Duterte ប្រកាសពីការឈរឈ្មោះជាអនុប្រធានាធិបតីហ្វីលីពីន ក្រោយអស់អាណត្តិជាប្រធានាធិបតីនៅឆ្នាំក្រោយ
លោក Rodrigo Duterte ប្រធានាធិបតីហ្វីលីពីនបានប្រកាសនៅក្នុងសុន្ទរកថាជូនជនរួមជាតិប្រចាំសប្ដាហ៍កាលពីថ្ងៃអង្គារនេះថា ខ្លួននឹងឈរឈ្មោះជាអនុប្រធានាធិបតីសម្រាប់ការបោះឆ្នោតនៅឆ្នាំ២០២២ បន្ទាប់ពីអាណត្តិប្រធានាធិបតីនឹងបញ្ចប់។ ជំនិតរាប់ទសវត្សរបស់បុរសវ័យ ៧៦ឆ្នាំរូបនេះគឺ លោក Christopher “Bong” Go ដែលបច្ចុប្បន្នជាសមាជិកព្រឹទ្ធសភា នឹងឈរឈ្មោះជាប្រធានាធិបតីអមជាមួយលោក។
នៅហ្វីលីពីន អាណត្តិប្រធានាធិបតីមានរយៈពេល ៦ឆ្នាំ ប៉ុន្តែអាចឡើងកាន់បានតែមួយអាណត្តិប៉ុណ្ណោះ ចំណែកឯអនុប្រធានាធិបតីវិញមានអាណត្តិ ៦ឆ្នាំដូចគ្នា តែអាចកាន់បាន ២អាណត្តិ និងមានការបោះឆ្នោតផ្សេងពីប្រធានាធិបតី។ បន្ថែមពីនេះទៅទៀត អនុប្រធានាធិបតីហ្វីលីពីនអាចមកពីគណបក្សផ្សេងគ្នាពីប្រធានាធិបតី។
«ខ្ញុំនឹងឈរឈ្មោះជាអនុប្រធានាធិបតី បន្ទាប់មកខ្ញុំនឹងបន្តយុទ្ធនាការរបស់ខ្ញុំ។ ទីមួយគឺ បង្ក្រាបចលនាបះបោរ និងបន្ទាប់មកបង្ក្រាបគ្រឿងញៀន»។ នេះបើតាមការលើកឡើងរបស់លោក Duterte។
នៅថ្ងៃពុធ អ្នកនាំពាក្យវិមានប្រធានាធិបតីហ្វីលីពីនលោក Harry Roque បានចេញមុខមកបញ្ជាក់នៅក្នុងកិច្ចសម្ភាសន៍មួយថា លោក Duterte និងលោក Go នឹងមិនឈរឈ្មោះនោះទេ ប្រសិនបើកូនស្រីរបស់លោក Duterte គឺ អ្នកស្រី Sarah Duterte ដែលកំពុងកាន់ការងារជាអភិបាលក្រុង Davao ឈរឈ្មោះធ្វើជាប្រធានាធិបតី៕
ប្រភព៖ CNN
