទំនងជាកើនឡើងនៅពេលអ្នកស្រីហារីសមានកិច្ចប្រជុំជាបន្តបន្ទាប់នៅទីក្រុងហាណូយនៅថ្ងៃពុធ និងថ្ងៃព្រហស្បតិ៍។ ជំនួយការជាន់ខ្ពស់របស់អ្នកស្រីបានប្រឈមមុខនឹងសំណួរអំពីភាពស្រដៀងគ្នានៃប្រវត្តិសាស្ត្ររវាងការជម្លៀសពលរដ្ឋអាមេរិកចេញពីទីក្រុងសៃហ្គនកាលពីឆ្នាំ ១៩៧៥ និងស្ថានការណ៍បច្ចុប្បន្ននៅទីក្រុងកាប៊ុល។ អ្នកស្រីហារីសនឹងមិនអាចជៀសវៀងពីការប្រៀបធៀបនេះបានទេ ប៉ុន្តែលោកស្រីអាចនឹងលើកឡើងអំពីការកសាងទំនាក់ទំនងយុទ្ធសាស្ត្រនិងពាណិជ្ជកម្មរវាងប្រទេសទាំងពីររាប់សិបឆ្នាំបន្ទាប់ពីអាមេរិកដកទ័ពចេញពីវៀតណាម៕
ប្រភព៖ New York Times
