រដ្ឋបាលខេត្តឧត្តរមានជ័យ ជំរុញដល់ព្រះសង្ឃ មន្ត្រីរាជការ ប្រជាពលរដ្ឋ បង្កើនការដាំដើមឈើ ដើម្បីបរិស្ថានបៃតងនិងកាត់បន្ថយការប្រែប្រួលអាកាសធាតុ
រដ្ឋបាលខេត្តឧត្តរមានជ័យ បានជំរុញដល់ ព្រះសង្ឃ មន្ត្រីរាជការស៊ីវិល និងប្រជាពលរដ្ឋ ចូលរួមដាំដើមឈើ ដើម្បីបង្កើនបរិស្ថានបៃតង និងជាផ្នែកមួយនៃដំណោះស្រាយចំពោះបញ្ហាបង្កឡើងដោយការប្រែប្រួលអាកាសធាតុ។ ការជំរុញបែបនេះបានធ្វើឡើងក្នុងពិធីដាំឈើ ក្នុងតំបន់ដែនជំរកសត្វព្រៃសង្ឃរុក្ខាវន័ ស្ថិតនៅ ភូមិថ្មីឃុំត្រពាំងតាវ ស្រុកអន្លង់វែង នៅថ្ងៃទី១៦ ខែកញ្ញា ឆ្នាំ២០២១ ក្រោមអធិបតីភាពឯកឧត្តម ប៉ែន កុសល្យ អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តឧត្តរមានជ័យ ។
ឯកឧត្តម ប៉ែន កុសល្យ ថ្លែងថា ជារៀងរាល់ឆ្នាំ កូនឈើប្រណីតរួមមាន៖ ក្រញូង បេង នាងនួន ធ្នង់ ជាច្រើនដើម ត្រូវបានមន្ត្រីបរិស្ថានបណ្តុះកូន ដាក់ដាំនៅតំបន់ដែនជម្រកសត្វព្រៃឈើសង្ឃរុក្ខាវន័។ ឯកឧត្តមថា សកម្មភាពនេះជាចលនាបំផុសស្មារតីស្រឡាញ់បរិស្ថាន ធនធានធម្មជាតិ និងជាការដាំស្តារព្រៃឈើឡើងវិញ ព្រមទាំងជាការចូលរួមការពារ និងអភិរក្សឲ្យបានគង់វង្សសម្រាប់ជាប្រយោជន៍មនុស្សរាប់ជំនាន់តទៅមុខទៀត។
ឯកឧត្តមបានថ្លែងថា ដើមឈើមួយដើម ដែលយើងម្នាក់ៗបានដាំនៅថ្ងៃនេះគឺមានន័យថា កម្ពុជានិងមានដើមឈើមួយដើមថ្មីបន្ថែមទៀត លើធនធានព្រៃឈើដែលយើងមានស្រាប់នៅក្នុងតំបន់ការពារធម្មជាតិដែលយើងទាំងអស់គ្នាត្រូវចូលរួមការពារអភិរក្ស។
គួរបញ្ជក់ថា ការប្រែប្រួលអាកាសធាតុ ដែលបាននិងកំពុងបង្កផលប៉ះពាល់យ៉ាងខ្លាំងដល់ពិភពលោក ហើយកម្ពុជាមិនមែនជាប្រទេសដែលបង្កឲ្យមានការប្រែប្រួលអាកាសធាតុឡើយ តែបាននិងកំពុងរងនូវផលប៉ះពាល់ដោយការប្រែប្រួលអាកាសធាតុ ជាក់ស្តែងដូចជា រដូវវស្សាចាប់ផ្ដើម ភ្លៀងធ្លាក់មិនទៀងទាត់ ភាពរាំងស្ងួត ឬទឹកជំនន់ធ្វើឪ្យមានការខូចខាតផលដំណាំប្រជាពលរដ្ឋជាដើម៕
