អូស្ត្រាលីនឹងបញ្ជាទិញមីស៊ីលអាមេរិក Tomahawk ដែលជាផ្នែកមួយនៃកិច្ចព្រមព្រៀងការពារជាតិត្រីភាគី
កង់បេរ៉ា៖ អូស្ត្រាលីប្រកាសថា ខ្លួននឹងបញ្ជាទិញមីស៊ីល Tomahawk របស់សហរដ្ឋអាមេរិករយៈចម្ងាយឆ្ងាយភ្លាមៗ ក្រោយបង្កើតសម្ព័ន្ធភាពថ្មីជាមួយអាមេរិក និងអង់គ្លេស ដើម្បីពង្រឹងសមត្ថភាពយោធាក្នុងពេលប្រឈមមុខនឹងការប្រកួតប្រជែងខ្លាំងឡើងជាមួយចិន។
ថ្លែងប្រាប់អ្នកកាសែតនៅទីក្រុងកង់បេរ៉ា នាយករដ្ឋមន្ត្រីអូស្ត្រាលីលោក ស្កុត ម៉ូរីសុន បាននិយាយដូច្នេះថា យើងនឹងពង្រឹងសមត្ថភាពវាយប្រហាររយៈចម្ងាយឆ្ងាយរបស់យើង រួមទាំងមីស៊ីលបញ្ជាទិស Tomahawk ដើម្បីដាក់ពង្រាយនៅលើនាវាពិឃាដ Hobart របស់កងទ័ពជើងទឹកអូស្ត្រាលី និងមីស៊ីលបាញ់ពីអាកាសទៅលើផ្ទៃដីដែលអាចពង្រីកសមត្ថភាពកងទ័ពអាកាសរបស់អូស្ត្រាលីយើង។ លោកបន្ថែមថា អូស្ត្រាលីក៏គ្រោងនឹងទទួលបានកងនាវាមុជទឹកនុយក្លេអ៊ែរថ្មី ដែលជាផ្នែកមួយនៃកិច្ចព្រមព្រៀងត្រីភាគីជាមួយសហរដ្ឋអាមេរិក និងអង់គ្លេសផងដែរ។
គួរកត់សម្គាល់ ផែនការទិញមីស៊ីលដែលបានធ្វើឡើងជាផ្នែកមួយ នៃកិច្ចព្រមព្រៀងការពារជាតិត្រីភាគី ដែលបានប្រកាសនៅក្នុងកិច្ចប្រជុំតាមវីដេអូដោយលោក ស្កុត ម៉ូរីសុន ជាមួយសមភាគីអង់គ្លេសលោក បូរីស ចនសុន និងប្រធានាធិបតីអាមេរិកលោក ចូ បៃដិន ត្រូវគេរំពឹងថា នឹងបង្កើនការខឹងសម្បានៅទីក្រុងប៉េកាំង៕ ប្រភព៖ Straitstimes