មោទនភាពជាតិខ្មែរ! មីជាតិកំពុងព្យាយាមវាយលុកទីផ្សារអន្តរជាតិ ក្រោយទទួលបានការអនុញ្ញាតអោយនាំចេញទៅលក់នៅវៀតណាម
ភ្នំពេញ៖ ការនាំចេញជំហានដំបូងនេះ គឺជាការឆ្លុះបញ្ចាំងពីការជឿជាក់លើគុណភាពផលិត ផលមីជាតិនៅក្នុងកម្រិតស្តង់អន្តរជាតិមួយ ស្របជាមួយតម្រូវការទីផ្សារក្នុងប្រទេសជិតខាងផងដែរ។ ការនាំចេញនេះបានផ្តល់ជាកាលានុវត្តភាពថ្មីមួយទៀត សម្រាប់ផលិតផលមីជាតិក្នុងការបង្ហាញខ្លួនលើទីផ្សារអន្តរជាតិ ខណៈពេលគុណភាព និងរសជាតិនេះ បានទទួលស្គាល់រួចជាស្រេចពីសំណាក់ប្រជាជននៅក្នុងស្រុក។
នេះជាប្រសាសន៍របស់លោកជំទាវ ជឹង សុគន្ធាវី នាយិកា ក្រុមហ៊ុនវ័នម៉រ មេនូហ្វេកឆឺរីង (មីជាតិ) ធ្វើឡើងនៅក្នុងសន្និសីទសារព័ត៌មានមួយនាព្រឹកថ្ងៃទី១៣ ខែកញ្ញា ឆ្នាំ២០២១នេះ នៅទីតាំងរោងចក្រមីជាតិ។ លោកជំទាវ ជឹង សុគន្ធាវី បន្តថា ស្របពេលមានការទទួលស្គាល់លើគុណភាព និងរសជាតិឆ្ងាញ់នៃផលិតផលមីជាតិ ក្រុមហ៊ុនដែលមានស្ថាបនិកជាកូនខ្មែរ និងជាក្រុមហ៊ុនផលិតមីកញ្ចប់ រសជាតិខ្មែរដំបូងគេនៅប្រទេសកម្ពុជា បាននាំចេញផលិតផលមីជាតិជាលើកទីមួយទៅកាន់ទីផ្សារប្រទេសវៀតណាម។ នេះជាវឌ្ឍនភាពថ្មីដ៏អស្ចារ្យមួយទៀតក្នុងការពង្រីកវិសាលភាពផលិតផលខ្មែរចូលក្នុងទីផ្សារថ្នាក់តំបន់នាពេលបច្ចុប្បន្ន និងទៅកាន់ពិភពលោកនាពេលអនាគត។ ជាមួយគ្នានេះ ឯកឧត្តម ឡាវ វ៉ាន់ នាយកប្រតិបត្តិ ក្រុមហ៊ុនវ័នម៉រ មេនូហ្វេកឆឺរីង បានបញ្ជាក់ថា ការនាំចេញនេះពិតជាបានផ្តល់ភាពវិជ្ជាមានជាច្រើនដល់ផលិតផលមីជាតិ ដែលស្របជាមួយបរិការណ៍ នៃការទទួលស្គាល់ពីគុណភាព និងរសជាតិឆ្ងាញ់របស់មីជាតិពីសំណាកប្រជាជនក្នុងស្រុក។ ជាពិសេស នេះជាមោទនភាពមួយដែលផលិតផលមីកញ្ចប់ក្នុងស្រុករបស់យើងមានវត្តមានក្នុងទីផ្សារអន្តរជាតិ។ ឯកឧត្តមបន្ថែមទៀតថា មីជាតិ បានផលិតឡើងក្នុងស្តង់ដារមួយដ៏ត្រឹមត្រូវតាំងពីការបង្កើតដំបូង ដើម្បីសម្រេចនូវទស្សនៈវិស័យរបស់យើង ជាផលិតផលចំណីអាហារដែលគេគ្រប់គ្នាទទួលស្គាល់។ ហើយថ្ងៃនេះជាដំណើរឆ្ពោះទៅមុខមួយដំណាក់កាលទៀត ដែលក្រុមហ៊ុនបានខិតខំប្រឹងប្រែងដើម្បីលើកកម្ពស់វិស័យចំណីអាហារវេចខ្ចប់នៅកម្ពុជា។
នៅក្នុងសន្និសីទសារព័ត៌មាននេះដែរ លោកជំទាវ ហ៊ីវ រតនា តំណាងដៃគូចែកចាយមីជាតិទៅបរទេសបានមានប្រសាសន៍ថា នេះជាជំហានដំបូងក្នុងកិច្ចសហការជាមួយក្រុមហ៊ុនមីជាតិ។ យើងពិតជាជឿជាក់លើគុណភាព និងសុវត្ថិភាព នៃផលិតផលមួយនេះ។ ស្របពេលជាមួយគ្នានេះផងដែរ យើងបានធ្វើការសិក្សាយ៉ាងល្អិតល្អិនបំផុតលើគុណភាព និងរសជាតិ របស់មីជាតិ ក៏ដូចជាតម្រូវការមីកញ្ចប់ក្នុងទីផ្សាប្រទេសវៀតណាមផងដែរ។ លោកជំទាវ ហ៊ីវ រតនា បញ្ជាក់ទៀតថា តម្រូវការមីកញ្ចប់ក្នុងប្រទេសវៀតណាម មានការកើនឡើងខ្ពស់ ក្នុងបរិបទនៃការរីករាលដាល នៃជំងឺកូវីដ១៩នេះ។ យើងជឿជាក់ថាផលិតផលមីជាតិ នឹងទទួលបានការគាំទ្រពីប្រជាជននៅទីនោះ។ ដើម្បីបំពេញនូវលក្ខខណ្ឌក្នុងការនាំចេញ កម្រិតគុណភាព និងសុវត្ថិភាពចំណីអាហារ ត្រូវបានឆ្លងកាត់ការសិក្សា និងវាយតម្លៃយ៉ាងយកចិត្តទុកដាក់បំផុត ដោយក្រសួងនិងស្ថាប័នពាក់ព័ន្ធលើបទដ្ឋានស្តង់ដារ ដើម្បីធានាដល់ការនាំចេញប្រកបដោយសុវត្ថិភាព និងគុណភាព។ គួរបញ្ជាក់ផងដែរថា ផលិតផលមីជាតិត្រូវបាននាំចេញដោយក្រុមហ៊ុន Viet thai phat ដែលមានអាសយដ្ឋាននៅក្នុងខេត្តអានជាំង ប្រទេសវៀតណាម៕