បណ្តាប្រទេសម្ចាស់ជំនួយសន្យាផ្តល់មូលនិធិបន្ទាន់ជាង១ពាន់លានដុល្លារដល់អាហ្វហ្គានីស្ថាន
បរទេស៖ អង្គការសហប្រជាជាតិបានរៀបចំសន្និសីទស្តីពីជំនួយមនុស្សធម៌ដល់អាហ្វហ្គានីស្ថាន ដោយបណ្តាប្រទេសដែលចូលរួមបានសន្យារួមគ្នាផ្តល់មូលនិធិសរុបជាង១ពាន់លានដុល្លារ សម្រាប់ជួយដល់ប្រជាជនអាហ្វហ្គានីស្ថានចំនួន១១លាននាក់ដែលកំពុងប្រឈមមុខនឹងវិបត្តិមនុស្សធម៌ខ្លាំងឡើង និងមនុស្សរាប់លានទៀតនៅប្រទេសផ្សេងទៀតក្នុងតំបន់។
នៅក្នុងសន្និសីទកម្រិតរដ្ឋមន្រ្តីលើកដំបូងនៅទីក្រុងហ្ស៊ឺណែវ ស្តីពីអាហ្វហ្គានីស្ថាន ចាប់តាំងពីក្រុមតាលីបង់បានឡើងកាន់អំណាចកាលពីមួយខែមុននោះ រដ្ឋាភិបាលលោកខាងលិច ម្ចាស់ជំនួយប្រពៃណីធំៗ និងអ្នកផ្សេងទៀតបានប្រកាសការសន្យាផ្តល់ជំនួយលើសពីប្រាក់៦០៦លានដុល្លារដែលអង្គការសហប្រជាជាតិកំពុងស្វែងរកសម្រាប់ការចំណាយចុងឆ្នាំនេះ ដើម្បីទប់ស្កាត់អាហ្វហ្គានីស្ថានពីគ្រោះមហន្តរាយមនុស្សធម៌។ ជាមួយគ្នានេះ អាមេរិកបានសន្យាផ្តល់ថវិកាជិត៦៤លានដុល្លារសម្រាប់ជាជំនួយថ្មីដល់អាហ្វហ្គានីស្ថាន និងចិនក៏បានសន្យាផ្តល់ស្បៀងអាហារ វ៉ាក់សាំង និងគ្រឿងបរិក្ខាផ្សេងៗទៀត ខណៈដែលជប៉ុនក៏បានប្រកាសផ្តល់ថវិកា៦៥លានដុល្លារសម្រាប់ជាជំនួយថ្មីផងដែរ។
ប្រធានផ្នែកមនុស្សធម៌របស់អង្គការសហប្រជាជាតិលោក ម៉ាទីន ហ្គ្រីហ្វហ្វីត បានប្រកាសនៅចុងកិច្ចប្រជុំថ្នាក់រដ្ឋមន្ត្រីថា ជំនួយមនុស្សធម៌ និងអភិវឌ្ឍជាង១,២ពាន់លានដុល្លារត្រូវបានសន្យាផ្តល់ជូន៕ ប្រភព៖ NHK