ការនាំចេញកាហ្វេវៀតណាមទៅអង់គ្លេសធ្លាក់ចុះ ខ្វះគុណភាព
ការនាំចេញកាហ្វេរបស់វៀតណាមទៅអង់គ្លេសធ្លាក់ចុះ ក្នុងពាក់កណ្តាលឆ្នាំ២០២១ ក្រោយពេលផលិតផលរបស់ខ្លួនបរាជ័យបំពេញតម្រូវការគុណភាព និងការប្រើប្រាស់របស់អតិថិជន ហើយរលកទី៤នៃជំងឺកូវីដ១៩ ដែលវាយប្រហារប្រទេសនេះ ក៏ប៉ះពាល់ដល់សកម្មភាពនាំចេញដែរ នេះបើតាមការចេញផ្សាយរបស់ទីភ្នាក់ងារសារព័ត៌មានរដ្ឋវៀតណាម VNexpress។
ប្រភពបន្តថា ការនាំចូលកាហ្វេរបស់អ្នកផ្គត់ផ្គង់នានាទៅអង់គ្លេសភាគច្រើន កើនឡើង ក្នុងពេលកន្លះឆ្នាំមកនេះ លើកលែងតែអ្នកផ្គត់ផ្គង់ ២ គឺវៀតណាម និងហុងឌុយរ៉ាស់។ ការនាំចេញកាហ្វេវៀតណាមទៅអង់គ្លេសគឺប្រភេទកាហ្វេឆៅ ឬ កាហ្វេពាក់កណ្តាលសម្រេច។ អ្នកជំនាញថា ឧសហ្សាហកម្មកាហ្វេវៀតណាមគួរតែព្យាយាមបង្កើនការបំពេញតម្រូវការ និងបង្កើនរសជាតិ ដើម្បីជំរុញការនាំចេញ។
ប្រភពថា កន្លះឆ្នាំមកនេះ ការនាំចេញកាហ្វេវៀតណាមទៅអង់គ្លេសធ្លាក់ចុះ ៤៨.៤ភាគរយ គឺមានត្រឹម១៦៤០០តោន រីឯតម្លៃវិញ ធ្លាក់ចុះ ៤៩.៣ភាគរយ គឺត្រឹម២៩លានដុល្លារអាមេរិក។ តម្លៃភាគហ៊ុនកាហ្វេវៀតណាមធ្លាក់ចុះ ពី២៧.៣២ភាគរយ មក១៦.៣៥ភាគរយ។
គួរបញ្ជាក់ថា វៀតណាមគឺជាប្រទេសផលិតកាហ្វេធំបំផុតលំដាប់ទី២ លោកពិភពលោក បន្ទាប់ពីប្រេស៊ីល លេខ១។ កាលពីឆ្នាំមុន ការនាំចេញរបស់វៀតណាមធ្លាក់ចុះ ដោយនាំចេញបានតម្លៃ ២.៧៤ពាន់លានដុល្លារអាមេរិក៕
