ឯកឧត្តម ជា វ៉ាន់ដេត ប្រធានគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹកនៃរដ្ឋសភា នៅរសៀលថ្ងៃទី២៨ ខែមករា ឆ្នាំ២០២០ បានដឹកនាំសមាជិកគណៈកម្មការអញ្ជើញទៅកាន់ខេត្តត្បូងឃ្មុំ និងបានជួបពិភាក្សាការងារជាមួយឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តត្បូងឃ្មុំ ឯកឧត្តម ស៊ាក ឡេង ប្រធានក្រុមប្រឹក្សាខេត្ត និងថ្នាក់ដឹកនាំមន្ទីរពាក់ព័ន្ធនឹងវិស័យទទួលបន្ទុករបស់គណៈកម្មការ នៅក្នុងសាលប្រជុំរបស់សាលាខេត្ត។ 

ឯកឧត្តម ជា វ៉ាន់ដេត បានមានប្រសាសន៍ជម្រាបជូនពីគោលបំណងរបស់គណៈកម្មការដែលចុះមកកាន់ខេត្តត្បូងឃ្មុំនាពេលនេះ គឺដើម្បីស្វែងយល់ពីការអនុវត្តច្បាប់នានាលើវិស័យទទួលបន្ទុករបស់គណៈកម្មការ និងប្រមូលព័ត៌មានអំពីប្រសិទ្ធភាពនៃការអនុវត្តន៍ការងារ លទ្ធផលការងារ បញ្ហាប្រឈម ជាពិសេសលើការងារកសិកម្ម ការងារបរិស្ថាន និងការងារធនធានទឹករបស់ខេត្ត។

ថ្នាក់ដឹកនាំរដ្ឋបាលខេត្តត្បូងឃ្មុំ ព្រមទាំងមន្ទីរពាក់ព័ន្ធ បានរាយការណ៍ជូនគណ:កម្មការរដ្ឋសភា អំពីលទ្ធផលការងារសំខាន់ៗដែលសម្រេចបានកន្លងមក ព្រមទាំងបញ្ហាប្រឈមដែលបានជួបប្រទះ ជូនគណៈកម្មការដ្ឋសភាបានជ្រាប។  នៅក្នុងជំនួបពិភាក្សាការងារ ដែលមានលក្ខណៈបែបចំហរ ដើម្បីជំរុញប្រសិទ្ធភាពការងារឲ្យកាន់តែល្អប្រសើរឡើងនេះ ខេត្តនិងមន្ទីរក៏បានលើកឡើងពីផលលំបាកមួយចំនួន មានដូចជាប្រព័ន្ធធារាសាស្ត្រជាច្រើនកន្លែងបានរងការខូចខាត ចាំបាច់ត្រូវមានការជួសជុល និងស្តារឡើងវិញជាបន្ទាន់ ដើម្បីបង្កើនការស្តុកទឹកទុកឱ្យបានច្រើន សម្រាប់ធានាការផ្គត់ផ្គងបំពេញនូវតម្រូវការទឹកបង្កបង្កើនផលស្រូវបានគ្រប់គ្រាន់ តែធនធានថវិកាសម្រាប់ចំណាយលើការអភិវឌ្ឍន៍នៅមានកម្រិតតិចតួច មិនឆ្លើយតបទីនឹងតម្រូវការជាក់ស្តែងនៅក្នុងកិច្ចដំណើរអនុវត្តគម្រោងនូវឡើយ។

មន្ទីរពាក់ព័ន្ធមានការខ្វះមន្ត្រីបម្រើការងារ ខ្វះថវិកា ខ្វះសម្ភារបរិក្ខាសម្រាប់ប្រើប្រាស់ ហើយកម្រិតយល់ដឹងនិងបទពិសោធន៍បច្ចេកទេសនៅមានកម្រិត ហើយនៅមានជនខិលខូចបង្កបទល្មើសព្រៃឈើ សត្វព្រៃ ជលផល ជាពិសេសពេលយប់និងតំបន់ឆ្ងាយៗ។ រដ្ឋបាលខេត្តក៏បានលើកពីសំណូមពរ ជូនគណៈកម្មការជំនាញរដ្ឋសភាជួយធ្វើអន្តរាគមន៍ ដើម្បីរកដំណោះស្រាយនូវរាល់បញ្ហា ដែលបានជម្រាបជូនដូចខាងលើ។  ឯកឧត្តម ជា វ៉ាន់ដេត ប្រធានគណៈកម្មការទី៣នៃរដ្ឋសភា បានវាយតម្លៃខ្ពស់ចំពោះថ្នាក់ដឹកនាំខេត្តត្បូងឃ្មុំ និងមន្ទីរពាក់ព័ន្ធដែលបានខិតខំប្រឹងប្រែងធ្វើការបម្រើប្រជាពលរដ្ឋបានយ៉ាងល្អ។

ឯកឧត្តមក៏បានលើកទឹកចិត្តដល់អាជ្ញាធរខេត្តនិងមន្ទីរពាក់ព័ន្ធ សូមបន្តយកចិត្តទុកដាក់ក្នុងការងារបន្តទៀត។ ចំណែកបញ្ហាប្រឈមដែលខេត្តនិងមន្ទីរបានលើកឡើង ឯកឧត្តមប្រធានគណៈកម្មការបានបញ្ជាក់ថា ឯកឧត្តម នឹងពាំនាំយកបញ្ហាប្រឈមទាំងនេះ ជម្រាបជូនសម្តេចប្រធានរដ្ឋសភា ដើម្បីធ្វើអន្តរាគមន៍ទៅរាជរដ្ឋាភិបាល ជួយដោះស្រាយឲ្យបានទាន់ពេលវេលា ដើម្បីឲ្យខេត្តមានលទ្ធភាពពេញលេញក្នុងការបំពេញភារកិច្ចបម្រើប្រជាពលរដ្ឋ និងផលប្រយោជន៍របស់ប្រទេសជាតិ។

ជាមួយនេះដែរ គណៈកម្មការទី៣នៃរដ្ឋសភា ក៏បានសំណូមពរដោយផ្ទាល់ដល់ក្រសួងពាក់ព័ន្ធនិងវិស័យរបស់គណៈកម្មការទី៣ដែលអមដំណើរចុះមកកាន់ខេត្តត្បូងឃ្មុំនាពេលនេះ ជួយដោះស្រាយការលំបាក និងបញ្ហាប្រឈមមួយចំនួនដើម្បីឲ្យមន្ទីរមានលទ្ធភាពពេញលេញក្នុងការបំពេញភារកិច្ចរបស់ខ្លួន៕ធ.ដ