ហុងកុងធ្វើការបោះឆ្នោត «តែអ្នកស្នេហាជាតិ» ជាលើកដំបូង
កាលពីថ្ងៃអាទិត្យ ទី ១៩ កញ្ញាប្រជាជនហុងកុងតិចជាង ៥.០០០ នាក់បានចាប់ផ្ដើមធ្វើការបោះឆ្នោតជ្រើសរើសសមាជិកគណៈកម្មការបោះឆ្នោត ដែលនឹងជ្រើសរើសតែងតាំងមេដឹកនាំនៃទីក្រុងនេះ និងសមាជិកសភាមួយចំនួន។
គ្មានបេក្ខជនបក្សប្រឆាំងណាមួយឈរឈ្មោះក្នុងការបោះឆ្នោតជាលើកដំបូងនេះទេ បន្ទាប់ក្រុងប៉េកាំងធ្វើកំណែទម្រង់លើប្រព័ន្ធបោះឆ្នោតទីក្រុងនេះ ដើម្បីធានាថា «មានតែអ្នកស្នេហាជាតិ» ទេដែលអាចកាន់អំណាចបាន។ បេក្ខជនទាំងអស់ត្រូវបានពិនិត្យដោយ និងទទួលការអនុញ្ញាតពីក្រុងប៉េកាំង។
នាយកប្រតិបត្តិទីក្រុងហុងកុងអ្នកស្រីខារី ឡាំ បាននិយាយថា៖ «គោលបំណងទាំងមូលនៃការកែលម្អប្រព័ន្ធបោះឆ្នោត គឺដើម្បីធានាថាអ្នកស្នេហាជាតិនឹងគ្រប់គ្រងទីក្រុងហុងកុង»។
អ្នកស្រីបន្តទៀតថា៖ «ខ្ញុំមិនជឿថារដ្ឋាភិបាល ឬប្រទេសមួយផ្សេងទៀតនឹងអនុញ្ញាតឱ្យមានការបោះឆ្នោតជាសាធារណៈសម្រាប់សភារបស់ប្រជាជន ដែលមានបេសកកម្មបំផ្លាញផលប្រយោជន៍ជាតិ ឬសន្តិសុខជាតិ»។
គណៈកម្មការបោះឆ្នោតសមាជិក ១៥០០នាក់នេះ នឹងជ្រើសរើសតែងតាំងសមាជិកសភាហុងកុងចំនួន ៤០ នាក់នៅខែធ្នូនេះ ហើយនាយប្រតិបត្តិទីក្រុងនៅខែមីនាឆ្នាំក្រោយ។
កាលពីខែឧសភា សភាប្រជាជនចិនបានធ្វើកំណែទម្រង់ទៅលើប្រព័ន្ធបោះឆ្នោតរបស់ទីក្រុងហុងកុង ដោយកាត់បន្ថយសមាជិកសភាហុងកុងជ្រើសរើសដោយការបោះឆ្នោត ហើយដាក់ចេញយន្តការដើម្បីត្រួតពិនិត្យបេក្ខជនឈរឈ្មោះបោះឆ្នោត។ កំណែទម្រង់ទាំងនេះបានបំបាត់ឥទ្ធិពលរបស់គណបក្សប្រឆាំង។ ឥទ្ធិពលរបស់សេដ្ឋីហុងកុងនៅក្នុងគណៈកម្មការបោះឆ្នោតក៏ត្រូវបានកាត់បន្ថយយ៉ាងខ្លាំងផងដែរ ប៉ុន្តែសេដ្ឋីដែលស្របនឹងផលប្រយោជន៍របស់ក្រុងប៉េកាំងអាចរក្សាវត្តមានពួកគេបាន៕
ប្រភព៖ Reuters