អាល្លឺម៉ង់៖ ចិនបដិសេធមិនឱ្យនាវាចម្បាំងអាល្លឺម៉ង់ចូលសំចត
ចិនបដិសេធមិនឱ្យនាវាចម្បាំងអាល្លឺម៉ង់ Bayern ដែលជានាវាសម្រាប់បាញ់ប្រហារនាវាជ្រមុជទឹក ចូលសំចតនៅក្នុងកំពង់ផែរបស់ខ្លួន។ នេះបើតាមការលើកឡើងរបស់អ្នកនាំពាក្យក្រសួងការបរទេសអាល្លឺម៉ង់កាលពីថ្ងៃពុធ។
នាវាអាល្លឺម៉ង់បានហែលចេញពីដែនដីអាល្លឺម៉ង់កាលពីខែមុន ក្នុងបេសកកម្មរយៈពេល ៦ខែទៅកាន់សមុទ្រចិនខាងត្បូង។ ខណៈចិនធ្វើការទាមទារថា ផ្ទៃសមុទ្រចិនខាងត្បូងប្រមាណ ៩០% ជាដែនទឹករបស់ខ្លួន រដ្ឋធានីប៊ែរឡាំងបានធ្វើការសង្កត់ធ្ងន់ថា ខ្លួនមិនទទួលស្គាល់ការទាមទារនេះទេ។
ទោះបីជាអាល្លឺម៉ង់មិនទទួលស្គាល់ក្ដី កន្លងទៅរដ្ឋមន្ត្រីការពារជាតិអាល្លឺម៉ង់អ្នកស្រី Annegret Kramp-Karrenbauer បានលើកឡើងថា បេសកកម្មនាវាចរណ៍របស់អាល្លឺម៉ង់មួយនេះមិនសំដៅលើការគំរាមកំហែងប្រទេសណានោះទេ ហើយការដែលចង់ឈប់សំចតនៅស្រុកចិន ក៏ព្រោះតែខ្លួនមានបំណង «រក្សានូវកិច្ចសន្ទនា» រវាងសម្ព័ន្ធមិត្ត និងចិនតែប៉ុណ្ណោះ។
អ្នកនាំពាក្យក្រសួងការបរទេស និងក្រសួងការពារជាតិចិន មិនទាន់ធ្វើការឆ្លើយតបភ្លាមៗនោះទេ ទៅនឹងការលើកឡើងរបស់ក្រសួងការបរទេសអាល្លឺម៉ង់៕
