ប្រមុខការទូតអាមេរិកហៅបារាំងជាដៃគូសំខាន់ក្នុងតំបន់ឥណ្ឌូ-ប៉ាស៊ីហ្វិក
វ៉ាស៊ីនតោន៖ រដ្ឋមន្ត្រីការបរទេសអាមេរិកលោក អាន់តូនី ប្លីងគែន បានហៅបារាំងជាដៃគូសំខាន់នៅក្នុងតំបន់ឥណ្ឌូ-ប៉ាស៊ីហ្វិក ខណៈការអត្ថាធិប្បាយនេះទំនងជាចង់រំងាប់កំហឹងរបស់បារាំង ក្រោយអាមេរិក អូស្ត្រាលី និងអង់គ្លេសបានឈានដល់កិច្ចព្រមព្រៀងដើម្បីផ្គត់ផ្គង់នាវាមុជទឹកដល់អូស្ត្រាលី។
ថ្លែងក្នុងសន្និសីទសារព័ត៌មាន ក្រោយកិច្ចប្រជុំរវាងរដ្ឋមន្ត្រីការបរទេសនិងការពារជាតិអាមេរិក និងអូស្ត្រាលីនៅទីក្រុងវ៉ាស៊ីនតោន លោក ប្លីងគែន បានបញ្ជាក់ថា ទីក្រុងវ៉ាស៊ីនតោនចង់ស្វែងរកគ្រប់ឱកាស ដើម្បីធ្វើឱ្យកិច្ចសហប្រតិ បត្តិការឆ្លងសមុទ្រអាត្លង់ទិកនៅឥណ្ឌូ-ប៉ាស៊ីហ្វិកកាន់តែស៊ីជម្រៅ ហើយថា បារាំងនៅតែមានសារៈសំខាន់ក្នុងការធ្វើកិច្ចការនោះ។ ប្រមុខការទូតអាមេរិករូបនេះបន្តថា យើងសហការយ៉ាងជិតស្និទ្ធជាមួយបារាំងលើអាទិភាពរួមជាច្រើននៅក្នុងតំបន់ឥណ្ឌូ-ប៉ាស៊ីហ្វិក ប៉ុន្តែក៏នៅជុំវិញពិភពលោកផងដែរ…យើងនឹងបន្តធ្វើដូច្នេះ…យើងឱ្យតម្លៃជាមូលដ្ឋានលើទំនាក់ទំនងលើភាពជាដៃគូនោះ។ លោកបន្ថែមថា មន្ត្រីអាមេរិកក៏បានទាក់ទងជាមួយសមភាគីបារាំងក្នុងរយៈពេល២៤-៤៨ម៉ោងចុងក្រោយដើម្បីពិភាក្សាអំពីកិច្ចព្រមព្រៀងនេះ រួមទាំងមុនពេលប្រកាសភាពជាដៃគូត្រីភាគីផងដែរ។
គួរកត់សម្គាល់ ប្រទេសទាំងបីបាននិយាយនៅថ្ងៃពុធសប្តាហ៍នេះថា ពួកគេនឹងបង្កើតភាពជាដៃគូសន្តិសុខសម្រាប់តំបន់ឥណ្ឌូ-ប៉ាស៊ីហ្វិកដែលនឹងជួយអូស្ត្រាលីទិញនាវាមុជទឹកដើរដោយថាមពលនុយក្លេអ៊ែររបស់អាមេរិក និងអាចឃើញអូស្ត្រាលីលុបចោលកិច្ចព្រមព្រៀងទិញនាវាមុជទឹកផលិតនៅបារាំង។ បារាំងបានបញ្ចេញប្រតិកម្មទាំងកំហឹងចំពោះការបាត់បង់កិច្ចព្រមព្រៀងលក់មួយនេះ ដោយហៅវាថា ជា “ការចាក់ពីក្រោយខ្នង”៕ ប្រភព៖ Reuters